កោះកុង ៖ មន្ទីរពេទ្យបង្អែកខេត្តកោះកុង លែងមានអ្នកជំងឺកូវីឌ១៩ហើយ ក្រោយពីក្រុមគ្រូពេទ្យតាមដានពិនិត្យ និងព្យាបាល​ជាសះស្បើយ​អស់រួចរាល់ ចាប់តាំងពីផ្ទុះកូវីដក្នុងព្រឹត្តិការណ៍ ២០ កុម្ភៈ មកទល់ពេលនេះ។

ពុំមានអ្នកជំងឺកូវីឌ១៩ទៀតទេ ដែលនឹងត្រូវព្យាបាលនៅក្នុងមន្ទីរពេទ្យបង្អែកខេត្តកោះកុង គិតត្រឹមរសៀលថ្ងៃទី៣០ ខែមេសា ២០២១ ដោយ​ក្រុមអ្នកជំងឺកូវីឌទាំងនោះ បានជាសះស្បើយ ព្រមទាំងអនុញ្ញាតឱ្យពួកគេវិលត្រឡប់ទៅលំនៅដ្ឋាន និងទីកន្លែងធ្វើការវិញជាបន្តបន្ទាប់។

នេះបើតាមការបញ្ជាក់របស់លោកវេជ្ជបណ្ឌិត ហៃ ឡៃសុន ប្រធានមន្ទីរពេទ្យបង្អែកខេត្តកោះ កុង រសៀលថ្ងៃទី៣០ មេសា។ លោកវេជ្ជបណ្ឌិត លើកឡើងដែរថា តាំងពីផ្ទុះជំងឺកូវីឌ១៩ក្នុងព្រឹត្តការណ៍២០ កុម្ភៈ មក​គឺ​មន្ទីរពេទ្យ​របស់​លោក​បាន​ទទួល​អ្នកជំងឺកូវីឌ២៦នាក់ មានជនជាតិខ្មែរ៩ ជនជាតិចិន១៦នាក់ និងជនជាតិសង្ហិបូរី១នាក់។

លោកហៃ ឡៃសុន អះអាងទៀតថា ក្រុមអ្នកជំងឺកូវីឌ១៩ទាំងនោះ សុទ្ធតែទទួលបានការយកចិត្តទុកដាក់ខ្ពស់លើការពិនិត្យ និងព្យាបាលជំងឺជូន​ពួកគេតាមក្បូនវេជ្ជសាស្រ្ត ពុំមាននរណាម្នាក់ស្លាប់ដោយសារជំងឺដ៏កាចសាហាវនេះទេ។ ដូច្នេះ គិតត្រឹមល្ងាចថ្ងៃទី៣០ មេសា នេះ គឺលែង​មានអ្នកជំងឺកូវីឌព្យាបាលហើយដែរ។

ទោះយ៉ាងណា លោកវេជ្ជបណ្ឌិត បន្តទាមទារឱ្យអ្នកជំងឺកូវីដ១៩ដែលជាសះស្បើយ​ត្រូវ​ថែរក្សា​អនាម័យ​តាម​ការ​ណែនាំ​របស់​រាជរដ្ឋាភិបាល និង​ក្រសួងសុខាភិបាល ដោយអនុវត្តយ៉ាងខ្ជាប់ ខ្ជួននូវវិធានការ៣កុំ និង៣ការពារ។

ដោយឡែកឯកឧត្តមវេជ្ជបណ្ឌិត ទៅ ម៉ឹង ប្រធានមន្ទីរសុខាភិបាលខេត្តកោះកុងវិញទទួលស្គាល់ថា មន្ទីរពេទ្យខេត្តកោះកុង និងមន្ទីរពេទ្យបង្អែក​ស្រុកស្រែអំបិល ពិតជាលែងមានអ្នកជំងឺកូវីឌ១៩ព្យាបាលមែន ក៏ប៉ុន្តែសម្រាប់មណ្ឌលសុខភាពភ្ញីមាស ស្រុកគិរីសាគរ នៅមានអ្នក​ជំងឺកូវីដ​ចំនួន៩នាក់/ស្រី២នាក់ជាជនជាតិចិនកំពុងសម្រាកព្យាបាល ។ ក្នុងចំណោមអ្នកជំងឺ៩នាក់នោះ មានម្នាក់ជំងឺរើវិញ។

គួរ​​ជម្រាប​ថា មន្ទីរពេទ្យបង្អែកខត្តកោះកុង នឹងទទួលតែអ្នកជំងឺកូវីដ១៩ណាដែលមានអាការៈធ្ងន់ធ្ងរប៉ុណ្ណោះ ករណីស្ថានភាពជំងឺស្រាល អាជ្ញាធរខេត្ត និងមន្ទីរសុខាភិបាល តម្រូវឱ្យព្យាបាលនៅមណ្ឌលសុខភាពភ្ញីមាស ស្រុកគិរីសាគរ និងមន្ទីរពេទ្យបង្អែកស្រុកស្រែអំបិល៕អត្ថបទ ៖ មករា