​អាមេរិក៖ ប្រធាន​សភា​សហរដ្ឋអាមេរិក​លោក Kevin McCarthy បាន​និយាយ​កាលពី​ថ្ងៃអាទិត្យ​ថា ស​ភា​នឹង​ចាត់វិធានការ​តាមច្បាប់​ ដើម្បី​ដោះស្រាយ​ក្ដីបារម្ភ​សន្តិសុខ​ជាតិ​ពាក់ព័ន្ធ​នឹង​បណ្ដាញ​សង្គម​កម្សាន្ត TikTok ដោយ​អះអាង​ថា ​រដ្ឋាភិបាល​ចិន​បាន​លួច​យក​ទិន្នន័យ​របស់​អ្នកប្រើប្រាស់​ពី ​App ​វីដេអូ​នេះ​។

​នៅ​សហរដ្ឋអាមេរិកចំនួន​អ្នក​អំពាវនាវ​ឲ្យ​ហាមប្រាម​ការប្រើប្រាស់​បណ្ដាញ​សង្គម TikTok គ្រប់​គ្រង​ដោយ​ក្រុមហ៊ុន បាយ តាន (ByteDance) ដែល​មាន​មូលដ្ឋាន​នៅ​ក្នុង​ប្រទេស​ចិន ឬ​អនុម័ត​ច្បាប់​ទេ្វភាគី ​ដើម្បី​ផ្ដល់​សិទ្ធិ​អំណាច​ផ្លូវច្បាប់​ឲ្យ​ទៅ​រដ្ឋបាល​របស់​លោក​ប្រធានាធិបតី Joe Biden ដើម្បី​ស្វែងរក​ការ​ហាម​ប្រាម​។ ឧបករណ៍​នានា​គ្រប់គ្រង​ដោយ​រដ្ឋបាល​សហរដ្ឋ​អាមេរិក​នៅ​ពេល​ថ្មីៗ​នេះ ត្រូវ​បាន​ហាមប្រាម​មិន​ឲ្យ​ដំឡើង App នេះ​ទេ​។ លោក McCarthy បាន​និយាយ​នៅ​លើ​បណ្ដាញ​សង្គម Twitter​ ថា សភា​នឹង​ចាត់វិធានការ​តាម​ផ្លូវ​ច្បាប់​ ដើម្បី​ការពារ​ប្រជាជន​អាមេរិក​ពី​មនោគមន៍​បច្ចេកវិទ្យា​របស់​បក្ស​កុម្មុយនិស្ត​ចិន​។

​គួរ​រម្លឹក​ថា ​នាយក​ប្រតិបត្តិ​ក្រុមហ៊ុន TikTok លោក Shou Zi Chew បាន​បង្ហាញ​ខ្លួន​នៅ​ចំពោះ​មុខ​គណៈកម្មការ​សភា​អាមេរិក​ប្រហែល ​៥​ម៉ោង​កាលពី​ថ្ងៃ​ព្រហស្បតិ៍​សប្ដាហ៍​មុន ហើយ​ក្រុម​អ្នក​នយោបាយ​មកពី​បក្ស​ទាំង​២ បាន​សាកសួរ​លោក​អំពី​សន្តិសុខ និង​ក្ដី​បារម្ភ​ផ្សេងទៀត​ទាក់ទង​នឹង App ដែល​មាន​អ្នកប្រើប្រាស់​អា​មេ​រិ​កប្រមាណ ​១៥០​លាន​នាក់​៕​

អត្ថបទ៖ សុខមាន