ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី បានលើកទឹកចិត្ត និងផ្ដល់អនុសាសន៍ ចំពោះការអភិវឌ្ឍមូលធនមនុស្ស លើមុខវិទ្យាវិទ្យាសាស្រ្ដ បច្ចេកវិទ្យា វិស្វកម្ម និងគណិតវិទ្យា តាមក្រសួង ស្ថាប័ន និងភាគីពាក់ព័ន្ធ ដើម្បីលើកកម្ពស់វិស័យវិទ្យាសាស្ត្រ បច្ចេកវិទ្យា និងនវានុវត្តន៍នៅក្នុងប្រទេសកម្ពុជា។

សម្តេចតេជោ ហ៊ុន សែន បានមានប្រសាសន៍បែបនេះ ក្នុងឱកាស អញ្ជើញជាអធិបតីបើក​វេទិកា​ជាតិ «វិទ្យាសាស្ត្រ បច្ចេកវិទ្យា និងនវានុវត្តន៍» លើកទី១ ឆ្នាំ២០២៣ នាព្រឹកថ្ងៃទី២៦​ ខែមីនា ឆ្នាំ២០២៣នេះ ​នៅមជ្ឈមណ្ឌលសន្និបាត​ និងពិព័រណ៍កោះពេជ្រ។

សម្តេចតេជោ ​បានបញ្ជាក់ថា រាជរដ្ឋាភិបាលកម្ពុជាចាត់ទុក​ ឌីជីថលូបណីយកម្ម ក្នុងវិស័យ​សាធារណៈ និងឯកជនជាការងារអាទិភាព ​ដើម្បីកសាងរដ្ឋាភិបាលឌីជីថល សេដ្ឋកិច្ចឌីជីថល សង្គមឌីជីល ​និងប្រជាជនឌីជីថល​ ស្របតាមនិន្នាការតំបន់ ​និងសាកល ដើម្បីលើកកម្ពស់សមិតកម្ម សង្គម សេដ្ឋកិច្ច។

សម្តេចតេជោ ហ៊ុន សែន បានអំពាវនាវដល់សហគមន៍ជាតិ ​និងអន្តរជាតិ ចូលរួមជាមួយរាជ​រដ្ឋាភិបាលកម្ពុជាក្នុងគ្រប់ដំណាក់កាលនៃបដិវត្តកម្មឌីជីថល ដូចមានគូសបញ្ជាក់យ៉ាងច្បាស់​នៅក្នុងក្របខណ្ឌគោលនយោបាយ សេដ្ឋកិច្ច និងសង្គមឌីជីថល ​២០២១-២០៣៥ និងគោលនយោបាយរដ្ឋាភិបាលឌីជីថល ២០២២-២០៣៥។

សម្តេចតេជោ បានរម្លឹកឡើងថា នៅក្នុងដំណាក់កាលនៃការរាតត្បាតជំងឺកូវីដ-១៩ ​ការកើនឡើង​កំដៅនៃការប្រកួតប្រជែងភូមិសាស្រ្ដនយោបាយ សង្គ្រាមពាណិជ្ជកម្ម និងការប្រែប្រួលអាកាសធាតុ សម្ដេចតេជោ ​បាន​សម្លឹងឃើញតួនាទីកាន់តែសំខាន់របស់ «វិទ្យាសាស្ត្រ បច្ចេកវិទ្យា ​និងនវានុវត្តន៍» នៅក្នុង​ការរក្សាចេរភាពនៃកំណើនសេដ្ឋកិច្ច ​និងជំរុញផ្លែផ្កានៃការអនុវត្តសង្គម សេដ្ឋកិច្ច ប្រកបដោយបរិយាបន្ន។

សម្តេចតេជោ បញ្ជាក់ថា រាជរដ្ឋាភិបាលបានដាក់ចេញនូវគោលនយោបាយ «វិទ្យាសាស្ត្រ បច្ចេកវិទ្យា និងនវានុវត្តន៍» ២០២០-២០៣០ ក្នុងគោលបំណង​កសាងនូវមូលដ្ឋានគ្រឹះសម្រាប់​ចាប់​យកលទ្ធផលវិទ្យាសាស្រ្ដ និងបច្ចេកវិទ្យា ​ក៏ដូចជា​សម្រាប់ចូលរួមក្នុងដំណាក់កាលបង្កើត​បច្ចេក​វិទ្យាថ្មី​ប្រកប​ដោយនវានុវត្តន៍នាពេលអនាគត៕ អត្ថបទ៖ វ៉ន ដារ៉ា