ភ្នំពេញ៖ ក្រសួងសុខាភិបាលប្រកាសនៅថ្ងៃនេះថា មនុស្ស ៧៦១នាក់បន្ថែមទៀត ត្រូវបានរកឃើញឆ្លងមេរោគកូវីដ-១៩ ខណៈអ្នកជាសះស្បើយថ្មីមានចំនួន ១៦៦នាក់បន្ថែមទៀត។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងសុខាភិបាលបញ្ជាក់ថា ករណីឆ្លងថ្មីដល់ទៅ ៧៦០នាក់ សុទ្ធតែពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ ហើយ ១ករណីទៀត គឺជាករណីនាំចូលដែលត្រូវបានរកឃើញលើបុរសជនជាតិខ្មែរធ្វើដំណើរវិលត្រឡប់មកពីប្រទេសម៉ាឡេស៊ីកាលពីថ្ងៃម្សិលមិញនេះ។
បើតាមក្រសួងសុខាភិបាល ករណីឆ្លងថ្មីពាក់ព័ន្ធនឹងព្រឹត្តិការណ៍សហគមន៍ ២០កុម្ភៈនោះ ត្រូវបានរកឃើញច្រើនបំផុតនៅរាជធានីភ្នំពេញមានចំនួនរហូតដល់ ៤០៨នាក់ និងមកខេត្តកណ្ដាលរកឃើញអ្នកឆ្លងថ្មី ១៤៤នាក់។
ក្រសួងឱ្យដឹងទៀតថា ខេត្តព្រះសីហនុរកឃើញអ្នកឆ្លងថ្មី ៨៣នាក់ទៀត បន្ទាប់មកខេត្តបន្ទាយមានជ័យរកឃើញអ្នកឆ្លងថ្មី ៦៧ ខណៈដែលខេត្តតាកែវ សៀមរាប និងខេត្តកំពង់ស្ពឺ រកឃើញអ្នកឆ្លងថ្មី ១៥នាក់ ១៤នាក់ និង ១៣នាក់បន្តបន្ទាប់គ្នា។
រីឯខេត្តកំពង់ចាមរកឃើញអ្នកឆ្លងថ្មី ៦នាក់ បន្ទាប់មកខេត្តត្បូងឃ្មុំរកឃើញអ្នកឆ្លងថ្មី ៥នាក់ ហើយខេត្តព្រៃវែង រកឃើញអ្នកឆ្លងថ្មី ៣នាក់ទៀត ខណៈដែលខេត្តកំពង់ធំ និងខេត្តកោះកុង រកឃើញអ្នកឆ្លងថ្មីត្រឹមតែ ១នាក់ប៉ុណ្ណោះក្នុងខេត្តនីមួយៗ។
សម្តេចពិជ័យសេនា ទៀ បាញ៉ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នៅព្រឹកថ្ងៃទី ៣០ ខែមេសានេះ បានអញ្ជើញជាអធិបតីភាពក្នុងពិធី បើកយុទ្ធនាការចាក់វ៉ាក់សាំងបង្ការជំងឺកូវីដ១៩ ទ្រង់ទ្រាយធំដល់ប្រជាពលរដ្ឋ នៅភូមិសាស្ត្រតំបន់ក្រហមក្នុងរាជធានីភ្នំពេញ។
គិតត្រឹមថ្ងៃនេះ កម្ពុជារកឃើញមនុស្សសរុបរហូតដល់ ១៣ ៤០២នាក់ហើយបានឆ្លងមេរោគកូវីដ-១៩នៅទូទាំងប្រទេសគិតចាប់តាំងពីកម្ពុជារកឃើញករណីឆ្លងដំបូងកាលពីចុងខែមករាឆ្នាំ២០២០កន្លងមក ក្នុងនោះអ្នកឆ្លងដល់ទៅ ១២ ៨៥០នាក់ ឬខ្ទង់ ៩៦ភាគរយ សុទ្ធតែពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ។
ទន្ទឹមគ្នានេះ ក្រសួងសុខាភិបាលបានប្រកាសឱ្យដឹងផងដែរថា អ្នកជំងឺកូវីដ-១៩សរុបដល់ទៅ ៥ ១៥២នាក់ហើយ ត្រូវបានព្យាបាលជាសះស្បើយ ក្នុងនោះមានទាំងអ្នកជាសះស្បើយថ្មី ១៦៦នាក់ទៀត ដែលក្រសួងប្រកាសនៅថ្ងៃនេះផងដែរ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
