ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី បានថ្លែងថា ដើម្បីអនុវត្តគោនយោបាយ និងយុទ្ធសាស្រ្ដ លើវិស័យ «វិទ្យាសាស្ត្រ បច្ចេកវិទ្យា និងនវានុវត្តន៍» រាជរដ្ឋាភិបាលបានដាក់​ចេញនូវផែនទីបង្ហាញផ្លូវសំខាន់ៗមួយចំនួនដូជា ​ផែនទីបង្ហាញផ្លូវលើវិស័យ បច្ចេកវិទ្យាកសិកម្ម បច្ចេចកវិទ្យា អប់រំ និងបច្ចេកវិទ្យា សុខាភិបាលជាដើម។

សម្តេចតេជោ ហ៊ុន សែន បានមានប្រសាសន៍បែបនេះ ក្នុងឱកាស អញ្ជើញជាអធិបតីបើកវេទិកាជាតិ «វិទ្យាសាស្ត្រ បច្ចេកវិទ្យា និងនវានុវត្តន៍» លើកទី១ ឆ្នាំ២០២៣ នាព្រឹកថ្ងៃទី២៦ ខែមីនា ឆ្នាំ២០២៣នេះ នៅមជ្ឈមណ្ឌលសន្និបាត និងពិព័រណ៍កោះពេជ្រ។

សម្ដេចតេជោ បានថ្លែងថា ទិវាជាតិ «វិទ្យាសាស្ត្រ បច្ចេកវិទ្យា និងនវានុវត្តន៍» ដែលរៀបចំឡើង​ដោយក្រសួងឧស្សាហកម្ម វិទ្យាសាស្ត្រ បច្ចេកវិទ្យា ​និងនវានុវត្តន៍នាពេលនេះ បានរួមចំណែក​ក្នុងការរួមគ្នាអនុវត្តគោលនយោបាយ និងផែនទីបង្ហាញផ្លូវរបស់រាជរដ្ឋាភិបាល ដោយអនុលោម​តាមក្របខណ្ឌ គោលនយោបាយសេដ្ឋកិច្ច ​និងសង្គមឌីជីថលកម្ពុជាឆ្នាំ ២០២១-២០៣៥ និង​សម្រាប់ប្រទេសកម្ពុជាត្រៀមខ្លួនក្នុងការក្លាយជាប្រទេស ដែលមានចំណូលមធ្យមកម្រិតខ្ពស់​នៅឆ្នាំ២០៣០។

សម្តេចតេជោ ហ៊ុន សែន បញ្ជាក់ថា ផ្អែកតាមផែនការ និងយុទ្ធសាស្រ្ដ «វិទ្យាសាស្ត្រ បច្ចេកវិទ្យា និងនវានុវត្តន៍» របស់រាជរដ្ឋាភិបាល ​និងតាមរយៈក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ​ជាពិសេសក្រុមប្រឹក្សាជាតិ វិទ្យាសាស្ត្រ បច្ចេកវិទ្យា និងនវានុវត្តន៍ រាជរដ្ឋាភិបាល​បានដាក់ចេញនូវផែនទីបង្ហាញផ្លូវនូវបច្ចេកវិទ្យាអាទិភាពពាក់ព័ន្ធជាច្រើន ដែលបានដើរតួនា​ទី​ជាត្រីវិស័យ​សម្រាប់ក្រសួង ស្ថាប័នពាក់ព័ន្ធ ដៃគូអភិវឌ្ឍ សហគ្រាសឯកជន ​និងប្រជាជនកម្ពុជា ក្នុងការធ្វើផែនការឱ្យមានសគង្គតិភាព ​រៀបចំយុទ្ធសាស្រ្ដឱ្យគ្រប់ជ្រុងជ្រោយ ចាប់យកបច្ចេកវិទ្យា​ឱ្យបានត្រឹមត្រូវ និងអភិវឌ្ឍផលិតផលបច្ចេកវិទ្យាឱ្យបានសមស្របតាមតម្រូវ​ការជាក់ស្ដែងរបស់កម្ពុជា៕អត្ថបទ៖ វ៉ន ដារ៉ា