ភ្នំពេញ៖ លោកស្រី KAMEI Haroku ប្រធានទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន (JICA) ប្រចាំនៅកម្ពុជា បានស្នើទៅដល់ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួង​រៀបចំដែនដី នគរូបនីយកម្ម និងសំណង់ បន្តសហការធ្វើឲ្យគម្រោងនានារបស់ JICA កំពុងអនុវត្តនៅកម្ពុជា ​ឲ្យបានបញ្ចប់តាមកាលកំណត់ ។

នៅក្នុងជំនួបជាមួយឧបនាយករដ្ឋមន្ត្រី ជា សុផារ៉ា កាលពីថ្ងៃទី២៧ ខែមីនា ឆ្នាំ២០២៣ លោកស្រី KAMEI Haroku បានលើកឡើងថា បច្ចុប្បន្ន JICA កំពុងតែបន្តអនុវត្តគម្រោងថ្មី គឺគម្រោងកសាង និងអភិវឌ្ឍន៍​ជាអចិន្រ្តៃយ៍ នៅទូទាំងប្រទេសកម្ពុជា​ ដែលការងារនេះ ​កំពុងតែដំណើរការ ហើយ​លោកស្រី បានបង្ហាញពីការចូលរួមអបអរសាទរ ​ចំពោះលទ្ធផលល្អប្រសើរជា​ច្រើន​ក្រោយពេល​មានច្បាប់សំណង់រួចមក ។

លោកស្រី បានបបន្តថា បេសកកម្មរបស់លោកស្រី នឹងបញ្ចប់នៅសប្តាហ៍នេះ ​ខណៈប្រធាន JICA ថ្មី នឹងមកដល់នៅខែមេសា ​ហើយប្រធានចៃការផុតអាណត្តិរូបនេះ ក៏បានស្នើសុំកិច្ច​សហការ​ពីក្រសួងរៀបចំដែនដី ព្យាយាមខិតខំប្រឹងប្រែងឲ្យអស់ពីសមត្ថភាព ដើម្បីបញ្ចប់គម្រោង​តាមការគ្រោងទុក ។

ក្នុងជំនួបនេះឯកឧត្តមឧបនាយករដ្ឋមន្ត្រី មានប្រសាសន៍ថា រាល់គម្រោងទាំងអស់​ ទាំងថ្នាក់ជាតិ និងថ្នាក់ក្រោមជាតិ ដែលទទួលការគាំទ្រពីជប៉ុន​សុទ្ធតែទទួលបានជោគជ័យ​ទៅលើគ្រប់ការដ្ឋាន​ក្នុងគម្រោងទាំងអស់ ​ដោយរាល់គម្រោងទាំងអស់ ​ជាគម្រោងមានលក្ខណៈនិរន្តរភាព បម្រើ​ឲ្យផលប្រយោជន៍ផ្ទាល់ដល់ពលរដ្ឋ ​ក្នុងការលើកកំពស់ជីវភាពរបស់ពលរដ្ឋ ដូចជាបញ្ហា​ហេដ្ឋារចនាសម្ព័ន្ធ ធនធានមនុស្ស ​ បញ្ហាបណ្តុះបណ្តាលនិងការសហការគ្នា គឺចាត់ទុកថា​ជាគម្រោងដែលមានលក្ខណៈនិរន្តរភាពយូរអង្វែង ​ហើយរាល់គម្រោងទាំងអស់គឺមានគុណភាព​ដោយ​មិនមែន​សម្ពោធរួចជួសជុល​តាមក្រោយនោះទេ ។

ឯកឧត្តម បានបញ្ជាក់ថា យើងទទួលបានជោគជ័យលើច្បាប់សំណង់រួចហើយ គឺបានធ្វើឲ្យវិស័យ​សំណង់មានសណ្តាប់ធ្នាប់របៀបរៀបរយ ​និងសុវត្ថិភាពយូរអង្វែង ដោយមុនពេលមានច្បាប់​សំណង់នេះ ​គឺម្ចាស់សំណង់ ​និងអ្នកវិនិយោគគឺសាងសង់តាមតែចិត្ត ប៉ុន្តែក្រោយពេលមានច្បាប់​សំណង់ ​បានធ្វើឲ្យពួកគេចាប់​អារម្មណ៍​មកសុំច្បាប់អនុញ្ញាត ​ហើយស្ថាបត្យករ វិស្វករ បានចាប់​អារម្មណ៍មកចុះឈ្មោះ និងទទួលយកការបណ្តុះបណ្តាល ដែលនេះ​បង្ហាញឲ្យឃើញពីការរីក​ចំរើនមួយផ្នែក ៕ អត្ថបទ៖ បាន សុខរិទ្ធិ