ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា មាន​ប្រសាសន៍ថា រាជរដ្ឋាភិបាលកម្ពុជា ចាត់ទុកឌីជីថល ក្នុងវិស័យសាធារណៈនិងឯកជនជាការងារអាទិភាព ​ដើម្បីកសាង រដ្ឋាភិបាលឌីជីថល សង្គមឌីជីថល និងប្រជាជនឌីជីថល។

សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានមានប្រសាសន៍​យ៉ាងដូច្នេះ ក្នុងឱកាសអញ្ជើញជាអធិបតីដ៏ខ្ពង់ខ្ពស់ពិធីបើក ​ទិវាជាតិវិទ្យាសាស្ត្រ បច្ចេកវិទ្យា ​និងនវានុវត្តន៍ និង​ការបើកសម្ពោធពិព័រណ៍វិទ្យាសាស្ត្រ បច្ចេកវិទ្យា ​និងនវានុវត្តន៍កម្ពុជា អន្តរជាតិលើកទី១ឆ្នាំ២០២៣ ដែលរៀបចំឡើងដោយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍នៅកោះពេជ្រ នាព្រឹកថ្ងៃទី២៦មីនានេះ ។

សម្តេចតេជោ បានមានប្រសាសន៍ថា ព្រឹត្តិការណ៍នេះក៏ផ្ដល់ឱកាស​ដល់​ភាគីពាក់ព័ន្ធដើម្បី​ពិភាក្សា​ចែករំលែកបទពិសោធន៍ និងឧត្តមានុវត្តន៍អន្តរជាតិ​ព្រមទាំងរួមគ្នាដោះស្រាយបញ្ហាប្រឈម​ដែល​កំពុងកើតឡើងនៅក្នុងតំបន់ និងសកលលោកក៏ដូចជាទិសដៅការងារ​សម្រាប់​អនុវត្តនាពេលខាងមុខ។

សូមបញ្ជាក់ថា ពិព័រណ៍​វិទ្យាសាស្ត្រ ​បច្ចេកវិទ្យានិងនវានុវត្តន៍កម្ពុជាអន្តរជាតិលើកទី១ ឆ្នាំ២០២៣​ដែល​រៀបចំដោយក្រសួងឧស្សាហកម្មវិទ្យាសាស្ត្របច្ចេកវិទ្យា ​និងលោកនាអនុវត្តន៍កម្ពុជា​ជាលើក​ដំបូងនេះនឹងប្រារព្ធក្នុងរយៈពេល៣ថ្ងៃ គឺចាប់ពីថ្ងៃទី២៦រហូតដល់ថ្ងៃទី២៨ខែមីនា​ នៅ​មជ្ឈមណ្ឌលសន្និបាតនិងពិព័រណ៍កោះពេជ្រ៕