​អង់គ្លេស៖ សវនាការ​លើកដំបូង​នៅ​ក្នុង​បណ្ដឹង​ដែល​នាំមក​ដោយ​ព្រះអង្គម្ចាស់ Harry, តារា​ចម្រៀង​លោក Elton John និង​ឥស្សរជន​ខ្ពស់​ផ្សេងទៀត​ប្រឆាំង​នឹង​សារព័ត៌មាន Daily Mail ជុំវិញ​ការ​ចោទ​ប្រកាន់​ថា ​បាន​លួច​ស្ដាប់​ទូរស័ព្ទ និង​ការរំលោភ​ឯកជន​ភាព​ផ្សេងទៀត​នឹង​ត្រូវ​ចាប់ផ្ដើម​នៅ​ថ្ងៃ​ចន្ទ​នេះ​។

​ម្ចាស់​បណ្ដឹង​ទាំង​ ៧​រូប​ដែល​រួមមាន​តារា​សម្តែង​នាង Elizabeth Hurley និង​នាង​ Sadie Frost និង​ស្វាមី​របស់​តារា​ចម្រៀង ​Elton John និង​ផលិតករ​ភាពយន្ត David Furnish បាន​ចាប់ផ្ដើម​ដាក់ពាក្យ​បណ្ដឹង​ទាំង​នេះ​កាលពី​ឆ្នាំមុន ប៉ុន្តែ​ការ​រឹតត្បិត​ផ្លូវច្បាប់​ដែល​ស្នើ​ដោយ​ក្រុម​កាសែត​ មានន័យថា​ព័ត៌មាន​លម្អិត​ជាក់លាក់​នៃ​ការចោទប្រកាន់​របស់​ពួកគេ មិនទាន់​ត្រូវ​បាន​ផ្សព្វផ្សាយ​ជា​សាធារណៈ​នៅ​ឡើយ​ទេ​។ ​យោង​តាម​សេចក្ដីថ្លែងការណ៍​ដែល​បាន​ចេញ​ផ្សាយ​កាលពី​ខែតុលា​ ដោយ​មេធាវី​របស់​នាង ​Frost និង​ព្រះអង្គម្ចាស់ ​Harry ​ដែល​ជា​បុត្រា​ពៅ​របស់​ព្រះមហាក្សត្រ​ Charles ​ទី​៣ រឿង​ក្តី​ប្រឆាំង​នឹង​កាសែត Associated Newspapers រួមមាន​ការ​ហៅ​ទូរស័ព្ទ​របស់​មនុស្ស​ដែល​បាន​បំពាក់​ឧបករណ៍​ថត​សំឡេង រឿង​ក្តី​រថយន្ត និង​ផ្ទះសម្បែង និង​ការ​បង់​ប្រាក់​ឲ្យ​នគរបាល​សម្រាប់​យក​ព័ត៌មាន​រសើប​។

​កាសែត ​Associated Newspapers ជា​សារព័ត៌មាន​របស់ Daily Mail ដែល​ជា​កាសែត​សម្រាប់​ការ​ចុះ​ផ្សាយ​ព័ត៌មាន​ថ្ងៃអាទិត្យ និង Online បាន​និយាយ​ថា ខ្លួន​បដិសេធ​ទាំងស្រុង និង​មិន​ច្បាស់លាស់​ចំពោះ​ការចោទប្រកាន់​នេះ​។​ ខ្លួន​កំពុង​ស្វះស្វែង​ចូលរួម​សវនាការ​រយៈពេល​ ៤​ថ្ងៃ​ក្នុង​សប្តាហ៍​នេះនៅ​ឯ​តុលាការ​កំពូល​នៃ​ទីក្រុង​ឡុង​ដ៍ ដើម្បី​ច្រានចោល​សំណុំរឿង​ទាំងនេះ៕

អត្ថបទ៖ សុខមាន