ត្បូងឃ្មុំ៖ ឯកឧត្តម វេង សាខុន មានប្រសាសន៍ថា សមិទ្ធផលថ្មីមួយទៀតក្នុងវិស័យពុទ្ធចក្រ អាចកើតចេញបាន ក៏ដោយសារប្រទេសយើងមានសុខសន្តិភាពពេញលេញ នៅទូទាំងប្រទេស ហើយសុខសន្តិភាពនេះ បង្កើតឡើងក៏ដោយសារគណបក្សប្រជាជនកម្ពុជា ​ដែលមាន​សម្តេចតេជោ ហ៊ុន សែន ជាប្រធាន។

ថ្លែងនៅថ្ងៃទី២៦ ខែមីនា ឆ្នាំ២០២៣ ក្នុងឱកាសឯកឧត្តម វេង សាខុន រដ្ឋមន្រ្តីប្រតិភូអមនាយក​រដ្ឋមន្រ្តី និងជាប្រធានក្រុមការងាររាជ​រដ្ឋាភិបាលចុះមូលដ្ឋាន ស្រុកតំបែរ ខេត្តត្បូងឃ្មុំ និង​ស្រុកកំពង់សៀម ខេត្តកំពង់ចាម បានអញ្ជើញជាអធិបតី ក្នុងពិធីបុណ្យឆ្លងឧបដ្ឋានសាលា និងសម្ពោធសមិទ្ធផលនានា នៅវត្តមង្គលគិរី ហៅវត្តដូនមាស ស្ថិតក្នុងភូមិដូនមាស ឃុំគោកស្រុក ស្រុកតំបែរ ខេត្តត្បូងឃ្មុំ។

ក្នុងឱកាសនោះឯកឧត្តមរដ្ឋមន្រ្តី បានពាំនាំនូវបណ្តាំផ្ញើសាកសួរសុខទុក្ខរបស់សម្តេចតេជោ នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ដែលសម្តេចទាំងពីរតែងតែគិតគូរ​ និងបារម្ភពីសុខទុក្ខ ជីវភាព ​និងស្ថានភាពរស់នៅរបស់ប្រជាពលរដ្ឋយើងគ្រប់ៗរូប។

ឯកឧត្តម បន្ថែមទៀតថា ពីអតីតកាលប្រទេសជាតិយើងឆ្លងកាត់ដំណាក់កាលដ៏សែនលំបាក ភ្លើង​សង្រ្គាមរាមរ៉ៃពេញផ្ទៃប្រទេស ​អសន្តិសុខស្បៀង ប្រជាពលរដ្ឋយើងប្រាថ្នានិងសង្ឃឹមចង់បាន​តែ​ភាព​សុខសន្តិភាព ​និងសិទ្ធិរស់រានមានជីវិតតែប៉ុណ្ណោះ។ ក្តីប្រាថ្នារបស់​ប្រជាពលរដ្ឋយើងត្រូវបាន​សម្រេចដោយសម្តេចតេជោ ​តាមរយៈថ្ងៃជ័យជំនះ ៧ មករា ឆ្នាំ១៩៧៩ និងនយោបាយឈ្នះ ឈ្នះ ដែលបង្កើតបានជាម្លប់នៃសុខសន្តិភាព ​ស្ថេរភាពសង្គម និងការអភិវឌ្ឍជាបន្តបន្ទាប់។

ឯកឧត្តម ​បានអំពាវនាវដល់ប្រជាពលរដ្ឋយើងទាំងអស់នៃឃុំគោកស្រុក ​និង​ទូទាំង​ស្រុកតំបែរ ខេត្តត្បូងឃ្មុំត្រូវបន្តគាំទ្រ​ និង​បោះឆ្នោតជូនគណបក្សប្រជាជនកម្ពុជា ​ដែល​មានសម្តេចតេជោហ៊ុន សែន ជាប្រធានគណបក្ស​ ក្នុងការបោះឆ្នោតជ្រើសតាំងតំណាងរាស្រ្ត ​នីតិកាលទី៧ នាថ្ងៃទី២៣ ខែកក្កដា ឆ្នាំ២០២៣ ខាងមុខនេះ កុំបីខានទាំងអស់គ្នា៕