អូឡាំពិក៖ អត្តពលិក គ្រូបង្វឹក ក៏ដូចជាក្រុមការងារផ្សេងៗរបស់កូរ៉េខាងត្បូង បានចាប់ផ្តើមទទួលថ្នាំបង្ការប្រឆាំង Covid-19 ហើយមុនទៅចូលរួមព្រឹត្តិការណ៍អូឡាំពិក ២០២០ នៅទីក្រុងតូក្យូប្រទេសជប៉ុន។
គណៈកម្មាធិការអូឡាំពិក និងកីឡាប្រទេសកូរ៉េខាងត្បូងបានអោយដឹងថា មនុស្សប្រមាណ ១០០នាក់បានទទួលវ៉ាក់សាំងដូសទី១ រួចហើយនៅមន្ទីរពេទ្យរដ្ឋទីក្រុងសេអ៊ូលកាលពីថ្ងៃព្រហស្បតិ៍ ដែលជាថ្ងៃដំបូងនៃការចាប់ផ្ដើមយុទ្ធនាការចាក់វ៉ាក់សាំង ដល់អត្តពលិកអូឡាំពិក។ កូរ៉េខាងត្បូងអោយដឹងថា អត្តពលិកសរុប ៩៣០នាក់រួមជាមួយគ្រូបង្វឹក មន្ត្រី និងបុគ្គលិកពាក់ព័ន្ធផ្សេងទៀតនឹងទទួលបានវ៉ាក់សាំង AztraZeneca រឺ Pfizer។ អ្នកដែលបានចាក់ទាំងអស់ រួមទាំងអត្តពលិកដែលមានឈ្មោះប្រកួតជំរុះ និងអត្តពលិកដែលមានឈ្មោះទៅអូឡាំពិកស្រាប់ផងដែរ។
សូមបញ្ជាក់ថា កូរ៉េខាងត្បូងគ្រោងបញ្ជូនមនុស្សប្រមាណ ៨០០ ទៅ ៩០០នាក់ទៅចូលរួមព្រឹត្តិការណ៍អូឡាំពិកឆ្នាំនេះ ដែលក្នុងនោះមានអត្តពលិកតែ ៣៥០នាក់ប្រកួតលើប្រភេទកីឡាចំនួន ២៧។ ព្រឹត្តិការណ៍អូឡាំពិកទីក្រុងតូក្យូឆ្នាំ២០២០ ដែលលើកមកដល់ឆ្នាំ២០២១ នេះដោយសារមេរោគរាតត្បាត Covid-19 គ្រោងនឹងចាប់ផ្ដើមនៅខែកក្កដាខាងមុខ៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
