បាល់ទាត់៖ ក្រុមបាល់ទាត់ជំរើសជាតិឥណ្ឌូនេស៊ី នឹងចាកចេញទៅទឹកដីអារ៉ាប់រួមនៅថ្ងៃទី១០ ខែឧសភាខាងមុខដើម្បីត្រៀមការប្រកួតជំរុះ World Cup ២០២២ ជុំចុងក្រោយនៃពូល G ដែលនឹងចាប់ផ្តើមនៅដើមខែមិថុនា។
ក្រុមឥណ្ឌូនេស៊ីដែលស្ថិតក្រោមការដឹកនាំរបស់លោក Shin Tae-yong នឹងចាប់ផ្តើមប្រមូលផ្តុំហ្វឹកហាត់នៅថ្ងៃទី១ ដើមខែក្រោយនេះដោយកីឡាករ ៣៤នាក់នឹងត្រូវបានកោះហៅ។ តាមពិតទៅក្រុមឥណ្ឌូនេស៊ីអស់ឱកាសឡើងជុំបន្តទៅហើយ ដោយកំពូលក្រោមគេក្នុងពូល G លេង ៥ប្រកួតចាញ់ទាំង ៥ ស្របពេលម្ចាស់ផ្ទះវគ្គជំរុះអារ៉ាប់រួមឈរលេខ៤ មាន ៦ពិន្ទុក្រោយលេងបាន ៥ប្រកួត ឯលើគេគឺវៀតណាមមាន ១១ពិន្ទុ, ម៉ាឡេស៊ី ៩ពិន្ទុ និងថៃ ៨ពិន្ទុសុទ្ធតែលេងបាន ៥ប្រកទតដូចគ្នា។
សូមបញ្ជាក់ថា អារ៉ាប់រួមត្រូវបានជ្រើសរើសជាម្ចាស់ផ្ទះ ការប្រកួតជំរុះក្នុងពូល G ដែលនៅសល់នេះដោយសារក្រុមទាំងអស់ មិនអាចធ្វើដំណើរឆ្លងកាត់ច្រើនប្រទេសបានដោយសារ Covid-19។ ឥណ្ឌូនេស៊ីនឹងត្រូវជួបថៃមុនគេនៅថ្ងៃទី៣ ខែមិថុនា មុនពេលជួបវៀតណាមថ្ងៃទី ៧ និងចុងក្រោយជួបម្ចាស់ផ្ទះអារ៉ាប់រួមថ្ងៃទី១១ ខែដដែល៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
