ភ្នំពេញ: ក្រុមហ៊ុនសាជីវកម្មស្ពាន និងថ្នល់ចិន (CRBC) នឹងចាប់ផ្ដើមដំណើរការសិក្សាគម្រោងសាងសង់ផ្លូវល្បឿនលឿនភ្នំពេញ-សៀមរាប នាពេលឆាប់ៗនេះ។ ជាមួយគ្នានេះដែរ យោងតាមលិខិតរបស់ក្រសួងសាធារណការ និងដឹកជញ្ជូន ចេញថ្ងៃទី២៤ ខែមីនា ឆ្នាំ២០២៣ បានស្នើអភិបាលក្រុង/ខេត្តដែលស្ថិតនៅលើតម្រាយផ្លូវជួយសហការគាំទ្រដល់ដំណើរការសិក្សាលើគម្រោងផ្លូវល្បឿនលឿន ភ្នំពេញ-សៀមរាប នេះផង។

ក្រុង/ខេត្តដែលជាប់នឹងផ្លូវល្បឿនលឿន ភ្នំពេញ-សៀមរាប រួមមាន៖ ក្រុងភ្នំពេញ, ខេត្តកណ្ដាល, ខេត្តកំពង់ចាម, ខេត្តកំពង់ធំ, និងខេត្តសៀមរាប។

ផ្លូវល្បឿនលឿន ភ្នំពេញ-សៀមរាប គឺជាគម្រោងផ្លូវល្បឿនលឿនទី៣ នៅកម្ពុជា បន្ទាប់ពីផ្លូវល្បឿនលឿនទី១ ភ្នំពេញ-ព្រះសីហនុ ទើបនឹងបើកដំណើរការ នៅពីចុងឆ្នាំ២០២២ ចំណែកផ្លូវល្បឿនលឿនទី២ ភ្នំពេញ-បាវិត គ្រោងនឹងបើកការដ្ឋានសាងសង់នៅពាក់កណ្ដាលឆ្នាំ២០២៣ខាងមុខនេះ៕