ចិន៖ កាលពីថ្ងៃព្រហស្បតិ៍ម្សិលមិញនេះ ចិនបានព្រមានសហរដ្ឋអាមេរិកប្រឆាំង នឹងមនោគមវិជ្ជាប្រជាធិបតេយ្យរបស់ពួកគេ ខណៈដែលទីក្រុងប៉េកាំងបានរិះគន់ចំពោះទណ្ឌកម្មសេដ្ឋកិច្ច និងចំណាត់ការយោធាពីក្រោយខ្នងរបស់ទីក្រុងវ៉ាស៊ីនតោន រយៈពេលប៉ុន្មានម៉ោងប៉ុណ្ណោះក្រោយសុន្ទរកថារបស់លោកប្រធានាធិបតី ចូ បៃដិន លើអាទិភាពភូមិសាស្ត្រនយោបាយអាមេរិក។
អនុសាសន៍បែបនេះបានកើតមានឡើង ក្រោយសុន្ទរកថាលើកដំបូងរបស់លោក បៃដិន មកកាន់សភា ដោយមេដឹកនាំសហរដ្ឋអាមេរិករូបនេះ ដាក់ការផ្តោតសំខាន់លើវិស័យការទូត និងការប្រកួតប្រជែងជាមួយចិន និងប្រទេសផ្សេងទៀតដើម្បីឈ្នះសតវត្សរ៍ទី២១។ លោក បៃដិន បាននិយាយថា ជនផ្តាច់ការគិតថា ប្រជាធិបតេយ្យមិនអាចប្រកួតប្រជែងបានឡើយ ហើយសហរដ្ឋអាមេរិកនឹងស្វាគមន៍ការប្រកួតប្រជែង ហើយមិនចង់មានជម្លោះនោះទេ។ ពាក់ព័ន្ធនឹងការលើកឡើងរបស់លោក បៃដិន, លោក វ៉ាង វិនប៊ីន អ្នកនាំពាក្យក្រសួងការបរទេសចិនបាននិយាយថា វាជារឿងធម្មតាកាលដែលសហរដ្ឋអាមេរិក និងចិនត្រូវប្រកួតប្រជែងគ្នាលើវិស័យមួយចំនួន។
លោកបាននិយាយប្រាប់សន្និសីទសារព័ត៌មានកាលពីថ្ងៃព្រហស្បតិ៍ថា ប៉ុន្តែការប្រកួតប្រជែងបែបនេះ គួរតែជាការរត់ប្រណាំងលើផ្លូវ និងលើទីលាន មិនមែនជាការប្រយុទ្ធតទល់រហូតដល់ស្លាប់ម្ខាងនោះទេ។ លោក វ៉ាង បានធ្វើការព្រមានផងដែរថា ការបង្ខំឲ្យប្រទេសដទៃទៀត ទទួលយកប្រព័ន្ធលទ្ធិប្រជាធិបតេយ្យរបស់ប្រទេសមួយទៀត នឹងធ្វើឲ្យមានការបែងចែក ធ្វើឲ្យភាពតានតឹងកើនឡើងកាន់តែខ្លាំង និងធ្វើឲ្យអន្តរាយដល់ស្ថិរភាព៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
