​ភ្នំពេញ ៖ ឯកឧត្តម ហ៊ុន ម៉ានី អ្នកតំណាងរាស្ត្រ និងជាប្រធានគណៈកម្មការទី៧ នៃរដ្ឋសភា បានបញ្ជាក់ថា អ្នកទាំង​អស់គ្នា អាចមានឱកាសក្លាយជាអ្នកដឹកនាំ ហើយអ្នកដឹកនាំពូកែ គឺជាអ្នកដែលចេះការពារ។ ជាអ្នកការពារជាតិ ការពារ​សុខសន្តិភាព ថែរក្សាស្ថិរភាព និងសន្តិសុខសង្គម ពង្រឹងម៉ាក្រូសេដ្ឋកិច្ចជាតិ និងពង្រីក​មិត្តភាពខាង​ក្រៅឲ្យ​កាន់​តែរឹងមាំ។

​ការថ្លែងរបស់ឯកឧត្តម ហ៊ុន ម៉ានី អ្នកតំណាងរាស្ត្រ និងជាប្រធានគណៈកម្មការទី៧នៃរដ្ឋសភា យ៉ាងដូច្នេះ ក្នុង​ឱកាស​អញ្ជើញធ្វើបាឋកថាស្តីពី «តួនាទីយុវជនក្នុងសង្គមកម្ពុជា» ជូនដល់គណៈគ្រប់គ្រង យោធាចារ្យ នាយទាហាន បុគ្គលសិក្សា និស្សិត សិក្ខាកាម នៃសាកលវិទ្យាល័យការពារជាតិ សរុបប្រមាណ ៩០០ នាព្រឹកថ្ងៃ២៨ ខែមីនា ឆ្នាំ២០២៣នេះ។

ឯកឧត្តម ហ៊ុន ម៉ានី បានលើកឡើងទៀតថា ថ្ងៃនេះដ្បិតថាសិក្ខាកាមដែលចូលរួមក្នុងបាឋកថា នៅសាកលវិទ្យាល័យ​ការពារជាតិ សុទ្ធតែស្ថិតក្នុងឯកសណ្ឋានការពារជាតិ ដែលជាអង្គភាពជំនាញ និងវិន័យ តែសិក្ខាកាមទាំងអស់ ក៏ជាពលរដ្ឋខ្មែរ ក៏ជាសមាជិកនៃក្រុមគ្រួសារខ្មែរ អាចជាមេគ្រួសារ​ផង និងអាចជាអនាគតអ្នកដឹកនាំផង។ ក្នុងន័យនេះ ប្រាកដណាស់ថាយើងមាន​តួនាទីភារកិច្ច​ប្រចាំថ្ងៃ តែការងាររួមរបស់យើងនោះ គឺការពារសេចក្តីសុខ និងភាពសម្បូរសប្បាយ​របស់ក្រុម​គ្រួសារយើង និងសង្គមយើង។ យើងធ្លាប់មានបទពិសោធន៍នៃការសាកល្បងច្រើនណាស់ដែលនាំមកនូវការបង្កើតចលាចលជាបន្តបន្ទាប់ ដែលនាំ​ឲ្យ​មានភាពអនាធិបតេយ្យ និងអស្ថិរភាពសង្គមរួចមកហើយ។ ដូច្នេះយើងត្រូវតែការពារមិនឲ្យមានស្ថានភាពចលាចលទាំងអស់នោះ មករំខានសេចក្តីសុខ​របស់​យើងទៀត​នោះទេ។ យើងប្តេជ្ញា ការពារសន្តិភាព ទោះក្នុងតម្លៃណាក៏ដោយ។

ឯកឧត្តម ហ៊ុន ម៉ានី បានលើកយក០៣ចំនុចសំខាន់ៗ ដោយផ្តើមចេញពីការចែក​រំលែកពីទស្សនៈ​របស់ខ្លួនលើ (១)បទពិសោធន៍ជាប្រវត្តិសាស្ត្រដែលយុវជនជំនាន់មុន និងជាថ្នាក់ដឹកនាំ​បច្ចុប្បន្ន​ឆ្លង​កាត់ ក្នុងដំណើរស្វែងរកសន្តិភាព (២)តម្លៃនៃវិស័យការពារជាតិ ផ្សារភ្ជាប់ នឹងកិច្ចការពារ​សុខសន្តិភាព និង(៣)ការត្រៀមខ្លួន និងចូលរួម​ក្នុងនាមជា​អ្នកបន្តវេនលើការដឹកនាំកម្ពុជា ឆ្ពោះ​ទៅ​អនាគត។ ជាមួយគ្នានេះ ដោយអង្គពិធីថ្ងៃនេះ ជាអ្នកដែលបាន និងកំពុង​ទទួល​ការ​បណ្តុះបណ្តាល​ផ្តោតលើកិច្ចការពារជាតិ។ ឯកឧត្តម បានសង្កត់ធ្ងន់ លើតម្លៃសុខសន្តិភាព ដែលជាខឿន​នៃ​ការ​អភិវឌ្ឍជាតិ និងជាអ្វីដែលគ្រប់ៗគ្នាត្រូវការពារជាដាច់ខាត ទោះក្នុងតម្លៃណាក៏ដោយ។ ឯកឧត្តមបានចែករំលែកទៀតថា៖ ដើម្បីយល់ពីគុណតម្លៃនៃសុខសន្តិភាព យើងគប្បីប្រៀបធៀប​ពេលដែលគ្មាន​សុខសន្តិភាព ក៏ដូចជាស្វែងយល់អោយច្បាស់ពីសមិទ្ធផល​សន្តិភាពដែលទទួល​បានតាមរយៈការ​អនុវត្តន៍​យោបាយ​ឈ្នះ-ឈ្នះ ដែលបានក្លាយជាមូលដ្ឋាន នៃការរស់រាននៃសង្គម សេដ្ឋកិច្ចជាតិ រហូតឈានដល់​ការអភិវឌ្ឍឥត​ឈប់ឈរលើ​គ្រប់វិស័យនាពេលបច្ចុប្បន្ន និង​បន្ត​ទៅ​មុខ។

ជាមួយគ្នានោះដែរ ឯកឧត្តម នាយឧត្តមសេនីយ៍ ជា តារា រដ្ឋមន្រ្តីប្រតិភូអមនាយករដ្ឋមន្រ្តី និង​ជាទីប្រឹក្សាផ្ទាល់​សម្តេចតេជោ ទទួលបន្ទុកសាកលវិទ្យាធិការ បានថ្លែងអំណរគុណ ឯកឧត្តម ហ៊ុន មានី ដែលបាន​ចំណាយ​ពេលដ៏​មមាញឹក និងមានតម្លៃបំផុត មកសំណេះសំណាល និងធ្វើបាឋកថា ចែករំលែកបទពិសោធន៍ដឹកនាំ និងបំពេញ​ការងារ មិនថាក្នុងក្របខណ្ឌយុវជន ក៏ដូចជា​ក្រប​ខណ្ឌនានា ដែលឯកឧត្តមទទួលបន្ទុក។ ពិធីនាថ្ងៃនេះដែរ ពិតជា​បាន​ឆ្លុះបញ្ចាំង​ពីភាពចាំបាច់​នៃការចូលរួមពីគ្រប់កោសិកាសង្គមក្នុងកិច្ចការលើកស្ទួយវិស័យការពារជាតិ ដែល​ជាវិស័យ​មិន​អាចខ្វះបាន និងសំខាន់សម្រាប់ប្រទេសជាតិ៕ អត្ថបទ៖ រដ្ឋា ​