ភ្នំពេញ៖ព្រះរាជាណាចក្រកម្ពុជា ទទួលបានវ៉ាក់សាំងបង្ការជំងឺកូវីដ-១៩ ប្រភេទPfizer បន្ថែមទៀត ចំនួន ៤៩៨.០០០ដូសជាងពីសហរដ្ឋអាមេរិក តាមរយៈយន្តការកូវ៉ាក់ (COVAX Facility) នាយប់ថ្ងៃទី២៧ ខែមីនា ឆ្នាំ២០២៣នេះ គិតមកដល់ពេលនេះ កម្ពុជាទទួលបានវ៉ាក់សាងសរុបចំនួនជាង ៥០លានដូស។

នេះបើការបញ្ជាក់របស់លោកជំទាវ វេជ្ជបណ្ឌិត យក់ សម្បតិ្ត រដ្ឋលេខាធិការប្រចាំការ ក្រសួងសុខាភិបាល ក្នុងពិធីទទួលបានវ៉ាក់សាំងបង្ការជំងឺកូវីដ-១៩ ដោយមានចូលរួមពីតំណាងអង្គការយូនីសេហ្វ(UNICEF) ជាអ្នកសម្របសម្រួល។

លោកជំទាវ រដ្ឋលេខាធិការ បន្តថា ក្នុងចំនួនវ៉ាក់សាំង ៥លាន ៥សែនដូស ដែលមជ្ឈមណ្ឌលកូវ៉ាក់ បានសន្យាឲ្យមកកម្ពុជាថែមទៀត។ ប៉ុន្តែចំពោះមុខនេះ ក្រោមការសម្រេចដ៏ខ្ពង់ខ្ពស់បំផុតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត លោក បានអនុញ្ញាតឲ្យទទួលជាបណ្តើរៗ តាមដំណាក់កាលៗ ហើយនៅយប់នេះ យើងក៏បានទទួលវ៉ាក់សាំងកូវីដ-១៩ ប្រភេទ Pfizer ពី COVAX Facility ចំនួន ៤៩៨.០០០ដូសជាង។ រហូតមកដល់ពេលនេះ ទាំងវ៉ាក់សាំងជំនួយ និងវ៉ាក់សាំងទិញ សរុបចំនួន ៥៤លាន៥សែនដូស បូករួមទាំងវ៉ាក់សាំងដែលកម្ពុជា ទទួលបាននាយប់នេះ (សរុបទាំងអស់ ៥៩លាន ៥សែនដូស)។ ដោយឡែកវ៉ាក់សាំងដែលទទួលបាននាយប់នេះ គឺមិនទុកយូរនោះទេ ក្រុមការងាររបស់ក្រសួងសុខាភិបាល បានធ្វើការបែងចែកទុកជាមុនរួចហើយ និងបញ្ជូនទៅគ្រប់ខេត្ត និងរក្សាទុកមួយចំនួននៅថ្នាក់កណ្តាល ដើម្បីចាក់វ៉ាក់សាំងដូសជំរុញ។

លោកជំទាវ វេជ្ជបណ្ឌិត បន្ថែមទៀតថា ក្រុមការងារគ្រូពេទ្យទូទាំងរាជធានី-ខេត្ត នៅតែបន្តចាក់វ៉ាក់សាំងបង្ការជំងឺកូវីដ-១៩ ជូនបងប្អូនប្រជាពលរដ្ឋ ក្មេង ចាស់ ប្រុស ស្រី ជារៀងរាល់ថ្ងៃ មិនដែលខាននោះទេ គឺក្រុមគ្រូពេទ្យចាក់វ៉ាក់សាំងគ្រប់ទីតាំងទាំងអស់ ជាពិសេសអ្នកដែលមិនទាន់ចាក់វ៉ាក់សាំងដូសទី៣ ជំរុញឲ្យគាត់ទៅចាក់វ៉ាក់សាំងដូសទី៣ ហើយអ្នកណាដែលមិនទាន់ចាក់វ៉ាក់សាំងដូសទី៤ គឺមន្រី្តយើងជំរុញឲ្យគាត់មកចាក់វ៉ាក់សាំងជាបន្តបន្ទាប់ គ្រប់ថ្ងៃទាំងអស់មិនដែលអាក់ខាននោះទេ ហើយគ្រូពេទ្យយើងក៏មិនមានពេលសម្រាកផងដែរ ធ្វើយ៉ាងណាឲ្យបងប្អូនប្រជាពលរដ្ឋ ទទួលបានវ៉ាក់សាំងគ្រប់ៗគ្នាទាំងដូសមូលដ្ឋាន ដូសជំរុញ ដើម្បីឲ្យសរីរាង្គគាត់មានប្រព័ន្ធការពារ ជៀសផុតពីការឆ្លង ជាពិសេសកម្ពុជា ដោយសារមានវ៉ាក់សាំងកូវីដ-១៩នេះហើយ ដែលយើងអាចជម្នះនៃការឆ្លង សព្វថ្ងៃនេះ យើងអត់មានករណីស្លាប់ទេ ហើយយើងក៏មិនមានការឆ្លងកូវីដ-១៩ គំហុកដូចនាពេលកន្លងមកដែល។

លោកជំទាវ វេជ្ជបណ្ឌិត យក់ សម្បតិ្ត បានបញ្ជាក់ទៀតថា នាឱកាសបុណ្យចូលឆ្នាំថ្មី ប្រពៃណីជាតិ ឆ្នាំថោះ និងមកដល់នាពេលខាងមុខនេះ ក្នុងពិធីបុណ្យចូលឆ្នាំនឹងមានការប្រគុំតន្រី្ត និងការជួបជុំគ្នានៅតាមរមណីយដ្ឋាន និងមានបងប្អូនប្រជាពលរដ្ឋដើរលេងកម្សាន្តច្រើន។

ដូច្នេះលោកជំទាវ គិតថា៣កុំ ៣ការពារ នៅតែជាប្រធានបទសំខាន់ នៅតែជារូបមន្តសំខាន់របស់កម្ពុជាយើង កុំភ្លេចឲ្យសោះ។ ហើយនៅពេលដែលមានការជួបជុំ ២០០០នាក់ ទៅ៣០០០នាក់ នៅពេលធ្វើតេស្ត គឺអវិជ្ជមានកូវីដ-១៩ទាំងអស់។ ដូច្នេះក្នុងនាមក្រសួងសុខាភិបាល សូមអំពាវនាវដល់ប្រជាពលរដ្ឋគ្រប់រូប ដែលអញ្ជើញដើរលេងកម្សាន្ត សុំឲ្យឧស្សាហលាងដៃ ហើយបើជួបជុំគ្នាច្រើន នៅទីកន្លែងបិទ ជិតសុំពាក់ម៉ាស់ខ្លះៗទៅ និងសុំឲ្យមានការប្រុងប្រយ័ត្នចំពោះកុមារតូចៗផងដែរ ព្រោះថានៅខែមេសា និងខែឧសភាខាងមុខនេះ ជួនកាលមានភ្លៀងកក់ខែ។ ដូច្នេះជៀសវាងការកើតជំងឺគ្រុនឈាម៕ អត្ថបទ៖ រដ្ឋា