​អេ​ស្ប៉ា​ញ៖ ប្រជាជន​មួយ​ចំនួន​នៅ​ក្នុង​ភូមិ​នានា​នៅ​ក្បែរ​តំបន់​ភ្លើង​ឆេះ​ព្រៃ Villanueva de Viver ប្រទេស​អេ​ស្ប៉ា​ញ​ កាលពី​ថ្ងៃ​ព្រហស្បតិ៍​បានសម្រេច​ចិត្ត​ចាកចេញ​ មុន​ពេល​ទទួល​បាន​បទបញ្ជា​ផ្លូវការ ខណៈ​ពួកគេ​ព្រួយបារម្ភ​អំពី​ការ​ជម្លៀស​ខ្លួន​ចេញ​ ពេញ​មួយ​យប់​នៅ​លើ​ផ្លូវ​តូច​ចង្អៀត​នៅ​លើ​ជ្រលង​ភ្នំ​។​

​ប្រជាជន​ផ្សេងទៀត​ត្រូវ​បាន​បង្ខំ​ឱ្យ​ជម្លៀស​ខ្លួន​ចេញ ខណៈ​ភ្លើង​បាន​ឆាបឆេះ​រាលដាល​នៅ​ចន្លោះ​តំបន់ Aragon និង​តំបន់ Valencia ហើយ​បាន​ខិត​កាន់តែ​ជិត​លំនៅឋាន​។ ​អង្គភាព​សេវា​សង្គ្រោះ​បន្ទាន់​បាន​និយាយ​ថា ពួកគេ​បាន​បង្កើត​ទីជម្រក​សម្រាប់​មនុស្ស ៦០០​នាក់ និង​មន្ទីរពេទ្យ​តំបន់​មួយ​។ ប្រជាជន​ក្នុង​តំបន់​មួយ​ចំនួន​បាន​បន្ទោស​ការ​ខ្វះ​ការ​ការពារ ​ជា​មូលហេតុ​នៃ​មហន្តរាយ​បរិស្ថាន​។​ ​ពលរដ្ឋ​ម្នាក់​បាន​និយាយ​មុន​ពេល​ចាក​ចេញពី​ភូមិ​របស់​ខ្លួន​ក្នុង​តំបន់ Aragon ថា នេះ​ជា​មូល​ហេតុ​ដែល​ព្រៃឈើ​ត្រូវ​បាន​គេ​បោះបង់​ចោល ហើយ​វា​ជា​រឿង​គួរ​ឲ្យ​អាម៉ាស់​។

​ក្រុម​អ្នក​ពន្លត់​អគ្គិភ័យ​ត្រូវ​បាន​ជូនដំណឹង ​អំពី​ចំហេះ​ព្រៃ​ដ៏​សន្ធោសន្ធៅ​នេះ​នៅ​ជិត​ភូមិ Villanueva de Viver ក្នុង​តំបន់ Valencia នៅមុន​ម៉ោង ១រសៀល​ម៉ោង​ក្នុង​តំបន់​។ អង្គភាព​សេវា​សង្គ្រោះ​បន្ទាន់​បាន​និយាយ​ថា ភ្លើង​បាន​ឆេះ​រាល​ដាល​លើ​ផ្ទៃដី​ជាង ១,០០០ហិកតា។ ​យន្តហោះ​ប្រមាណ ១៥​គ្រឿង​ត្រូវ​បាន​ប្រើប្រាស់​ដើម្បី​ពន្លត់​អណ្តាត​ភ្លើង ដែល​បាន​បង្ខំ​ឱ្យ​មាន​ការ​ជម្លៀស​អ្នកភូមិ​។ ប្រព័ន្ធ​ផ្សព្វផ្សាយ Cadena Ser បាន​រាយការណ៍​ថា ប្រជាជន​ជាង ១,០០០​នាក់​ត្រូវ​បាន​បង្ខំ​ឱ្យ​ចាក​ចេញពី​លំនៅឋាន​របស់​ពួកគេ៕

អត្ថបទ៖ ប៊ុនថន