នាយករដ្ឋមន្ត្រីប្រទេសអ៊ីស្រាអែល លោក Benjamin Netanyahu កាលពីថ្ងៃអាទិត្យបានបណ្តេញរដ្ឋ មន្ត្រីការពារជាតិ លោក Yoav Gallant បន្ទាប់ពីលោកបាននិយាយថា រដ្ឋាភិបាលគួរតែពន្យារពេលឆ្ពោះទៅមុខដោយផែនការដែលមានការប្រឆាំងតវ៉ាខ្ពស់ ក្នុងការផ្លាស់ប្តូរប្រព័ន្ធតុលាការរបស់ប្រទេសនេះ។

ការិយាល័យនាយករដ្ឋមន្ត្រី បាននិយាយថា នាយករដ្ឋមន្ត្រី លោក Benjamin Netanyahu បានសម្រេចដកចេញពីតំណែងរដ្ឋមន្ត្រីការពារជាតិ លោក Yoav Gallant។ លោក Gallant ជាសមាជិកសភាមកពីគណបក្ស Likud ស្តាំនិយមរបស់លោក Netanyahu បានដើរចេញពីក្រុមរបស់ខ្លួនកាលពីថ្ងៃសៅរ៍ ដោយជំរុញជាសាធារណៈឱ្យលោក Netanyahu ផ្អាកច្បាប់នេះ។

លោកបាននិយាយថា ការតវ៉ានៅទូទាំងប្រទេសប្រឆាំងការផ្លាស់ប្តូរប្រព័ន្ធតុលាការ ដែលរួមមានទាំងការកើនឡើងចំនួនទាហានបម្រុង ក៏កំពុងធ្វើឲ្យប៉ះពាល់ដល់កងកម្លាំងប្រចាំ និងធ្វើឱ្យអន្តរាយដល់សន្តិសុខជាតិ។

ជាមួយគ្នានេះ ការតវ៉ាទ្រង់ទ្រាយធំបានផ្ទុះឡើងនៅទូទាំងប្រទេសអ៊ីស្រាអែល និងនៅទីក្រុងហ្សេរុយសាឡឹម​កាលពីថ្ងៃអាទិត្យ ទី២៦ ខែមីនាភ្លាមៗបន្ទាប់ពីនាយករដ្ឋ​មន្ត្រីអ៊ីស្រាអែល Benjamin Netanyahu បានប្រកាសថាលោកបានបណ្តេញរដ្ឋមន្ត្រីការពារជាតិ Yoav Gallant ចេញពីតំណែង។ នៅពេលដែលព័ត៌មាននៃការបណ្តេញចេញរដ្ឋមន្ត្រីការពារជាតិ ត្រូវបានផ្សព្វផ្សាយទូលំទូលាយ ក្រុមអ្នកតវ៉ារាប់ពាន់នាក់ បានគ្រវីទង់ជាតិអ៊ីស្រាអែលពណ៌ខៀវ និងស បានចេញធ្វើបាតុកម្មដើរតាមដងផ្លូវក្នុងទីក្រុង Tel Aviv និងទីក្រុងហ្សេរុយសាឡឹម។ នៅទីក្រុង Tel Aviv ក្រុមបាតុករបានប្រមូលផ្តុំគ្នាទៅកាន់ផ្លូវហាយវេ Ayalon របស់អ៊ីស្រាអែល ដោយបានបិទចរាចរណ៍ជាច្រើនម៉ោង និងដុតភ្លើងនៅតាមដងផ្លូវច្រើនគន្លងទាំងសងខាង។ នៅទីក្រុងហ្សេរុយសាឡឹម ក្រុមបាតុករបានប្រមូលផ្តុំគ្នានៅខាងក្រៅលំនៅឋានរបស់លោក Netanyahu នៅក្នុងក្រុងនេះ នៅចំណុចមួយដែលបានរំលោភលើបន្ទាត់ការពារ។