ភ្នំពេញ៖ ក្រុមហ៊ុនធំៗចំនួន១០ នៅថ្ងៃទី៣០ ខែមីនាខាងមុខនេះ នឹងផ្តល់ឱកាសការងារសរុបចំនួន ១ ១១០កន្លែង ដល់យុវជន សិស្ស/និស្សិត និងអ្នកកំពុងស្វែងរកការងារធ្វើ ក្នុងវេទិកាការងារ​របស់​ទីភ្នាក់ងារជាតិមុខរបរ និងការងារ (NEA) ​នៃក្រសួងការងារ ​និងបណ្តុះបណ្តាលវិជ្ជាជីវៈ ចាប់ពីម៉ោង៨ព្រឹក ដល់៥ល្ងាច។

កម្មវិធីវេទិកា​ការងារនេះ នឹងរៀបចំឡើងនៅក្នុងបរិវេណក្រសួងការងារ ​និងបណ្តុះបណ្តាល​វិជ្ជា​ជាជីវៈ ដែលជាកិច្ចសហការ ​រវាងទីភ្នាក់ងារជាតិមុខរបរ ​និងការងារ និងសហភាពសហព័ន្ធ​យុវជនកម្ពុជា​វិស័យការងារ ​និងបណ្តុះបណ្តាលវិជ្ជាជីវៈ។

ក្រុមហ៊ុនធំៗទាំង១០ ដែលនឹងចូលរួមជ្រើសរើសបុគ្គលិក ក្នុងវេទិកាការងាររបស់NEA នោះរួមមាន៖ ក្រុមហ៊ុន BS Land & home, ក្រុមហ៊ុន ONLINE, ធនាគារ ស្ថាបនា, ក្រុមហ៊ុន KERRY World Bridge Logistics, គ្រឹះស្ថានមីក្រូហិរញ្ញវត្ថុ មហានគរ , ក្រុមហ៊ុន MJQ Mengly.J.Quach Education, គ្រឹះស្ថានមីក្រូហិរញ្ញវត្ថុ ណុងហឹប ហ្វាយនែន (ខេមបូឌា) ម.ក , ក្រុមហ៊ុន Mekongnet , ក្រុមហ៊ុន Manulife Cambodia , និង ក្រុមហ៊ុន RMA Cambodia។

សម្រាប់យុវជន សិស្ស/និស្សិត និងអ្នកកំពុងស្វែងរកការងារធ្វើ ​ឬចង់ផ្លាស់ប្តូរការងារ អាចយក​ប្រវត្តិរូបសង្ខេប (CV) ដើម្បីចូលរួមដាក់ពាក្យ ​និងសម្ភាសន៍​ផ្ទាល់ជាមួយ អ្នកតំណាងក្រុមហ៊ុន ទាំងនោះបាន។

សូមបញ្ជាក់ថា វេទិកាការងារនេះ ​នឹងត្រូវរៀបចំដោយអនុវត្ត​យ៉ាង​ម៉ត់ចត់​នូវវិធានការណ៍​បង្ការ​អនាម័យ ស្របតាមការណែនាំរបស់ក្រសួងសុខាភិបាល​ ៣ការពារ ៣កុំ ​ដើម្បីទប់ស្កាត់ការឆ្លង និង​រីករាលនៃជំងឺ កូវីដ-១៩ ដើម្បីអាចធានា​បាននូវសុវត្ថិភាព ​និងទំនុកចិត្តក្នុងការជ្រើសរើសកម្លាំង​ពលកម្ម ​និងទទួលបានឱកាសការងារ ​សម្រាប់ភាគីនិយោជក ​និងអ្នកស្វែងរកការងារ៕