កំពង់ស្ពឺ ៖ លោកវេជ្ជបណ្ឌិត សាយ ឫទ្ធី អនុប្រធានក្រុមការងារចុះជួយស្រុកឱរ៉ាល់ និង​ជាប្រធាន​ក្រុមការងារ​ចុះជួយឃុំតាសាល តំណាងឯកឧត្តម លេង ផាលី រដ្ឋលេខាធិការក្រសួងផែនការ និងជាអនុប្រធានទី១ ក្រុមការងារចុះជួយស្រុកឱរ៉ាល់ ខេត្តកំពង់ស្ពឺ ​ទទួលបន្ទុក៤ឃុំ កាលពីថ្ងៃទី២៦ ខែមីនា ឆ្នាំ២០២៣ បាន​អញ្ជើញប្រកាសបញ្ចូលសមាជិក សមាជិកាគណបបក្សប្រជាជនកម្ពុជាថ្មី នៃឃុំតាសាល ចំនួន២៦៦នាក់។

ពិធីប្រកាសបញ្ចូលសមាជិកបក្សថ្មីនេះ មានការចូលរួមពីលោក ចែម សារីម ប្រធានគណបក្សប្រជាជនកម្ពុជា

ស្រុកឱរ៉ាល់ លោក សួស ថុល អនុប្រធានក្រុមការងារចុះជួយមូលដ្ឋានឃុំតាសាល តំណាងឯកឧត្តម សុខ ភា ប្រធានក្រុមការងារគណបក្សប្រជាជនកម្ពុជា ស្រុកឱរ៉ាល់។

លោកវេជ្ជបណ្ឌិត សាយ ឫទ្ធី បានថ្លែងថា គណបក្សប្រជាជនកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា បាននាំមកនូវសន្តិភាព ស្ថិរភាព វិបុលភាព និងការអភិវឌ្ឍ​ប្រកបដោយ​មោទកភាព និងមោទនភាពជាតិជាបន្តបន្ទាប់ និងសូមនាំយកបណ្តាំផ្ញើសួរសុខទុក្ខរបស់សម្តេចតេជោ និង​សម្តេចកិតិ្តព្រឹទ្ធបណ្ឌិត ដល់អង្គពិធីទាំងមូល ដែលនេះបានបង្ហាញយ៉ាងច្បាស់ថា សម្តេចទាំងទ្វេរ តែងតែ​យក​ចិត្តទុកដាក់ជាប់ជាប្រចាំចំពោះសុខទុក្ខរបស់ប្រជាពលរដ្ឋគ្រប់ស្រទាប់វណ្ណៈ និយាយជារួម ជាពិសេស​ប្រជាពលរដ្ឋ​ដែលជួបការលំបាក ដូចពាក្យមួយឃ្លា "ទីណាមានទុក្ខ ទីនោះមានមុខសម្តេចតេជោ" ឬ "ទីណាមានទុក្ខ ទីនោះ​មានមុខគណបក្សប្រជាជនកម្ពុជា"។ គ្មានអ្វីដែលល្អឥតខ្ចោះនោះទេ ហើយគណបក្សប្រជាជនកម្ពុជា ក៏មិនល្អ​ឥតខ្ចោះដែរ ប៉ុន្តែគ្មានគណបក្សណា ដែលល្អជាងគណបក្សប្រជាជនកម្ពុជានោះទេ។ ចំណុចលេចធ្លោបំផុតរបស់គណបក្សប្រជាជនកម្ពុជា គឺការគិតគូរវែងឆ្ងាយជូនប្រជាជន និងប្រទេសជាតិជាចម្បង ទោះក្នុងប្រព័ន្ធ ឬក្រៅប្រព័ន្ធ វាគ្រាន់តែជានិយមន័យនៃភាសាសេដ្ឋកិច្ច ដើម្បីកំណត់ និងធ្វើឱ្យ​ប្រាកដ​ក្នុងការ​គ្រប់គ្រង​ប៉ុណ្ណោះ។ សម្រាប់គណបក្សប្រជាជនកម្ពុជា បងប្អូនខ្មែរទាំងអស់ គឺជាកូនៗរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាអគ្គមគ្គុទេសក៍អច្ឆរិយ ជាសម្តេចបិតាសន្តិភាព និងការអភិវឌ្ឍ។ គណបក្សប្រជាជនកម្ពុជា តែងតែធ្វើអ្វីៗគ្រប់បែបយ៉ាងដើម្បីដោះស្រាយបញ្ហាប្រឈមទាំងឡាយជូនប្រជាជន

ប្រកបដោយភក្ដីភាព និងការទទួលខុសខ្ពស់គ្រប់កាលៈទេសៈ ពោលគឺមិនដែលរត់ចោលប្រជាជនម្តងណាឡើយ។ រាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា បានផ្តល់នូវការគាំពារ និងការគាំទ្រដល់ផ្នែក​សេដ្ឋកិច្ច​ក្រៅប្រព័ន្ធ រួមមាន៖ ១. ជីវភាពសុខសាន្តក្នុងសុខសន្តិភាព, ២. សន្តិសុខ សុវត្ថិភាព ស្ថិរភាពសង្គម ស្ថិរភាពម៉ាក្រូសេដ្ឋកិច្ច និងសិទ្ធិសេរីភាពប្រកបរបបគ្រប់ប្រភេទអាជីវកម្មស្របច្បាប់ រួមទាំងការអនុគ្រោះ​លើការចំណាយដើម្បី​បំពេញអនុលោមភាព, ៣. ឱកាសសិក្សា និងបណ្តុះបណ្តាលវិជ្ជាជីវៈ, ៤. ការផ្តល់ប័ណ្ណមូលនិធិសមធម៌សុខាភិបាល, ៥. ការគាំពារផ្នែកច្បាប់ និងការពង្រឹងអភិបាលកិច្ចល្អ ដើម្បីបង្កើនប្រសិទ្ធភាព នៃសេវាសាធារណៈ និង៦. ការលើកទឹកចិត្តឱ្យចូលរួមក្របខ័ណ្ឌសេដ្ឋកិច្ចក្នុងប្រព័ន្ធតាមរយៈការរៀបចំយន្តការចុះបញ្ជី និងការអនុគ្រោះផ្សេងៗ ដើម្បីផ្តល់ភាពស្របច្បាប់ និងអត្ថប្រយោជន៍ជាច្រើនផ្សេងទៀតផងដែរ, ៦.គោលនយោបាយសាមគ្គីភាព គឺដើម្បីការពារសុខសន្តិភាព ហើយការបោះឆ្នោតជូនគណបក្សប្រជាជនកម្ពុជា គឺជាលទ្ធផលដែលផ្តល់​នូវកាលានុវត្តភាពយ៉ាងទូលំទូលាយសម្រាប់ពលរដ្ឋគ្រប់រូបដែលធានាបាននូវភាពថ្កើងថ្កាន​​សុខសាន្តគ្រប់​សម័យកាល។ លោកវេជ្ជបណ្ឌិត សាយ ឫទ្ធី សូមអំណរគុណ និងការកោតសរសើរ​ដល់យុវជនគណបក្សប្រជាជន​កម្ពុជគ្រប់រូប ចំពោះជំនឿទុកចិត្ត និងការបោះឆ្នោតជូនគណបក្សប្រជាជនកម្ពុជា៕ អត្ថបទ រដ្ឋា