ភ្នំពេញ៖ រដ្ឋាភិបាលជប៉ុន នៅថ្ងៃទី២៧ ខែមីនា ឆ្នាំ២០២៣នេះ ​បានសម្រេចដាក់ប្រើប្រាស់ផ្លូវការ ប្រព័ន្ធ​ទិដ្ឋាការ​អេឡិចត្រូនិច Japan E-VISA System ​ដើម្បីបង្កើនភាពងាយស្រួលការធ្វើទិដ្ឋាការស្នាក់​នៅ និង​ធ្វើដំណើរ​កម្សាន្ត​ដល់ភ្ញៀវទេសចរកម្ពុជា​ ទៅប្រទេសជប៉ុន​ ក៏ដូចជាការជំរុញទេសចរជប៉ុន​មក​ទស្សនាកម្ពុជាវិញផងដែរ។

ប្រធាន​សមាគមអ្នក​ដំណើរទេសចរណ៍អាស៊ីប៉ាស៊ីភិចប្រចាំនៅកម្ពុជា ​លោក ធួន ស៊ីណាន ថ្លែង​ប្រាប់ BTV នៅថ្ងៃទី២៧ ខែមីនានេះថា ប្រទេសកម្ពុជា​បាន​បើក​ធ្វើ​ទិដ្ឋាការ​តាមប្រព័ន្ធអនឡាញ E-VISA ​ នេះដល់បណ្តាប្រទេសជាច្រើន​នៅលើពិភពលោកដែលចង់មកទស្សនាកម្ពុជា។ ​ដោយឡែក បច្ចុប្បន្ន​មិនទាន់​មានប្រទេសច្រើនទេដែលបានផ្តល់​ E-VISA ដល់ទេសចរកម្ពុជា។

លោកថ្លែងថា ​នៅក្រោយបរិបទកូវីដ-១៩ ​បណ្តាប្រទេសជាច្រើន ​បានផ្តើមអនុវត្តគោលនយោបាយ E-VISA ​ដើម្បីទាក់ទាញភ្ញៀវ​ទេសចរអន្តរជាតិឡើងវិញ ​ហើយការដាក់ដំណើការ E-VISA របស់រដ្ឋាភិបាល​ជប៉ុន​ដល់ទេសចរកម្ពុជា​នឹងជំរុញកំណើន​ទេសចរណ៍​រវាងប្រទេសទាំងពីរផងដែរ។

លោកស្រី ឆាយ សៀវលីន ​ប្រធានសមាគមទីភ្នាក់ទេសចរណ៍កម្ពុជា ​CATA ថ្លែងដែរថា នេះជាលើក​ដំបូង​ដែលរដ្ឋាភិបាលជប៉ុន ​បានដាក់ដំណើការ E-VISA ​ដល់ទេសចរកម្ពុជា​ គឺ​បានផ្ដល់ភាពងាយ​ស្រួល​ថែមទៀតដល់ទេសចរកម្ពុជា ​ក្នុងការស្នើសុំ​ទិដ្ឋាការ​ទៅទស្សនា​នៅប្រទេសជប៉ុន។

ឯកឧត្តម​ តុប សុភ័ក រដ្ឋលេខាធិការ ​និងជាអ្នកនាំពាក្យ​ក្រសួង​ទេសចរណ៍ថ្លែងថា ចាប់ពី​ថ្ងៃនេះ​តទៅ​ទេសចរកម្ពុជា​អាចសុំទិដ្ឋាការ​ទៅប្រទេសជប៉ុន ​តាមប្រព័ន្ធអនឡាញ ​មានសុពលភាព៩០ថ្ងៃ។ ដោយឡែកទេសចរជប៉ុន ​និងទេសចរប្រទេសផ្សេងទៀត​ ក៏អាចសុំទិដ្ឋាការមកកម្ពុជា​តាមប្រព័ន្ធ​អនឡាញ​នេះបានដូចគ្នាដែរ៕ អត្ថបទ ស៊ុម សុខជា