​អ៊ុយក្រែន៖ ប្រធានាធិបតី​អ៊ុយ​ក្រែ​ន​លោក​ Volodymyr Zelenskyy បាន​ទៅ​ពិនិត្យ​ស្ថានការណ៍​នៅ​តំបន់ Kherson ភាគខាងត្បូង​ ជាទី​ដែល​លោក​បាន​ពិនិត្យមើល​ហេដ្ឋារចនាសម្ព័ន្ធ​ក្នុង​មូលដ្ឋាន ហើយ​បាន​សន្យា​ថា​នឹង​ស្តារ​អ្វីៗ​ទាំងអស់​ឡើងវិញ បន្ទាប់ពី​ការ​លុកលុយ​របស់​រុស្ស៊ី​។

​ដំណើរ​ទៅកាន់​តំបន់​ដែល​អ៊ុយ​ក្រែ​ន​បាន​វាយលុក​ដោយ​ជោគជ័យ​ ប្រឆាំង​នឹង​កងកម្លាំង​កាន់កាប់​របស់​រុស្ស៊ី​កាលពី​ចុង​ឆ្នាំមុន គឺជា​លើក​ទី​២ ​របស់​លោក​នៅ​ខាងក្រៅ​ទីក្រុង Kyiv នៅ​សប្តាហ៍​នេះ​។ កាលពី​ថ្ងៃ​ពុធ លោក​បាន​ទៅ​សួរ​សុខទុក្ខ​ទាហាន​នៅ​ជិត​ក្រុង Bakhmut ភាគ​ខាងកើត​។ ​លោក Zelenskyy​ បាន​សរសេរ​នៅ​លើ​កម្មវិធី ​Telegram ក្រោម​រូបភាព​នៃ​ដំណើរ​ទស្សនកិច្ច​របស់​លោក​ទៅ​កាន់​តំបន់ Kherson ថា ខ្ញុំ​បាន​និយាយ​ជាមួយ​អ្នកស្រុក​អំពី​បញ្ហា និង​តម្រូវការ​បច្ចុប្បន្ន​របស់​ពួកគេ។​

​ការ​វាយបក​របស់​អ៊ុយ​ក្រែ​ន​កាលពី​ឆ្នាំមុន​ បាន​រុញច្រាន​កង​ទ័ព​រុស្ស៊ី​ឲ្យ​ចាក​ចេញពី​តំបន់​ទីក្រុង Kherson ប៉ុន្មាន​ខែក្រោយ​ការ​ចូល​គ្រប់គ្រង​។ ពេលនេះ​កម្មករ​នៅ​ក្នុង​តំបន់​នេះ​កំពុង​មមាញឹក​ត​ភ្ជាប់​បណ្ដាញ​ថាមពល និង​ទឹក​ឡើងវិញ​។ ​លោក Zelensky បាន​សរសេរ​នៅ​ក្នុង​សារ​បង្ហោះ​ដាច់​ដោយ​ឡែក ​ដោយ​បង្ហាញ​ពី​រូបលោក​កំពុង​ត្រួតពិនិត្យ​ថាមពល​ និង​ហេដ្ឋារចនាសម្ព័ន្ធ​ថា យើង​ត្រូវតែ​ធានា​ការ​ស្ដារ​ឡើងវិញ​ឲ្យ​បាន​ពេញលេញ​ និង​ការ​ការពារ​វិស័យ​ថាមពល​រដ្ឋ​យើង៕

អត្ថបទ៖ សុខមាន