ភ្នំពេញ៖ ឯកឧត្តម អុំ រាត្រី អភិបាលខេត្តបន្ទាយមានជ័យ បានអះអាងថា ចាប់តាំងពីភាគីកម្ពុជា-ថៃ បានបើកដំណើរការច្រកព្រំដែនឡើងវិញ បន្ទាប់ពីមានការធូរស្រាលការឆ្លងរាលដាលនៃជំងឺកូវីដ-១៩ ពុំមានករណីពលករលួចឆ្លងដែនខុសច្បាប់នោះទេ ខណៈមានមេខ្យល់ចំនួនជាង៦០នាក់ កំពុងជាប់ឃុំនៅឡើយ ។

ក្នុងសន្និសីទសារព័ត៌មានស្តីពី ភាពជោគជ័យក្នុងរយៈពេល ៥ឆ្នាំ របស់រដ្ឋបាលខេត្តបន្ទាយមានជ័យ នៅថ្ងៃទី២៨ ខែមីនា ឆ្នាំ២០២៣ ឯកឧត្តម មានប្រសាសន៍ថា តាំងពីមុនការផ្ទុះឆ្លងរាលដាល​ជំងឺ​កូវីដ-១៩ និងរហូតដល់បច្ចុប្បន្ននេះ សមត្ថកិច្ចការពារព្រំដែន មានកម្លាំងនគរបាល និងកម្លាំង​កងទ័ព បានចាប់ដៃសហការគ្នាការពារ និងបន្តរឹងបន្តឹងការឆ្លងដែន ខុសច្បាប់ ដោយពង្រាយ​តាមគោលដៅ លើកលែងតែតំបន់ចម្ការមីន ។

ឯកឧត្តម បានបន្តថា ដូចនេះចាប់ពីដំណើរការច្រកព្រំដែនឡើងវិញ ពុំមានករណីបទល្មើសផ្សេងៗ​កើតឡើង រួមទាំងការលួចឆ្លងដែនខុសច្បាប់របស់ពលករក៏គ្មាននោះដែរ ព្រោះការធ្វើដំណើរ​ឆ្លងដែន សុទ្ធសឹងតែមានលិខិតឯកសារត្រឹមត្រូវ​ និងមានការសម្របសម្រួលពីអាជ្ញាធរកម្ពុជា និងភាគីថៃ ។

ឯកឧត្តមអភិបាលខេត្ត បានបញ្ជាក់ថា ចាប់តាំងពីការផ្ទុះឡើងរាតត្បាតខ្លាំង​ នៃជំងឺកូវីដ-១៩ ហើយ​មានការបិទច្រកទ្វារព្រំដែន ​សមត្ថកិច្ចការពារព្រំដែន​ខេត្តបន្ទាយមានជ័យ ​ឃាត់ខ្លួនមេខ្យល់នាំ​ពលករខុសច្បាប់បានជាង ១០០នាក់ ​ហើយរហូតមកដល់ពេលនេះ អ្នកខ្លះបានជាប់ឃុំគ្រប់ចំនួនឆ្នាំ និងនៅសល់ប្រមាណជាង ៦០នាក់ ។

ឯកឧត្តម បានបញ្ជាក់ថា បច្ចុប្បន្នស្ថានភាព នៃការសម្រុកឆ្លងដែន របស់ពលករខ្មែរ តាម​ច្រកព្រំដែន​ខេត្តបន្ទាយមានជ័យ ​មកលេងកម្សាន្តស្រុកកំណើត ​នារដូវបុណ្យចូលឆ្នាំ​នាពេល​ខាងមុខនេះ ពុំសូវមានសន្ទុះនោះទេ​ គឺ​អាច​សម្រុកមកច្រើននៅសប្ដាហ៍ទី១​ ខែក្រោយ ខណៈអាជ្ញាធរ​បានត្រៀមរួចរាល់ហើយ ​សម្រាប់​ទទួលពលករទាំងអស់​ ដោយ​ខិតខំ​សម្រួលឯកសារ ឆាប់​បានឲ្យពួកគេបានទៅផ្ទះ ​និងទប់ស្កាត់ថ្លៃដឹកជញ្ជូន និងធ្វើដំណើរ ៕ អត្ថបទ បាន សុខរិទ្ធិ