ភ្នំពេញ៖ វត្តអារាមនានា នៅក្នុងរាជធានីភ្នំពេញ ជាពិសេសស្ថិតនៅជាយរាជធានី បានចាប់ផ្តើមរៀបចំតុបតែងលម្អ ត្រៀមប្រារព្ធពិធីបុណ្យចូលឆ្នាំថ្មីប្រពៃណីជាតិ និងទទួលពុទ្ធបរិស័ទ ខណៈថ្ងៃចូលឆ្នាំថ្មី កាន់តែខិត ជិតចូលមកដល់ ។

នៅឯក្នុងបរិវេណវត្តវាលស្បូវ ដែលមានទីតាំងនៅក្នុងខណ្ឌច្បារអំពៅ រាជធានីភ្នំពេញ នៅថ្ងៃនេះ កំ ពុងមានសកម្មភាពមមាញឹក នៃការរៀបចំតុបតែងលម្អទីវត្ត ឱ្យមាន​សោភ័ណភាព បើទោះជាក្នុង​ទីវត្តនេះ មិនទំនងជានឹងមានការរៀបចំកម្មវិធីអ្វីច្រើនដូចឆ្នាំមុនក្ដី ។

ព្រះតេជគុណ ឃឹម រ៉ាម៉ន គ្រូសូត្រឆ្វេងវត្តវាលស្បូវ មានសង្ឃដីកាប្រាប់BTVថា នៅក្នុងឆ្នាំនេះ វត្ត វាលស្បូវ ​មិនបានរៀបចំកម្មវិធីអបអរឆ្នាំថ្មី ​អធិកអធមដូចឆ្នាំ២០១៩នោះទេ ពោលគឺរៀបចំ​សមល្មម។ កម្មវិធីអបអរសារទឆ្នាំថ្មីប្រពៃណីជាតិនេះ មានដូចជា៖ លេងល្បែងប្រជាប្រិយខ្មែរ បង្ហោះគោមក្នុងពេលរាត្រី កម្មវិធីរាំលេងកម្សាន្ត និងកម្មវីធីបែបសាសនា ជាដើម។

លោក ជុំ វុឌី្ឍ ប្រធានមនី្ទរវប្បធម៌ ​និងវិចិត្រសិល្បៈ រាជធានីភ្នំពេញ បានលើកឡើងដែរថា ដោយ មានការណែនាំ ​និងឧបត្ថម្ភគាំទ្រពីរដ្ឋបាលរាជធានីភ្នំពេញ សហការជាមួយមន្ទីរវប្បធម៌ និងវិចិត្រ​សិល្បៈ រមណីយដ្ឋានវប្បធម៌ប្រវតិ្តសាស្រ្តវត្តភ្នំ ត្រូវបានជ្រើសរើសរៀបចំ«សង្រ្កាន្តវត្តភ្នំ» ដើម្បីត្រៀម​ទទួលទេវតាឆ្នាំថ្មី និងប្រពលរដ្ឋមកលេងកំសាន្តនៅទីនេះ។

លើសពីនេះ លោកអំពាវនាវដល់ប្រជាពលរដ្ឋ គ្រប់ទិសទីជិតឆ្ងាយ សូមអញ្ជើញ​មកលេង​កំសាន្តនៅសង្រ្គាន្តវត្តភ្នំទាំងអស់គ្នា។

ពិធីបុណ្យចូលឆ្នាំថ្មី ប្រពៃណីជាតិ នឹងចាប់ផ្តើមពីថ្ងៃទី១៤ ដល់ថ្ងៃទី១៦ ខែមេសា ខាងមុខនេះ។ តាមទម្លាប់ ជនជាតិខ្មែរ ​និយមរៀបចំចូលឆ្នាំថ្មី ចំនួន៣ថ្ងៃ គឺថ្ងៃទី១ ជាថ្ងៃចូលឆ្នាំ, ថ្ងៃទី២ ជាថ្ងៃ (វារៈ) វនបត, និងថ្ងៃទី៣ ជាថ្ងៃឡើងស័ក។

ពលរដ្ឋខ្មែរ មានជំនឿថា ក្នុងមួយឆ្នាំនៃការរស់នៅ តែងជួបប្រទះអព មង្គល ​ឧបទ្រព្យចង្រៃផ្សេងៗ ឬបានប្រព្រឹត្ដអំពើសៅហ្មង មិនគប្បី ។ លុះផុតឆ្នាំចាស់ទៅ គេនាំគ្នាធ្វើបុណ្យ ស្លៀកពាក់ថ្មីៗ នាំគ្នាដើរលេងកម្សាន្ដ ​ដើម្បីឲ្យអស់កង្វល់ និងឲ្យមានសិរីសួស្ដី ​សុភមង្គលនៅក្នុងឆ្នាំថ្មី ៕ អត្ថបទ៖ ទូច សោភ័ណ