ភ្នំពេញ៖ ប្រធានសមាគមទីភ្នាក់ទេសចរណ៍កម្ពុជា CATA បានឱ្យដឹងថា បណ្តាក្រុមហ៊ុន​ការីទេសចរណ៍​បាននាំគ្នាចាប់ផ្តើមរៀបចំលក់កញ្ចប់ទេសចរណ៍ ​ទស្សនាព្រឹត្តិការណ៍ប្រកួតកីឡា SEA GAMES និង ASEAN PARA GAMES ២០២៣ ជាបណ្តើរៗ​ ចាប់ពីថ្ងៃទី២៨ ខែមីនាតទៅ។ នេះបើតាមការបញ្ជាក់របស់លោក ស្រី ឆាយ សៀវលីន ប្រធានសមាគមទីភ្នាក់ងារ​ទេសចរណ៍​កម្ពុជា CATA ថ្លែងក្នុងពិធីប្រកាស​ផ្សព្វផ្សាយ​វិធានការគោលនយោបាយ​អនុវត្តយុទ្ធនាការឆ្នាំ​ទស្សនាកម្ពុជា ២០២៣ និងសារាចររាជរដ្ឋាភិបាលស្តីពីការរៀបចំយុទ្ធនាការឆ្នាំទស្សនា​កម្ពុជា​២០២៣ នៅទីស្តីការក្រសួងទេសចរណ៍។

លោកស្រីថ្លែងថា ​នាអំឡុងពេលចាប់ផ្តើមផ្សព្វផ្សាយលក់កញ្ចប់ទេសចរណ៍ទស្សនា SEA GAMES នេះ មានភ្ញៀវក្នុងតំបន់អាស៊ានជាច្រើនបានបង្ហាញ​ការចាប់អារម្មណ៍ខ្លាំង​ មានការសាកសួរ​ចង់​មកទស្សនាក្នុងអំឡុងពេលកម្ពុជា​ រៀបចំព្រឹត្តិការណ៍ SEA GAMES។

លោកស្រីបន្តថា ការដែលក្រុមហ៊ុនការីទេសចរណ៍ទើបតែ រៀបចំ​ផ្សព្វផ្សាយ​លក់​កញ្ចប់​ទេសចរណ៍​ទស្សនា SEA GAMES ដោយសារ​តម្លៃ​សំបុត្រ​លក់ជូនភ្ញៀវទស្សនាប្រកួតកីឡា SEA GAMES និង ASEAN PARA GAMES ២០២៣ ទើប​តែបាន​ប្រកាស​ផ្សាយលក់ជាផ្លូវការ។

បើតាមមន្ត្រីគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ និងអាស៊ានប៉ារ៉ាហ្គេម ឆ្នាំ២០២៣ CAMSOC តម្លៃសំបុត្រលក់ជូនភ្ញៀវអន្តរជាតិចូលទស្សនាប្រកួតកីឡា SEA GAMES មានតម្លៃផ្សេងៗគ្នា ​ក្នុងនោះសម្រាប់តម្លៃសំបុត្រចូលទស្សនានៅថ្ងៃបើកព្រឹត្តិការណ៍ SEA GAMES មានតម្លៃចាប់ពី១០ម៉ឺនរៀលទៅ ២០ម៉ឺនរៀល។

លោកស្រី សៀវលីន ថ្លែងថា ការលក់កញ្ចប់ទេសចរណ៍ទស្សនាព្រឹត្តិការណ៍ SEA GAMES ភ្នាក់ងារទេសចរណ៍​កម្ពុជាបានព្យាយាមកំណត់តម្លៃឱ្យសមរម្យ ​និងទាក់ទាញ​ទេសចរអន្តរជាតិ មកទស្សនាកម្ពុជា​ម្តងហើយចង់មកទស្សនាម្តងទៀត​ ជាពិសេសក្រោយព្រឹត្តិការណ៍ SEA GAMES៕ អត្ថបទ ស៊ុម សុខជា