​អ៊ីស្រាអែល៖ នាយករដ្ឋមន្ត្រី​អ៊ីស្រាអែល​លោក Benjamin Netanyahu កាលពី​ថ្ងៃ​ចន្ទ​បាន​ពន្យារពេល​សេចក្តី​សម្រេច​លើ​ផែនការ​ ដែល​មាន​ការ​ប្រឆាំង​ដ៏​ខ្លាំងក្លា​សម្រាប់​ការ​ផ្លាស់ប្តូរ​ប្រព័ន្ធ​តុលាការ​ ក្នុង​ពេល​មានការ​ព្រួយបារម្ភ​ថា​ វិបត្តិ​ជាតិ​ដ៏​អាក្រក់​បំផុត​របស់​អ៊ីស្រាអែល​ក្នុង​រយៈពេល​ច្រើន​ឆ្នាំ អាច​បំបែក​សម្ព័ន្ធភាព​របស់​លោក ឬ​ធ្វើ​ឲ្យ​អំពើ​ហិង្សា​កាន់តែ​រីកធំឡើង​។

គេ​នៅ​មិន​ច្បាស់​នោះ​ទេ​ថា ​តើ​ការ​ពន្យារពេល​នៃ​សេចក្តី​ស្នើ​ច្បាប់​យូរ​ប៉ុនណា​ ទម្រាំ​ដល់​សម័យប្រជុំ​សភា​ថ្មី​នៅ​ខែក្រោយ បន្ទាប់ពី​ការ​តវ៉ា​ទ្រង់ទ្រាយ​ធំ​ និង​កូដកម្ម​ការងារ​ដែល​កំពុង​កើន​ឡើង​នឹង​តម្រូវ​ចិត្ត​ភាគី​ណាមួយ ឬ​ធ្វើ​ឱ្យ​វិបត្តិ​នេះ​កាន់​តែ​ធូរស្រាល ដែល​មេបញ្ជាការ​កងទ័ព​និយាយ​កាលពី​ថ្ងៃ​ចន្ទ​ថា បាន​ធ្វើ​ឱ្យ​ពេលវេលា​នេះ​ខុស​ពី​ពេល​មុនៗ​។ ដៃគូ​ចម្រុះ​ស្តាំនិយម​របស់​លោក Netanyahu គឺ​រដ្ឋមន្ត្រី​សន្តិសុខ​លោក Itamar Ben-Gvir បាន​និយាយ​ថា លោក​បាន​ព្រមព្រៀង​ចំពោះ​ការ​ពន្យារ​ពេល​នេះ ជា​ថ្នូរ​នឹង​កិច្ចព្រមព្រៀង​ដែល​លោក​អាច​បង្កើត​ឆ្មាំ​ជាតិ ​នៅ​ក្រោម​ឱវាទ​ក្រសួង​របស់​លោក​។ ផែនការ​របស់​រដ្ឋាភិបាល​ក្នុង​ការ​រឹត​បន្តឹង​ការគ្រប់គ្រង​របស់​សភា លើ​ដំណើរការ​តុលាការ​បាន​បង្ក​ឱ្យ​មាន​ការ​តវ៉ា​ទ្រង់ទ្រាយ​ធំ​បំផុត​មួយ​ចំនួន ​នៅ​ក្នុង​ប្រវត្តិសាស្ត្រ​ប្រទេស​អ៊ីស្រាអែល ដោយ​ក្រុម​ប្រឆាំង​បាន​ចាត់​ទុក​ទង្វើ​នេះ​ថា ​ជា​ការ​គំរាមកំហែង​ដល់​លទ្ធិប្រជាធិបតេយ្យ​។

ការសម្រេចចិត្ត​របស់លោក Netanyahu ក្នុង​ការ​លុបចោល​ច្បាប់​នេះ​ក៏បាន​ធ្វើឡើង​ បន្ទាប់ពី​មានការ​ប្រឆាំង​ពី​សហជីព Histadrut បាន​ផ្អាក​ជើង​ហោះហើរ​នៅ​អាកាសយានដ្ឋាន Ben Gurion រួម​ជាមួយ​កំពង់ផែ​សមុទ្រ ធនាគារ មន្ទីរពេទ្យ និង​សេវា​វេជ្ជសាស្ត្រក៏បាន​កំណត់​ការ​ផ្អាក​ការងារ​ផង​ដែរ​។ ​សហជីព​បាន​និយាយ​ថា ខ្លួន​បាន​លុបចោល​ការ​ធ្វើ​កូដកម្មបន្ទាប់ពី​លោក Netanyahu បាន​ប្រកាស​ពី​ការ​ពន្យារ​ពេលនេះ​។ វិបត្តិ​ដែល​ស្ថិត​ក្នុង​ចំណោម​វិបត្តិ​នយោបាយ​ក្នុងស្រុក​ដ៏​អាក្រក់​បំផុត​របស់​អ៊ីស្រាអែល បាន​កើតឡើង​ក្នុង​ពេល​មានការ​កើន​ឡើង​អំពើ​ហិង្សា​នៅ​តំបន់ West Bank ជា​កន្លែង​ខ្មាន់កាំភ្លើង និង​ជន​ស៊ីវិល​ប៉ា​ឡេ​ស្ទី​ន​ជាង ២៥០​នាក់ និង​ជនជាតិ​អ៊ីស្រាអែល​ជាង ៤០​នាក់​បាន​ស្លាប់​កាលពី​ឆ្នាំ​កន្លងទៅ​៕

អត្ថបទ៖ ប៊ុនថន