ចិន៖ យោងតាមការសិក្សាដែលបានចេញផ្សាយនៅថ្ងៃអង្គារនេះ ប្រទេសចិនបានចំណាយប្រាក់ចំនួន ២៤០ពាន់លានដុល្លារដើម្បីសង្គ្រោះប្រទេសកំពុងអភិវឌ្ឍន៍ចំនួន ២២នៅចន្លោះឆ្នាំ២០០៨ និង ២០២១ ជាចំនួនកើនឡើងនៅក្នុងប៉ុន្មានឆ្នាំចុងក្រោយនេះ ខណៈប្រទេសកាន់តែច្រើនបានជួបការលំបាកក្នុងការសងប្រាក់កម្ចី ដែលបានចំណាយ ក្នុងការសាងសង់ហេដ្ឋារចនាសម្ព័ន្ធខ្សែក្រវាត់ និងផ្លូវ។
ជិត ៨០% នៃការផ្តល់ប្រាក់កម្ចីសង្គ្រោះត្រូវបានធ្វើឡើងនៅចន្លោះឆ្នាំ២០១៦ និង ២០២១ ភាគច្រើនទៅកាន់ប្រទេសដែលមានប្រាក់ចំណូលមធ្យម រួមមានអាហ្សង់ទីន ម៉ុងហ្គោលី និងប៉ាគីស្ថាន នេះបើយោងតាមរបាយការណ៍របស់អ្នកស្រាវជ្រាវមកពីធនាគារពិភពលោក សាលា Harvard Kennedy -AidData និងវិទ្យាស្ថាន Kiel សម្រាប់សេដ្ឋកិច្ចពិភពលោក។ ប្រទេសចិនបានផ្តល់ប្រាក់កម្ចីរាប់រយពាន់លានដុល្លារ ដើម្បីសាងសង់ហេដ្ឋារចនាសម្ព័ន្ធនៅក្នុងប្រទេសកំពុងអភិវឌ្ឍន៍ ប៉ុន្តែការផ្តល់ប្រាក់កម្ចីបានធ្លាក់ចុះចាប់តាំងពីឆ្នាំ២០១៦ ដោយសារគម្រោងជាច្រើនបានបរាជ័យក្នុងការបង់ភាគលាភហិរញ្ញវត្ថុដែលត្រូវបានរំពឹងទុក។
ការសិក្សាបានរកឃើញថា ប្រាក់កម្ចីរបស់ចិនទៅកាន់ប្រទេសដែលមានវិបត្តិបំណុលបានកើនឡើងពីតិចជាង ៥% នៃផលប័ត្រប្រាក់កម្ចីក្រៅប្រទេសរបស់ខ្លួនក្នុងឆ្នាំ២០១០ ដល់ ៦០% ក្នុងឆ្នាំ២០២២។ អាហ្សង់ទីនទទួលបានច្រើនជាងគេគឺ ១១១.៨ពាន់លានដុល្លារ បន្ទាប់មកគឺប៉ាគីស្ថានចំនួន ៤៨.៥ពាន់លានដុល្លារ និងអេហ្ស៊ីប ១៥.៦ពាន់លានដុល្លារ។ ប្រទេសចំនួន ៩ ទទួលបានតិចជាង ១ពាន់លានដុល្លារ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
