ភ្នំពេញ៖ រាជរដ្ឋាភិបាលកម្ពុជា និងរដ្ឋាភិបាលម៉ារ៉ុក ចុះកិច្ចព្រមព្រៀងស្ដីពីការដឹកជញ្ជូនតាមផ្លូវ ដើម្បីជំរុញវិស័យ ទេសចរណ៍ ធុរកិច្ច និងការតភ្ជាប់រវាងប្រជាជននិងប្រជាជននៃប្រទេសទាំងពីរ។

ពិធីចុះកិច្ចព្រមព្រៀងនេះធ្វើឡើង អំឡុងពេល ឯកឧត្តម ឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ បំពេញទស្សនកិច្ចនៅប្រទេសម៉ារ៉ុក រយៈពេល២ថ្ងៃ ពីថ្ងៃទី២៧ ដល់ថ្ងៃទី២៨ ខែមីនា ឆ្នាំ២០២៣។

ក្នុងឱកាសជំនួបទ្វេភាគី កាលពីថ្ងៃទី២៧ ខែមីនា ឆ្នាំ២០២៣ នៅទីស្ដីការក្រសួងការបរទេស សហប្រតិបត្តិការ​អាហ្វ្រិក និងជនអន្តោប្រវេសន៍ម៉ារ៉ុក នៅទីក្រុងរ៉ាបា ឯកឧត្តម ឧបនាយករដ្ឋមន្រ្តី និង ឯកឧត្តម Nasser BOURIT រដ្ឋមន្ត្រីការបរទេសម៉ារ៉ុក បានផ្លាស់ប្តូរមតិយោបល់​គ្នាប្រកបដោយ​ផ្លែផ្កា និងបានសម្តែងនូវទំនុកចិត្តថា ដំណើរ​ទស្សនកិច្ចនេះ នឹងផ្តល់ជាកម្លាំងជម្រុញថ្មីដល់​កិច្ចសហប្រតិបត្តិការរវាងប្រទេសទាំងពីរ តាមរយៈ​ការ​ស្វែងរកនូវ កិច្ចសហប្រតិបត្តិការ និងការដាក់ចេញនូវគំនិតផ្តួចផ្តើមថ្មីៗបន្ថែមទៀត។

ឯកឧត្ដមឧបនាយករដ្ឋមន្ត្រី ប្រាក់ សុខុន បានកោតសរសើរចំពោះព្រះរាជកិច្ចដឹកនាំរបស់ ព្រះមហាក្សត្រ Mohammed Vi និងបានសម្តែងការកោតសរសើរចំពោះការអភិវឌ្ឍសង្គម និងសេដ្ឋកិច្ចរបស់ប្រទេសម៉ារ៉ុក ក៏ដូចជា​គោលនយោបាយដ៏ឈ្លាសវៃរបស់ព្រះមហាក្សត ដែលព្រះអង្គមានគោលបំណងធានានូវភាពរីកចម្រើន រុងរឿង និងស្ថិរភាពនៃព្រះរាជាណាចក និងប្រជាជនម៉ារ៉ុក។

ក្នុងដំណើរទស្សនកិច្ចនោះ រដ្ឋមន្ត្រីប្រទេសទាំងពីរ បានអញ្ជើញស្វាគមន៍ការចុះហត្ថលេខាលើ​កិច្ចព្រមព្រៀង​ស្ដីពីការដឹកជញ្ជូនតាមផ្លូវអាកាសរវាងរដ្ឋាភិបាលកម្ពុជា និងរដ្ឋាភិបាលម៉ារ៉ុក ដោយបានបង្ហាញពី​ទំនុកចិត្តលើ​កិច្ចព្រមព្រៀងនេះនឹងជួយរួមចំណែកដល់ការលើកកម្ពស់វិស័យ ទេសចរណ៍ ធុរកិច្ច និងការតភ្ជាប់​រវាងប្រជាជន​និងប្រជាជននៃប្រទេសទាំងពីរ។

លើសពីនេះ ក្នុងស្មារតីដូចគ្នា រដ្ឋមន្ត្រីទាំងពីរបានឯកភាពធ្វើការពន្លឿនការចរចារបញ្ចប់ និងឈានទៅរកចុះការ ហត្ថលេខាលើកិច្ចព្រមព្រៀងដែលមិនទាន់សម្រេចចំនួន ០៣ ផ្សេងទៀត រួមមាន ទី១.កិច្ចព្រមព្រៀងស្តីពីការជម្រុញ និងការការពារវិនិយោគទៅវិញទៅមករវាងម៉ារ៉ុក និងកម្ពុជា, ទី២. កិច្ចព្រមព្រៀងស្តីពីការលុបបំបាត់ការយកពន្ធត្រួត​គ្នាពាក់ព័ន្ធនឹងពន្ធ​លើ​ប្រាក់ចំណូល និង ការបង្ការការគេចវេះពន្ធ និងការចៀសវាងពន្ធ រវាងម៉ារ៉ុក និងកម្ពុជា និងទី៣. កិច្ចព្រមព្រៀងស្តីពីកិច្ចសហប្រតិបត្តិការវប្បធម៌ បច្ចេកទេស វិទ្យាសាស្ត្រ និងសេដ្ឋកិច្ច។

ឯកសារទាំងបីនេះ នឹងផ្តល់សន្ទុះថ្មីដល់សេដ្ឋកិច្ច ទំនាក់ទំនង និងកិច្ចសហប្រតិបត្តិការទ្វេភាគី និងជាមូលដ្ឋានរឹង​មាំសម្រាប់ការជំរុញសកម្មភាពពាណិជ្ជកម្ម និងការវិនិយោគ ដែលឆ្លុះបញ្ចាំង ពីទំនាក់ទំនងដ៏​ល្អប្រសើរដែល​ភ្ជាប់​ប្រទេស​ទាំងពីរទាំងកម្រិតនយោបាយ និងការទូត៕​ អត្ថបទ ៖ ឧត្ដម