​បាល់ទាត់៖ ​ក្លិប​តោ​ខៀវ Chelsea បានប្រកាស​ពី​ការខាតបង់​សរុប​ចំនួន ១២១.៣លានផោន (១៤៨.៦៥លាន​ដុល្លារ​អាមេរិក​) សម្រាប់​រដូវ​កាល ២០២១-២២ ដោយសារតែ "​ការចំណាយ​លើស​កំណត់ និង​ការបាត់បង់​ប្រាក់ចំណូល​" បន្ទាប់ពី​ការដាក់ទណ្ឌកម្ម​លើ​អតីត​ម្ចាស់​ក្លិប​សញ្ជាតិ​រុស្ស៊ី​លោក Roman Abramovich​។

​ម្ចាស់​ក្លឹប​រុស្ស៊ី​លោក Abramovich បានដាក់​លក់​ក្លឹប​នេះ​នៅ​ដើមខែ​មីនា​ឆ្នាំមុន បន្ទាប់ពី​ការ​លុកលុយ​របស់​រុស្ស៊ី​លើ​អ៊ុយ​ក្រែ​ន ដែល​ទីក្រុង​ម៉ូស្គូ​ហៅថា​ជា "​ប្រតិបត្តិការ​យោធា​ពិសេស​"​។ ការ​ដាក់​ទណ្ឌកម្ម​រប​ស់​រដ្ឋាភិបាល​ចក្រភព​អង់គ្លេស​លើ​លោក Abramovich ក៏បាន​ធ្វើឱ្យ​ដំណើរ​ការ​លក់​ភាគ​ហ៊ុន​ក្លិប​មាន​ភាព​ស្មុគស្មាញ​ផងដែរ​។​ Chelsea មិនត្រូវ​បានអនុញ្ញាត​ឱ្យ​លក់​សំបុត្រ ដែល​បណ្តាល​ឱ្យ​បាត់បង់​ប្រាក់ចំណូល ខណៈពេលដែល​ការចំណាយ​ប្រតិបត្តិការ​របស់​ពួកគេ​ក៏​ត្រូវ​បាន​កាត់បន្ថយ​ផងដែរ ​ដោយសារតែ​ការ​រឹត​បន្តឹង​របស់​រដ្ឋាភិបាល​រហូតដល់​ការ​លក់​ភាគហ៊ុន​ក្លិប​បាន​បញ្ចប់​នៅ​ចុង​ខែ​ឧសភា​ឆ្នាំមុន​។​

​ក្លិប​ដែលមាន​មូលដ្ឋាន​នៅ​ទីក្រុង​ឡុង​ដ៍​មួយ​នេះ​បាន​ឲ្យ​ដឹងថា តួលេខ​ចំណូល​របស់​ពួកគេ​បាន​កើន​ឡើង​ដល់ ៤៨១.៣លាន​ផោន​ពី ៤៣៤.៩លាន​ផោន​កាលពី​ឆ្នាំមុន​ ដែល​ភាគច្រើន​ដោយសារតែ​ការកើនឡើង​នៃ​ថ្ងៃ​ប្រកួត និង​ប្រាក់ចំណូល​ពាណិជ្ជកម្ម​ នៅ​ពេលដែល​អ្នកគាំទ្រ​ត្រលប់មក​កីឡដ្ឋាន​វិញ​បន្ទាប់ពី​ជំងឺ​រាតត្បាត COVID-19។​ ​ប្រាក់ចំណូល​ពាណិជ្ជកម្ម​របស់​ក្លឹប​ក៏បាន​កើន​ឡើង​ដល់ ១៧៧.១​លាន​ផោន​ផងដែរ ដោយសារ​ការ​កើន​ឡើង​នៃ​ប្រាក់ចំណូល​ឧបត្ថម្ភ​ពី​កិច្ចសន្យា​ថ្មី និង​ការ​បន្ត​ដៃគូ​ដែល​មាន​ស្រាប់​។​

Chelsea ត្រូវបាន​ទិញ​ដោយ​ក្រុម​វិនិយោគិន​ដែល​ដឹកនាំ​ដោយ​អ្នកជំនួញ​អាមេរិក Todd Boehly និង Clearlake Capital ដែល​បាន​វិនិយោគ​ច្រើនជាង ៦០០លាន​អឺរ៉ូ​ក្នុង​ការទិញចូល​កីឡាករ​ថ្មី​នាពេល​កន្លងមក​។ Chelsea កំពុង​ឈរ​នៅ​លេខ ១០ នៅ Premier League និង​ឈានដល់​វគ្គ 1/4 ផ្តាច់ព្រ័ត្រ​នៃ​ក្របខ័ណ្ឌ Champions League ដែល​ពួកគេ​ត្រូវ​ជួប​ជាមួយ​ក្រុម​ម្ចាស់​ជើងឯក Real Madrid នៅ​ខែក្រោយ​៕

​អត្ថបទ​៖​នាង សុភា​វុ​ធ