​ភ្នំពញ៖ មន្ត្រីជាន់ខ្ពស់ក្រសួងការងារ និងបណ្តុះបណ្តាលវិជ្ជាជីវៈ បានណែនាំដល់ម្ចាស់រោងចក្រ សហគ្រាស ត្រូវយកចិត្តទុកដាក់ចំពោះអគ្គិភ័យនៅកន្លែងធ្វើការ ដើម្បីចៀសវាងនូវការខូចខាតទ្រព្យសម្បត្តិ ប៉ះពាល់ដល់ដំណើរការអាជីវកម្ម និងអាយុជីវិតមនុស្ស។

ឯកឧត្តម ហ៊ុយ ហានសុង រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ នៅក្នុងពិធីបើកសិក្ខាសាលាផ្សព្វផ្សាយមូលដ្ឋានគ្រឹះសុវត្ថិភាព និងសុខភាពការងារដល់ក្រុមការងារសុវត្ថិភាព និងសុ ខភាពការងារប្រចាំរោងចក្រ សហគ្រាស កាលពីព្រឹកថ្ងៃទី២៧មីនា ឆ្នាំ២០២៣នេះ បានមានប្រសាសន៍ថា ក្រុមការងារសុវត្ថិភាព និងសុខភាពការងារ ដើរតួនាទីយ៉ាងសំខាន់ នៅក្នុងយន្តការចុងក្រោយនៃប្រព័ន្ធគ្រប់គ្រងសុវត្ថិភាព និងសុខភាពការងារនៅរោងចក្រ សហគ្រាស និងចូលរួមលើកកម្ពស់លក្ខខណ្ឌការងារឱ្យកាន់តែប្រសើរឡើងនៅកន្លែងធ្វើការ។

ឯកឧត្តម បានបន្តថា ដើម្បីបង្ការគ្រោះថ្នាក់ដោយអគ្គីភ័យវិធានការត្រួតពិនិត្យឱ្យបានហ្មត់ចត់ទៅលើអគ្គិសនី និងការងារផ្សាពិតជាមានសារៈសំខាន់ណាស់ ប្រសិនបើមានការធ្វេសប្រហែសដោយសារសកម្មភាពរបស់មនុស្ស និងស្ថានភាពនៅកន្លែងធ្វើការដែលមិនមានសុវត្ថិភាព ព្រោះវាអាចបណ្តាលឱ្យប៉ះពាល់ដល់អាយុជីវិតខូចខាតទ្រព្យសម្បត្តិ និងដំណើរការអាជីវកម្ម។

ឯកឧត្តម ក៏បានណែនាំដល់ម្ចាស់រោងចក្រ សហគ្រាស ត្រូវយកចិត្តទុកដាក់ត្រួតពិនិត្យនិងធ្វើតេស្តសា កល្បងប្រព័ន្ធនិងឧបករណ៍ការពារអគ្គិភ័យជាប្រចាំជាអាទិ៍ បំពង់ពន្លត់អគ្គិភ័យ ប្រព័ន្ធបាញ់ទឹកដោយស្វ័យប្រវត្តិ ប្រព័ន្ធទុយោបាញ់ទឹកពន្លត់អគ្គិភ័យ កណ្តឹងប្រកាសអាសន្ន ឧបករណ៍ចាប់ផ្សែង និងភ្លើងបំភ្លឺដោយស្វ័យប្រវត្តិនៅពេលដាច់ចរន្តអគ្គិសនី។ ត្រួតពិនិត្យច្រកអាសន្នដែលអាចចេញដោយសុវត្ថិភាព គ្មានឧបសគ្គ និងមិនចាក់សោរ ព្រមទាំងមានភ្លើងបំភ្លឺដោយស្វ័យប្រវត្តិនៅពេលដាច់ចរន្តអគ្គិសនី។ រៀបចំឱ្យមានការឆ្លើយតបនៅពេលមានអាសន្ន ជាពិសេសចំពោះសហគ្រាស គ្រឹះស្ថានដែលប្រើប្រាស់សារធាតុងាយឆាបឆេះ និងរក្សាទុកដាក់សារធាតុទាំងនោះ ឱ្យនៅដាច់ដោយឡែក និងបង្កើនកា រត្រួតពិនិត្យជាប្រចាំនូវបណ្តាញផ្គត់ផ្គង់ចរន្តអគ្គិសនី ដែលជាមូលហេតុឱ្យមានអគ្គិភ័យកើតឡើងជាយ ថាហេតុនៅកន្លែងធ្វើការ។

ពាក់ព័ន្ធការរៀបចំសិក្ខាសាលានេះ ឯកឧត្តម ឡេង តុង ប្រធាននាយកដ្ឋានពេទ្យការងារ បានបញ្ជាក់ថា ក្នុងគោលបំណង ដើម្បីផ្សព្វផ្សាយ និងលើកកម្ពស់ការយល់ដឹងស្តីពីសុវត្ថិភាព និងសុខភាពការងារ ដោយផ្តោតជាសំខាន់លើសុវត្ថិភាពអគ្គិភ័យ អគ្គិសនី និងការងារផ្សារ ដល់តំណាងក្រុមការងារសុវត្ថិភាព និងសុខភាពការងារប្រចាំរោងចក្រ សហគ្រាស៕​អត្ថបទដោយ ឈិត បូរ៉ាវី