ភ្នំពេញ៖ លោកជំទាវបណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ នារសៀលថ្ងៃទី២៤ ខែមីនា ឆ្នាំ២០២៣នេះ បានអនុញ្ញាតឲ្យលោក Edgar Doerig (អេដហ្គា ដូរីន) តំណាងអង្គការ OIF ប្រចាំតំបន់អាស៊ី-ប៉ាស៊ីហ្វិកថ្មី ចូលជួបពិភាក្សាការងារស្តីពីការប្រើប្រាស់​ភាសាបារាំង​ក្នុងប្រទេសកម្ពុជា។

ក្នុងជំនួបទ្វេរភាគីនេះ លោក Edgar Doerig (អេដហ្គា ដូរីន) បានរំលឹកពីកិច្ចការមួយចំនួន​ដែលបាន​ធ្វើជាមួយគ្នានាពេលកន្លងមក ក្នុងនាមជាប្រទេសដែលប្រើប្រាស់ភាសាបារាំង។ ដោយសារប្រទេសកម្ពុជា ​ជាប្រទេសមួយដែលឋិតនៅក្នុងតំបន់អាស៊ីអាគ្នេយ៍ ដែលប្រើប្រាស់​ភាសាបារាំង ហើយក៏មានប្រទេសឡាវ និងប្រទេសវៀតណាមផងដែរ។

លោក បានកត់សម្គាល់ឃើញថា ពាក់ព័ន្ធនឹងការប្រើប្រាស់ភាសាបារាំង ​នៅក្នុងប្រទេសកម្ពុជា រួមមាន៖ ភ្ញៀវទេសចរ និងគម្រោងផ្សេងៗទៀត ដែលបានលើកកម្ពស់ក្នុងការប្រើប្រាស់បារាំង។

ជាការឆ្លើយតបលោកជំទាវ រដ្ឋមន្រី្ត បានជម្រាបជូនថា តាំងពីដើម និងរហូតមកដល់បច្ចុប្បន្ននេះ ប្រទេសកម្ពុជា ក្នុងការប្រើប្រាស់ភាសាបារាំង ​នៅតែមានប្រើប្រាស់ច្រើនជាធម្មតា ក្នុងនោះមាន​ស្រទាប់យុវវ័យ ជាពិសេសនៅតាមគ្រឹះស្ថានសិក្សារដ្ឋនានា មានដូចជា៖ វិទ្យាស្ថានបច្ចេកវិទ្យា​កម្ពុជា សកលវិទ្យាល័យវិទ្យាសាស្រ្តសុខាភិបាល ​និងសកលវិទ្យាល័យភូមិន្ទវិចិត្រសិល្បៈ កំពុងប្រើប្រាស់​ភាសាបារាំង ​មិនត្រឹមតែប្រើប្រាស់ភាសាបារាំងនោះទេ គឺមានគម្រោងមួយចំនួន បាន​មកធ្វើការក្នុងប្រទេសកម្ពុជាផងដែរ។ និយាយដោយឡែកសកលវិទ្យាល័យភូមិន្ទវិចិត្រសិល្បៈ មានគម្រោងមួយ ​គឺមនុស្សសាស្រ្តា ​ដែលអប់រំជាភាសាបារាំង ​ហើយគម្រោងមួយនេះ មិនត្រឹមតែ​មាននិសិ្សតកម្ពុជា ចូលរួមសិក្សានោះទេ គឺមាននិសិ្សតមកពីប្រទេសឡាវ ​និងប្រទេសវៀតណាម ចូលរួមសិក្សាក្នុងកម្មវិធីនេះផងដែរ។ ហើយកម្មវីធីមនុស្សសាស្រ្តា គឺផ្តោតសំខាន់ទៅលើការអប់រំ​ផ្នែកសិល្បៈ។ ដូច្នេះការប្រើប្រាស់ភាសាបារាំងនៅក្នុងសកលវិទ្យាល័យភូមិន្ទវិចិត្រសិល្បៈ របស់យើង មានលើផ្នែកស្ថាបត្យកម្ម និងបុរាណវិទ្យា ជាដើម។ មួយវិញទៀត រាជរដ្ឋាភិបាលបារាំង បានជួយកម្ពុជា តាមរយៈដៃគូដូចជា FFEO(អេហ្វ ហ្វេអូ) និងការងារសិក្សាស្រាវជ្រាវច្រើន ទាក់ទង​នឹងការថែទាំគាំពារអភិរក្សសំណង់បុរាណ ​និងតាមរយៈICC Angkor ដូចគ្នា ដែលមានសហប្រធាន​ចំនួនពីរ គឺបារាំង និងជប៉ុន ក្នុងនោះឯកសារដែលប្រើប្រាស់នៅក្នុងICC Angkor មួយចំនួន គឺប្រើប្រាស់ជាភាសាបារាំង និងភាសាអង់គ្លេស។

តាមរយៈភស្តុតាងទាំងអស់នេះ សបញ្ជាក់ឲ្យឃើញថា ភាសាបារាំង នៅតែត្រូវបានប្រើប្រាស់ច្រើន នៅក្នុងព្រះរាជាណាចក្រកម្ពុជា៕អត្ថបទ៖ រដ្ឋា