កីឡា ៖ ពេលនេះអគ្គិជ័យកីឡា ស៊ីហ្គេម និងអាស៊ានប៉ារ៉ាហ្គេម ២០២៣ បានធ្វើដំណើរដល់ទីក្រុងម៉ានីល ប្រទេសហ្វីលីពីនហើយ បន្ទាប់ពីបញ្ចប់ដំណើរដំបូងនៅទីក្រុងហាណូយ សាធារណរដ្ឋសង្គមនិយមវៀតណាម ដោយជោគជ័យ។ ហ្វីលីពីនជាប្រទេសទីពីរ ដែលអគ្គិជ័យកីឡា ធ្វើដំណើរដល់ ខណៈពីធីរត់គប់ភ្លើងស៊ីហ្គេម និងអាស៊ានប៉ារ៉ាហ្គេម ត្រូវធ្វើឡើងនៅថ្ងៃទី២៧ ខែមីនានេះ មុនចេញទៅកាន់ប្រទេសទី៣ និងប្រទេសបន្តបន្ទាប់ទៀត។

ពេលអញ្ជើញដល់ ប្រតិភូអគ្គិជ័យកីឡាដែលដឹកនាំដោយឯកឧត្តម ហោ សារុន រដ្ឋលេខាធិការ​ក្រសួងទេសចរណ៍​និងជាបេសកជនពិសេសរបស់ CAMSOC ត្រូវទទួលស្វាគមន៍ដោយឯកឧត្តម ផន ពៅ ឯកអគ្គរាជទូត ព្រះរាជាណាចក្រកម្ពុជាប្រចាំនៅប្រទេសហ្វីលីពីន និង លោក Carl Irving Sambrano អនុប្រធានគណៈកម្មាធិការជាតិអូឡាំពិកហ្វីលីពីន។

ពេលនេះ អគ្គិជ័យកីឡាស៊ីហ្គេម អាស៊ានប៉ារ៉ាហ្គេម កំពុងតម្កល់ទុកនៅស្ថានទួតព្រះរាជាណាចក្រកម្ពុជា។

យោងប្រភពពីទីក្រុងម៉ានីលបានបញ្ជាក់ឱ្យដឹងថា ពិធីរត់គប់ភ្លើងស៊ីហ្គេម និងអាស៊ានប៉ារ៉ាហ្គេម ២០២៣នេះ ធ្វើឡើងនៅទីក្រុង តាហ្គេតាយ(Tagaytay) ចម្ងាយម្រមាណ៧០គីឡូម៉ែត្រពីទីក្រុងម៉ានីល។

ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ​ព្រះរាជាណាចក្រកម្ពុជា កីឡារស់ក្នុងសន្តិភាព រីកចម្រើនក្នុងសន្តិភាព និងបង្កើតភាពសុខដុមរមនា និង​ជំរុញកំណើនសេដ្ឋកិច្ច និងសង្គម។ ក្រោមម្លប់សន្តិភាព យើងរួមគ្នា ធ្វើការជាមួយគ្នា យើងសម្រេចបានរួមគ្នា ហើយយើងចែករំលែកជោគជ័យរួមគ្នា៕