កូរ៉េខាងត្បូង៖ យោធាកូរ៉េខាងត្បូងបាននិយាយថា កូរ៉េខាងជើងបានបាញ់មីស៊ីលបាលីស្ទីកចំនួន ២គ្រាប់ចូលទៅក្នុងសមុទ្រ នៅជិតឆ្នេរសមុទ្រភាគខាងកើតរបស់ខ្លួននៅព្រឹកថ្ងៃចន្ទនេះ ដែលជាការបាញ់មីស៊ីលជាបន្តបន្ទាប់ចុងក្រោយ ក្នុងពេលមានសមយុទ្ធយោធាធ្វើឡើងដោយសហរដ្ឋអាមេរិក និងកូរ៉េខាងត្បូង។
យោងតាមប្រព័ន្ធផ្សព្វផ្សាយជប៉ុនបានរាយការណ៍ថា ឆ្មាំល្បាតឆ្នេររបស់ប្រទេសជប៉ុនបាននិយាយថា មីស៊ីល ២គ្រាប់ត្រូវបានគេជឿថា ជាមីស៊ីលដែលបាញ់ដោយកូរ៉េខាងជើងបានធ្លាក់ចូលទៅក្នុងទឹក ដែលទំនងជាបានធ្លាក់នៅខាងក្រៅតំបន់សេដ្ឋកិច្ចផ្តាច់មុខរបស់ប្រទេសជប៉ុន។ ប្រព័ន្ធផ្សព្វផ្សាយជប៉ុន NHK បានផ្សាយថា មីស៊ីលកូរ៉េខាងជើងបានហោះដល់រយៈកម្ពស់ ៥០គីឡូម៉ែត្រ និងហោះក្នុងចម្ងាយ ៣៥០គីឡូម៉ែត្រ។ យោធាកូរ៉េខាងត្បូងនិយាយថា មីស៊ីលត្រូវបានបាញ់ចេញពីខេត្តវ៉ាងហេខាងជើងនៅម៉ោង ៧:៤៧នាទីព្រឹកម៉ោងក្នុងតំបន់កាលពីថ្ងៃអាទិត្យ។ ការិយាល័យនាយករដ្ឋមន្ត្រីនិយាយថា នាយករដ្ឋមន្ត្រីជប៉ុនលោក Fumio Kishida បានបញ្ជាឱ្យមន្ត្រីជួបប្រជុំគ្នា និងវិភាគព័ត៌មានជុំវិញការបាញ់មីស៊ីល និងដើម្បីធានាបានសុវត្ថិភាពយន្តហោះ និងការធ្វើនាវាចរណ៍។
ការបាញ់នេះគឺជាការសាកល្បងអាវុធចុងក្រោយដោយកូរ៉េខាងជើង រួមមានទាំងការបាញ់មីស៊ីលស៊ីបគោលដៅជាច្រើនគ្រាប់កាលពីថ្ងៃពុធ ដែលទីក្រុងព្យុងយ៉ាងនិយាយថា មានគោលបំណងធ្វើលំហាត់សមការវាយប្រហារនុយក្លេអ៊ែរបែបយុទ្ធសាស្ត្រ។ កាលពីថ្ងៃសុក្រប្រទេសកូរ៉េខាងជើងបាននិយាយថា ខ្លួនបានសាកល្បងយានដ្រូនវាយប្រហារក្រោមទឹកមានសមត្ថភាពបំពាក់ក្បាលគ្រាប់នុយក្លេអ៊ែរ ខណៈមេដឹកនាំលោក គីម ជុងអ៊ុន បានព្រមានថា សមយុទ្ធយោធារួមគ្នាដោយប្រទេសកូរ៉េខាងត្បូង និងសហរដ្ឋអាមេរិកគួរតែបញ្ឈប់៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
