ភ្នំពេញ៖ បន្ទាប់ពីប្រមុខរាជរដ្ឋាភិបាលកម្ពុជាសម្ដេចតេជោ ហ៊ុន សែន នាយករដ្ឋមន្ត្រី បានដាក់បទ បញ្ជាឲ្យបង្ក្រាបបទល្មើសនេសាទគ្រប់ទម្រង់ ​និងគ្រប់ប្រភេទ ​គឺនៅឆ្នាំនេះ ប្រជានេសាទ​នៅតាមទន្លេធំៗ បានប្រ ទះឃើញនូវប្រភេទត្រីកម្រ ឬជិតផុតពូជមួយចំនួនវិញ ចំណែកបរិមាណជលត្រីក៏កើនឡើងផងដែរ ។

ក្នុងវេទិកាសាធារណៈថ្នាក់ជាតិលើកទី២ ស្តីពីអភិបាលកិច្ចល្អ និងប្រសិទ្ធភាព នៃការគ្រប់គ្រងរួម គ្នានូវធនធានជលផល​ ក្រោមប្រធានបទ អភិបាលកិច្ចល្អ ក្នុងវិស័យជលផលប្រកបដោយនិរន្តរភាព នៅថ្ងៃ ទី២៤ ខែមីនា នេះ លោក យុក សេងឡុង នាយកប្រតិបត្តិអង្គការហ្វេក (FACT) បានឱ្យដឹងថា កម្ពុជា ខានឃើញនូវបរិមាណត្រីដ៏ច្រើនអស់រយៈពេលជាច្រើនឆ្នាំមកហើយ ​ប៉ុន្តែនាដើមឆ្នាំនេះ គឺបរិមាណត្រី មានការកើនឡើង ​ពិសេសនៅតំបន់ផាត់សណ្ដាយ ​មានត្រីជាច្រើនប្រភេទនៅទីនោះ ត្រូវបានអភិរក្ស ។

លោក បានបន្តថា ចំណែកនៅក្នុងបឹងទន្លេសាបវិញ ក៏ត្រូវបានប្រទះឃើញនូវប្រភេទត្រីកម្រ ឬជិត ផុតពូជ ដូចជាត្រីគល់រាំងជាដើម​ ខណៈតំបន់អភិរក្សជាច្រើនកន្លែង ​ត្រូវបានបង្កើន និងមាន​ប្រភេទត្រីជាច្រើន ។

លោកស្រី ភាណ សោភ័ណ នាយិការអង្គការអុកស្វាម (Oxfam) បានឲ្យដឹងដែរថា ​សម្រាប់កិច្ច ការ​អភិរក្សមច្ឆជាតិនៅកម្ពុជា ក្រៅពីនៅតំបន់ទន្លេសាប ​គឺនៅតាមបណ្ដាខេត្តមួយចំនួន​ តាមបណ្ដោយ ទន្លេមេគង្គ ក៏បានប្រទះឃើញប្រភេទត្រីកម្រផ្សេងៗ ព្រមទាំងបានប្រទះឃើញប្រភេទអណ្ដើក រស់នៅក្នុងអន្លង់ជ្រៅៗ នៃបាតទន្លេផងដែរ ។

ឯកឧត្តម សក់ សេដ្ឋា រដ្ឋលេខាធិការក្រសួងមហាផ្ទៃ បានលើកឡើងថា​ សម្រាប់វេទិកាសាធារណៈ ដែលរៀបចំនៅពេលនេះ​ គឺដើម្បីស្វែងយល់អំពីបច្ចុប្បន្នភាព ​នៃដំណើរការពង្រឹងអភិបាលកិច្ចល្អ លើវិស័យជលផលនៅកម្ពុជា (បឹងទន្លេសាប ទន្លេមេគង្គ និងតំបន់ឆ្នេរ) ​និងបច្ចុប្បន្នភាព នៃ​ដំណើរការធ្វើ វិសោធនកម្មច្បាប់ ស្តីពីជលផល ។

ឯកឧត្តម បានបន្តថា វេទិកានេះ ក៏ដើម្បីស្វែងយល់អំពីផែនការ​ថវិកាជាតិ ​សម្រាប់វិស័យជលផល ឆ្នាំ២០២២ ​និងឆ្នាំបន្តបន្ទាប់​ និងគោលការណ៍ណែនាំ ​ស្តីពីការប្រើប្រាស់ថវិកាឃុំ ជាពិសេស​សម្រាប់គាំទ្រ ​ដល់សកម្មភាពអភិរក្សធនធានធម្មជាតិ/ជលផល និងបង្កើនជីវភាពរបស់​ប្រជា​នេសាទនៅមូលដ្ឋាន តាមរយៈការធ្វើពិពិធកម្មមុខរបរចម្រុះ ​មានសេវាកម្មអេកូទេសចរណ៍ ​ជាដើម ក៏ដូចជា​ការទទួលបាននូវអនុសាសន៍ណែនាំ ​សម្រាប់ស្ថាប័នពាក់ព័ន្ធ និងអាជ្ញាធរ​ថ្នាក់ក្រោមជាតិ​អនុវត្ត ក្នុងការលើកកម្ពស់អភិបាលកិច្ចល្អ ក្នុងវិស័យជលផល ៕អត្ថបទ៖ បាន សុខរិទ្ធិ