ជនអន្ដោប្រវេសន៍ជាច្រើននាក់ កាលល្ងាចថ្ងៃសុក្រ បានតម្រង់ជួររងចាំការត្រួតពិនិត្យ បន្ទាប់ពី​ពួកគេ​បានឆ្លងចូលក្នុងប្រទេសកាណាដា ដោយចេញពីរដ្ឋញូយ៉កនៅចំណុច​ឆ្លងកាត់ក្រៅផ្លូវការ​មួយនៅផ្លូវ Roxham Road(រ៉ុកសាំ រ៉ូត) ខណៈសហរដ្ឋអាមេរិក និងប្រទេសកាណាដា សម្រេចបាន​កិច្ចព្រមព្រៀងមួយដែលមានគោលបំណងបញ្ឈប់អ្នកស្វែងរកសិទ្ធិជ្រកកោន តាមរយៈឆ្លងចូល​ព្រំដែន​ដីគោករួម តាមច្រកឆ្លងកាត់ក្រៅផ្លូវការ។

ជនអន្ដោប្រវេសន៍រាប់សិបនាក់ បានឆ្លងចូលក្នុងខេត្ដកេបិច ប្រទេសកាណាដា ដោយចេញ​ពីក្រុងChamplain (ឆាមផ្លេន)រដ្ឋញូយ៉ក ​កាលពីថ្ងៃសុក្រ ​សមត្ថកិច្ចកាណាដា បានបញ្ជាក់ប្រាប់​ពួកគេដដែលៗថា អ្នកនឹងត្រូវឃាត់ខ្លួន។

យោងតាមស្ថិតិរបស់រដ្ឋាភិបាលកាណាដា បានឱ្យដឹងថា ចំនួនដ៏ច្រើននៃអ្នកស្វែងរកសិទ្ធិជ្រកកោន​មិនទៀងទាត់ ​កំពុងមកដល់ប្រទេសកាណាដា ​ដោយឆ្លងកាត់​ផ្លូវរ៉ុកសាំ រ៉ូត ​និងតាមផ្លូវល្បប់តូចៗ​ដែលតភ្ជាប់ពីរដ្ឋញូយ៉ក មកខេត្ដកេបិច។ ពោលគឺជនអន្ដោប្រវេសន៍ជិត ៥.០០០នាក់ កាល​ពីខែមករា និង៤.៥០០នាក់ ​កាលពីខែកុម្ភៈ បានឆ្លងចូលក្នុងខេត្ដនេះ ​ដោយសុវត្ថិភាព។

សហរដ្ឋអាមេរិក ​និងប្រទេសកាណាដា ​បានកែប្រែកិច្ចព្រមព្រៀងជនភៀសខ្លួន ដែលមាន​អាយុកាល២​ទសវត្សរ៍ ​ជាផ្នែកមួយ​នៃការ​ប៉ុនប៉ង​របស់ពួកគេ ​ដើម្បីបន្ថយនូវលំហូរ​ដ៏​គំហុក​នៃអ្នកស្វែងរកសិទ្ធិជ្រកកោន​ ចូលក្នុងប្រទេសកាណដា​ តាមច្រកព្រំដែនឆ្លងកាត់ក្រៅផ្លូវការ។

អត្ថបទ៖ មករា