កំពង់ចាម៖ ឯកឧត្តម ម៉ឹង មករា បានអះអាងថា ឯកឧត្តមបណ្ឌិត ហ៊ុន ម៉ាណែត ជាកុលបុត្រ​ដ៏ឆ្នើមរបស់​ប្រទេស​ជាតិ ​ពោរពេញដោយចំណេះដឹងខ្ពង់ខ្ពស់ ​មានទេពកោសល្យជាអ្នក​ដឹកនាំ​ដោយគំរូ ភាព​ប៉ិនប្រសព្វពីកំណើត ​និងសមត្ថភាពពេញលេញ ​ដែលបានដឹកនាំ​អភិវឌ្ឍន៍​ស្ថាប័នជាតិ ក្នុងនោះ​រួមមាន ការបង្កើតអង្គភាពប្រឆាំងភេរវកម្ម ​ និងការកែទម្រង់ប្រព័ន្ធគ្រប់​គ្រង់ក្នុងជួរកង​ខេមរភូមិន្ទ ធ្វើឲ្យវិស័យការពារជាតិមានភាពរឹងមាំ ​និងមានប្រសិទ្ធិភាពខ្ពស់។

ថ្លែងនៅទី២៦ ខែមីនា ម្សិលមិញនេះ ឯកឧត្តមបណ្ឌិត ម៉ឹង មករា ប្រធានក្រុមការងារជនបង្គោលចុះជួយ ស្រុកជើងព្រៃ ខេត្តកំពង់ចាម តំណាងដ៏ខ្ពង់ខ្ពស់ ឯកឧត្តមបណ្ឌិត ហ៊ុន ម៉ាណែត សមាជិកអចិន្ត្រៃយ៍គណបក្ស និងជាប្រធានយុវជនគណបក្ស​ប្រជាជន​កម្ពុជា ក្នុងឱកាសអញ្ជើញជួបសំណេះសំណាល និងការប្រមាញ់អ្នកមាន​ទេពកោសល្យ ដែលមានប្រជាពលរដ្ឋចូលរួមជាង ១ពាន់នាក់ ក្នុងឃុំសំពងជ័យ ស្រុកជើងព្រៃ។

ក្នុងពិធីនោះដែរ ឯកឧត្តមបណ្ឌិត ម៉ឹង មករា បានថ្លែងបន្ដថា "អ្វីៗអាចសម្រេចទៅបាន ​គឺមកពីកត្តាមនុស្សជាចម្បង មនុស្សជាអ្នកគិត មនុស្សជាអ្នកធ្វើ ​បើយើងមានធនធានមនុស្ស ប្រទេសជាតិយើងនឹង​មាន​សុខសន្តិភាព និងការអភិវឌ្ឍរីកចម្រើន"។

ជាមួយគ្នានេះដែរ ឯកឧត្តម បានពាំនាំការសួរសុខទុក្ខ និងការនឹករលឹកពី ឯកឧត្តមបណ្ឌិត ហ៊ុន ម៉ាណែត ជូនចំពោះប្រជាពលរដ្ឋទាំងអស់ ដែលមានវត្តមានក្នុងកម្មវិធីនេះ។

ឯកឧត្តមបណ្ឌិត ម៉ឹង មករា ក៏បានសំណេះសំណាល និងពន្យល់ដល់ប្រជាពលរដ្ឋ អំពីសារសំខាន់នៃការចូលរួមជីវភាព​ជាមួយគណបក្សប្រជាជនកម្ពុជា​ ដែលជាគណបក្សធំជាងគេ មានសមាជិកច្រើនជាងគេ មាន​គោលនយោបាយច្បាស់លាស់ និងមានសក្តានុពលភាពជាងគេ ក្នុងការគ្រប់គ្រង ដឹកនាំ និងកសាង​ប្រទេសជាតិ ឱ្យមានសុខសន្តិភាព ​និងការអភិវឌ្ឍជានិរន្ត។ ជោគវាសនាដ៏ល្អនៃប្រទេសកម្ពុជា ដែលទទួលបានជាងបួនទសវត្សរ៍កន្លងមកនេះ ក៏ដោយសារ ឧត្តមភាពរបស់គណបក្សប្រជាជន ដែលមានវីរៈជនដ៏​ឆ្នើមជាច្រើនរូប ដែលបានធ្វើ​ពលិកម្ម​គ្រប់សព្វ​បែបយ៉ាង ដើម្បីបុព្វហេតុជាតិ​មាតុភូមិ ជាពិសេសសម្ដេចអគ្គមហាសេនាបតីតេជោ ហ៊ុន សែន ជាស្នូលដឹកនាំ ជាសសរទ្រូង​ដ៏រឹងមាំរបស់គណបក្សប្រជាជនកម្ពុជា បានដឹកនាំប្រទេស​ប្រកបដោយ​គតិបណ្ឌិត ភាពឈ្លាសវៃ និងភាអង់អាច ​សម្រេចបានជោគជ័យដ៏ត្រចះត្រចង់បំផុតជូនជាតិមាតុភូមិ និងប្រជាជន។

ក្នុងឱកាសនោះដែរ ក៏មានការចាក់បញ្ចាំងវីដេអូឯកសារ ស្តីពី "ឧត្តមភាពរបស់សម្តេចតេជោ និង ឯកឧត្តមបណ្ឌិត ហ៊ុន ម៉ាណែត" ដោយបង្ហាញអំពីមហាវីរភាពរបស់ សម្តេចតេជោ ក្នុងការ​យកជីវិតទៅប្តូរ តស៊ូ ដើម្បីរំដោះជាតិ ពីរបបប្រល័យពូជសាសន៍ ប៉ុល ពត ការកសាង​ប្រទេសជាតិ​ពីបាតដៃទទេរ រហូតមានការអភិវឌ្ឍរីកចម្រើនដល់សព្វថ្ងៃ និងជាពិសេសបាននាំយក​សន្តិភាព​ពេញលេញ ជូនជាតិនឹងប្រជាពលរដ្ឋ តាមរយៈគោលនយោបាន ឈ្នះ-ឈ្នះ ធ្វើឲ្យមានឯកភាពជាតិ ឯកភាពទឹកដីទាំងមូល។

នាថ្ងៃនោះដែរ ឯកឧត្តមបណ្ឌិត ម៉ឹង មករា ក៏បានចុះត្រួតពិនិត្យកសិដ្ឋានសហគមន៍​កសិករ​សែនជ័យ នឹងបានលើកទឹកចិត្តឱ្យប្រជាកសិករចូលរួមធ្វើផលិតកម្មកសិកម្មជាមួយ "សហគមន៍​កសិករសែនជ័យ" ដែលក្រុមការងារជនបង្គោលបានរៀបចំឡើង​ក្រោមការចង្អុលបង្ហាញផ្ទាល់ពី ឯកឧត្តមបណ្ឌិត ហ៊ុន ម៉ាណែត​ ក្នុងគោលបំណងរួមចំណែកអភិវឌ្ឍវិស័យកសិកម្ម ដែលជា​សសរស្ដម្ភ​មួយនៃខឿនសេដ្ឋកិច្ចជាតិ​ ក្នុងការរួមចំណែកអភិវឌ្ឍន៍​ប្រទេសជាតិ និងកាត់​បន្ថយភាពក្រីក្រ៕