ត្បូងឃ្មុំ៖ ឯកឧត្តម ហ៊ុន ម៉ាណែត បានអំពាវនាវឲ្យអាជ្ញាធរចាប់ឃាត់ខ្លួនភ្លាមៗ​ចំពោះជនទាំងឡាយណា​ ដែលតាំងខ្លួនជាជំនួយការ​ និងយកឈ្មោះឯកឧត្តម ទៅបោកប្រាស់គេ និង​គំរាមកំហែង​គេ ខណៈករណីបែបនេះបានកើតឡើងយូរមកហើយពីសំណាក់ជនខិលខូច និងជនឱកាសនិយមទាំងនោះ។

តាមរយៈវិដេអូឃ្លីប នាឱកាសតំណាងសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងពិធីបើកការដ្ឋានសាងសង់ផ្លូវបេតុងចំនួន ២ខ្សែ ប្រវែងប្រមាណ ៣២ គ.ម និងពិធីកាត់​ឫសសីមា និងសម្ពោធឆ្លងសមិទ្ធផលនានា នៅវត្តឥន្ទរិទ្ធី (ហៅវត្តបារាយណ៍) ស្ថិតក្នុងភូមិបារាយណ៍ ឃុំឈូកស្រុកក្រូចឆ្មារ ខេត្តត្បូងឃ្មុំ នាថ្ងៃទី២៦ ខែមីនា ឆ្នាំ២០២៣នេះ ឯកឧត្តម ហ៊ុន ម៉ាណែត បានលើកឡើងថា បញ្ហាមួយដែលបានកើតឡើងជារឿយៗ ជាច្រើនឆ្នាំ​មកហើយ គឺការឆ្លៀតឱកាសប្រើប្រាស់ឈ្មោះរបស់​ឥស្សរជនសំខាន់ៗ ក្នុងនោះរួមទាំង​ឯកឧត្តមផងដែរ ​ពីសំណាក់បុគ្គលមួយចំនួន ​ដើម្បីប្រព្រឹត្តិនូវអំពើមិនល្អ ដែលពេលខ្លះធ្វើឲ្យ​ប៉ះពាល់យ៉ាងធ្ងន់ធ្ងរ​ទៅលើសិទ្ធិ និងផលប្រយោជន៍របស់ប្រជាពលរដ្ឋដ៏ទៃទៀត។

ជាមួយគ្នានោះដែរ ឯកឧត្តម ហ៊ុន ម៉ាណែត ក៏បានលើកឡើងផងដែរថា​ នាពេលបច្ចុប្បន្ននេះ ឯកឧត្តម​បានកំពុងខិតខំយ៉ាងសកម្ម​ក្នុងកិច្ចការសង្គម និងប្រទេសជាតិរហូតដល់មិនមានពេល​វេលា​គ្រប់គ្រាន់​នឹងជួបប្រពន្ធកូនផង តែបែរជាមានជនខិលខូចទាំងនោះ​យកឈ្មោះ​ឯកឧត្តមទៅ​ធ្វើនេះ​ធ្វើនោះដោយខុសច្បាប់ទៅវិញ។​

ឯកឧត្តម បានបញ្ជាក់ថា «ខំសន្សំបុណ្យបានបន្តិចៗ ស្រាប់តែគេយកមកធ្វើ​កំពប់​ចោល​ទាំងអស់!៕

អត្ថបទ៖ បាន ចក់