អាហ្វានីស្ថាន ៖ រៀងរាល់ថ្ងៃ នាង Sofia បានចូលប្រើប្រាស់ប្រព័ន្ធ Online ពីលំនៅឋាននៅទីក្រុង Kabul របស់​នាង​សម្រាប់​វគ្គសិក្សាភាសាអង់គ្លេស ដំណើរការដោយវិទ្យាស្ថានអប់រំ​មួយក្នុង​ចំណោមវិទ្យាន​មួយចំនួនដែល​កំពុងរីក​ចម្រើន ដោយកំពុងព្យាយាមឲ្យបានទៅដល់ក្មេងស្រី និងស្ត្រីអាហ្វហ្គានីស្ថាន ដែលមិនអាចទៅសាលារៀន និង​បន្តការសិក្សារបស់ពួកគេបាន ដោយសារតែវិធានការរឹតត្បិតរបស់រដ្ឋាភិបាលក្រុមតាលីបង់។ មន្ត្រីតាលីបង់ ដែលលើកឡើង​ពីអ្វីដែលពួកគេចាត់ទុកថាបញ្ហាជាច្រើន រួមមានទាំងបញ្ហាទាក់ទងនឹង​ការស្លៀកពាក់​តាមសាសនា​អ៊ីស្លាម បានបិទសាលារៀនថ្នាក់វិទ្យាល័យរបស់ក្មេងស្រី ដាក់បម្រាមការចូលរៀននៅសាកលវិទ្យាល័យ និង​បញ្ឈប់​ស្ត្រីភាគច្រើនមិនឲ្យបម្រើការងារ។ ក្មេងស្រី និងស្ត្រីដែលអស់សង្ឃឹមក្នុងការទទួលបានការសិក្សាអប់រំ ចាប់តាំង​ពីពេលនោះមក បានសម្រុករៀនតាមប្រព័ន្ធ Online ដូចជាថ្នាក់រៀនរបស់នាង Sofia ដែរ គឺបណ្តាញ Rumi Academy ដោយមានកម្មវិធីជាច្រើន។ សាលារៀននិយាយថា ខ្លួនបានមើលឃើញការចុះឈ្មោះចូលរៀនភាគច្រើនជាស្ត្រី កើនឡើងពីសិស្សប្រហែល ៥០ នាក់ ដល់ជាង ៥០០នាក់ បន្ទាប់ពីក្រុមតាលីបង់បានចូលគ្រប់គ្រងក្នុងឆ្នាំ ២០២១ ។

សាលានិយាយថា ពួកគេបានបដិសេធអ្នកពាក្យស្នើសុំរាប់រយនាក់បន្ថែមទៀយ។ ដោយ៩៧ ភាគរយនៃប្រទេសនេះ រស់នៅក្រោមបន្ទាត់នៃភាពក្រីក្រ មនុស្សជាច្រើនពុំអាចមានលទ្ធភាពទិញកុំព្យូទ័រយួរដៃ កញ្ចប់អ៊ីនធឺណិត និង​តម្រូវការផ្សេងទៀតសម្រាប់ថ្នាក់រៀនតាមអនឡាញនោះទេ។ សាលារៀន មិនអាចពង្រីកបានកាន់តែច្រើននោះទេ ដោយ​សារពុំមានការផ្តល់មូលនិធិដើម្បីដាក់គ្រូបង្រៀនបន្ថែម លើបញ្ជីប្រាក់បៀវត្សរ៍ និងផ្តល់ឱ្យពួកគេ​នូវ​ហេដ្ឋារចនាសម្ព័ន្ធonline​ ឲ្យបានគ្រប់គ្រាន់ ដែលអាចឱ្យពួកគេបង្រៀនបាន។

ក្រុមតាលីបង់ពុំមានវិធានការដាក់បម្រាមលើអ៊ីនធឺណេតនោះទេ ហើយមន្ត្រីរបស់ខ្លួនជា​ទៀងទាត់ប្រើប្រាស់​ប្រព័ន្ធ​ផ្សព្វផ្សាយសង្គមដោយធ្វើការប្រកាសផ្សេងៗ។ ពួកគេក៏បានអនុញ្ញាតឱ្យក្មេងស្រីរៀននៅផ្ទះតាម Online ផងដែរ។ ប៉ុន្តែក៏ដូចជាអ្នកដទៃទៀតដែរនៅក្នុងប្រទេសអាហ្វហ្គានីស្ថាន ដែលប្រើអ៊ីនធឺ ណិត សិស្សសិក្សាតាម Online ត្រូវបានរំខានដោយសារការដាច់ភ្លើង និងល្បឿនអ៊ីនធឺណិតយឺតខ្លាំង។