​មី​យ៉ាន់​ម៉ា៖ មេដឹកនាំ​របប​សឹក​មី​យ៉ាន់​ម៉ា​លោក Min Aung Hlaing នៅ​ថ្ងៃ​ចន្ទ ទី​២៧ ខែមីនា​នេះ​បាន​និយាយ​ថា វិធានការ​ស្របច្បាប់​នឹង​ត្រូវ​ធ្វើឡើង​ប្រឆាំង​កងកម្លាំង​ប្រឆាំង​ជា ​«​ភេរ​វករ​» ក្នុង​អំឡុង​ពេល​ថ្លែង​សុន្ទរកថា​នៅ​ក្នុង​ទិវា​កងកម្លាំងប្រដាប់អាវុធ ដើម្បី​ប្រារព្ធ​ខួប​លើក​ទី៧៨ នៃ​ការ​បង្កើត​កង​ទ័ព​ជាតិ​របស់​ខ្លួន​។

យោធា​ដែល​គេ​ស្គាល់​ថា Tatmadaw បាន​ប្រារព្ធ​ព្យុហយាត្រា​កងទ័ព​ និង​សព្វាវុធ​ក្នុង​រដ្ឋធានី​ណៃ ពិដោ សម្រាប់​ឆ្នាំ​ទី​៣ ចាប់​តាំង​ពី​ការ​ផ្ដួលរំលំ​រដ្ឋាភិបាល​ជាប់ឆ្នោត​របស់​លោក​ស្រី អ៊ុង សាន ស៊ូ​ជី កាលពី​ថ្ងៃ​ទី​១ ខែកុម្ភៈ ឆ្នាំ​២០២១​។​ លោក Min Aung Hlaing បាន​និយាយ​នៅ​ក្នុង​សុន្ទរកថា​របស់​លោក ដោយ​ជំរុញ​សហគមន៍​អន្តរជាតិ​ធ្វើការ​ជាមួយ​រដ្ឋាភិបាល​យោធា​ ដែល​កំពុង​កាន់​អំណាច​របស់​មី​យ៉ាម៉ា​ថា លោក​សូម​រំលឹក​ថា ​វិធានការ​ស្របច្បាប់​នឹង​ត្រូវ​បាន​ធ្វើ​ឡើង​យ៉ាង​ម៉ឺងម៉ាត់​ ប្រឆាំង​រដ្ឋាភិបាល​រួបរួម​ជាតិ​របស់​សហភាព​មី​យ៉ាន់​ម៉ា​ (NUG) និង​អង្គការ​ភេរវ​និយម ព្រមទាំង​អង្គការ​ប្រដាប់​អាវុធ​ជនជាតិភាគតិច​ (EAOs) ដែល​កំពុង​គាំទ្រ​អំពើ​ភេរវកម្ម​។ ក្រសួង​រតនាគារ​សហរដ្ឋ​អាមេរិក​និយាយ​ថា ទន្ទឹម​នឹង​នេះ​កាលពី​ថ្ងៃ​សុក្រ​សហរដ្ឋអាមេរិក បាន​ប្រកាស​ដាក់ទណ្ឌកម្ម​បន្ថែម​ទៀត​លើ​សហភាព​មី​យ៉ាន់​ម៉ា ដោយ​ផ្តោត​លើ​ការ​ផ្គត់ផ្គង់​ប្រេងឥន្ធនៈ​យន្តហោះ​ដល់​យោធា​មី​យ៉ាន់​ម៉ា បន្ទាប់ពី​ការវាយប្រហារ​តាម​អាកាស​នៅ​ក្នុង​តំបន់​ដែល​មាន​ជន​ស៊ីវិល​រស់នៅ​ច្រើន​៕

អត្ថបទ៖ ប៊ុនថន