អេស្ប៉ាញ៖ ក្រុមមន្ត្រីបានប្រាប់ក្រុមអ្នកទេសចរទៅឈរមើលអគ្គិភ័យ ឱ្យនៅឆ្ងាយពីអណ្តាតភ្លើងដែលកំពុងឆាបឆេះនៅភាគខាងកើតប្រទេសអេស្ប៉ាញកាលពីថ្ងៃអាទិត្យ ដោយនិយាយថា អ្នកឈរមើលកំពុងធ្វើឱ្យខ្លួនឯងមានគ្រោះថ្នាក់ និងរំខានដល់កិច្ចខិតខំប្រឹងប្រែងដើម្បីពន្លត់អណ្តាតភ្លើង។
អង្គភាពសេវាសង្គ្រោះបន្ទាន់បាននិយាយថា អ្នកពន្លត់អគ្គិភ័យជាង ៥០០នាក់ដែលមានជំនួយពីយន្តហោះ និងឧទ្ធម្ភាគចក្រ ២០គ្រឿងកំពុងប្រយុទ្ធនឹងភ្លើងឆេះព្រៃរយៈពេល ៤ថ្ងៃបន្ទាប់ពីវាបានឆេះនៅជិតភូមិ Villanueva de Viver ក្នុងតំបន់ Valencia។ លោក Gabriela Bravo ប្រធានផ្នែកកិច្ចការផ្ទៃក្នុងនៅក្នុងតំបន់ Valencia បាននិយាយថា នគរបាលបានប្រទះឃើញអ្នកជិះកង់ចំនួន ១៤នាក់នៅក្បែរកន្លែងកើតហេតុដែលព្យាយាមចូលទៅមើលឱ្យកាន់តែជិត។ យើងបានស្នើម្តងហើយម្តងទៀតដល់ភ្ញៀវទេសចរទាំងអស់ កុំឱ្យយកចំហេះព្រៃធ្វើជាវិស័យទេសចរណ៍ កុំឲ្យចូលទៅជិតតំបន់ដែលងាយកើតមានអគ្គិភ័យ។ ក្រុមមន្ត្រីនិយាយថា ភ្លើងឆេះព្រៃដ៏ធំលើកទី១ ប្រចាំឆ្នាំរបស់ប្រទេសអេស្ប៉ាញបានបំផ្លាញព្រៃឈើជាង ៤,០០០ហិកតា និងបានបង្ខំអ្នកភូមិ ១,៧០០នាក់ឱ្យចាកចេញពីលំនៅឋានរបស់ពួកគេនៅក្នុងតំបន់ Valencia និងតំបន់ Aragon។ អាជ្ញាធរបាននិយាយថា ពលរដ្ឋប្រមាណ ២០០នាក់មកពីភូមិ Teruel នៃតំបន់ Aragon ត្រូវបានអនុញ្ញាតឱ្យត្រឡប់ទៅលំនៅឋានវិញកាលពីថ្ងៃអាទិត្យ។
ការិយាល័យរបស់នាយករដ្ឋមន្ត្រីនិយាយថា នាយករដ្ឋមន្ត្រីអេស្ប៉ាញលោក Pedro Sanchez បានកំណត់ពេលចុះពិនិត្យតំបន់ភ្លើងឆេះព្រៃនៅថ្ងៃចន្ទនេះ។ ពលរដ្ឋនិយាយថា ភ្លើងព្រៃអាចបំផ្លាញយ៉ាងធ្ងន់ធ្ងរដល់សេដ្ឋកិច្ចក្នុងតំបន់ ដែលពឹងផ្អែកលើវិស័យទេសចរណ៍។ រដូវរងាស្ងួតហួតហែងខុសប្រក្រតីនៅទូទាំងតំបន់ជាច្រើននៅអឺរ៉ុបភាគខាងត្បូង បានបង្កើនការព្រួយបារម្ភថា អាចនឹងកើតមានដូចមុននូវភ្លើងឆេះព្រៃដ៏មហន្តរាយកាលពីឆ្នាំមុន។ កាលពីឆ្នាំមុន ផ្ទៃដីប្រហែល ៧៨៥,០០០ហិកតាត្រូវបានបំផ្លាញនៅក្នុងទ្វីបអឺរ៉ុប ច្រើនជាងទ្វេដងនៃចំនួនមធ្យមប្រចាំឆ្នាំសម្រាប់រយៈពេល ១៦ឆ្នាំចុងក្រោយនេះ ដោយផ្អែកលើស្ថិតិរបស់គណៈកម្មការអឺរ៉ុប។ យោងតាមប្រព័ន្ធផ្សព្វផ្សាយព័ត៌មានអំពីភ្លើងឆេះព្រៃរបស់សហភាពអឺរ៉ុបបានឲ្យដឹងថា នៅក្នុងប្រទេសអេស្ប៉ាញអគ្គិភ័យ ៤៩៣លើកបានបំផ្លាញផ្ទៃដីចំនួន ៣០៧,០០០ហិកតាកាលពីឆ្នាំមុន៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
