​ចិន៖ អតីត​មេដឹកនាំ​កោះ​តៃវ៉ាន់លោក Ma Ying-jeou បាន​ទៅដល់​ទីក្រុង​សៀង​ហៃ ប្រទេស​ចិនកាលពី​ថ្ងៃ​ចន្ទ ដោយបាន​ក្លាយជា​មេដឹកនាំ​អតីត​ ឬ​បច្ចុប្បន្ន​ដំបូង​គេមកពី​កោះ​ស្វ័យគ្រប់គ្រង​មួយ​នេះ ដែល​បានធ្វើ​ទស្សនកិច្ច​នៅ​ដីគោកចាប់តាំងពី​ការបញ្ចប់​សង្គ្រាមស៊ីវិល​ចិន​ក្នុង​ឆ្នាំ១៩៤៩​។

ដំណើរ​ទស្សនកិច្ច​នេះធ្វើ​ឡើង ខណៈ​ទំនាក់ទំនង​រវាង​ភាគី​ទាំង២ បាន​ធ្លាក់ចុះ​ដល់​កម្រិត​យ៉ាប់យ៉ឺន​បំផុតក្នុង​រយៈពេល​​ជាច្រើន​ទសវត្សរ៍​មកនេះ ក្រោម​ការដឹកនាំ​របស់​មេដឹកនាំ​កោះ​តៃវ៉ាន់​បច្ចុប្បន្នលោកស្រី Tsai Ing-wen ដែលមាន​ភាពផ្ទុយ​គ្នា​យ៉ាងខ្លាំង​ទៅនឹង​រយៈពេល ​៨​ឆ្នាំ ដែល​លោក Ma កាន់តំណែង​ជា​មេដឹកនាំ ដែល​នៅពេលនោះលោកបាន​នាំមក​នូវ​ភាពល្អប្រសើរ​មិន​ធ្លាប់មាន ក្នុង​ទំនាក់ទំនង​រវាង​ភាគី​គូប​ដិ​បក្ស​ទាំង២ ​ដ៏​យូរអង្វែង​ពី​ឆ្នាំ២០០៨ ដល់​ឆ្នាំ ២០១៦។ ថ្លែង​ទៅកាន់​អ្នកសារព័ត៌មាន មុនពេល​ចាកចេញ​ពី​កោះ​តៃវ៉ាន់ លោក Ma អាយុ ៧៣ឆ្នាំ​ដែល​កំពុងធ្វើដំណើរ​ជាមួយ​បងប្អូន​ស្រី​ ៤​នាក់​របស់លោក និង​និស្សិត​ប្រមាណ ៣០នាក់​មកពី​មូលនិធិ Ma Ying-jeou របស់លោក​បាន​និយាយថា ដំណើរ​ទស្សនកិច្ច​នេះ​គឺ​មិន​ត្រឹមតែ​ដើម្បី​គោរព​ នៅ​ផ្នូរ​បុព្វបុរស​របស់លោកនៅក្នុង​ប្រទេស​ចិន​ប៉ុណ្ណោះ​ទេ ប៉ុន្តែ​ដើម្បីកសាង​សន្តិភាព​។

ក្រៅពី​ទៅ​គោរព​ដូនតា​របស់លោក លោក​ក៏​នឹង​នាំ​និស្សិត​សាកលវិទ្យាល័យ​តៃវ៉ាន់​ទៅកាន់​ដីគោក ដើម្បី​ផ្លាស់ប្តូរ​ទស្សនកិច្ច​សិក្សា ដោយ​សង្ឃឹមថានឹង​ធ្វើឱ្យ​ប្រសើរឡើង​ នូវ​បរិយាកាស​ឆ្លងកាត់​ច្រក​សមុទ្រ​នាពេល​បច្ចុប្បន្ន តាម​រយៈ​ការ​សាទរ និង​កិច្ចសហប្រតិបត្តិការ​រ​បស់​យុវជន ដូច្នេះ​សន្តិភាព​អាច​កើតមានឡើង​កាន់តែ​ឆាប់រហ័ស​ចំពោះ​ពួកយើង​នៅទីនេះ​។ នៅក្នុង​សញ្ញា​មួយ​ដែល​ទីក្រុង​ប៉េកាំង​មើលឃើញថា ដំណើរ​ទស្សនកិច្ច​រប​ស់លោក Ma មាន​សារៈ​សំខាន់ ទោះបីជា​លោក​លែង​កាន់តំណែង​ណាមួយ​នៅក្នុង​រដ្ឋាភិបាល ឬ​នៅក្នុង​គណបក្ស Kuomintang របស់លោក​ក៏ដោយ ដែល​មន្ត្រីជាន់ខ្ពស់​ចិន​បាន​ស្វាគមន៍​លោក​នៅ​អាកាសយានដ្ឋាន​។ លោក Ma និង​គណៈប្រតិភូ​របស់​លោកគ្រោង​នឹង​ជួប​សំណេះសំណាល​ជាមួយ​និស្សិត​សាកលវិទ្យាល័យ​ចិន ហើយ​អាច​នឹង​ជួប​ជាមួយ​មន្ត្រី​ចិនក្នុងអំឡុងពេល​ទស្សន​កិច្ច​នៅ​ទីក្រុង​ជាច្រើន៕

អត្ថបទ៖ ប៊ុនថន