នាយករដ្ឋមន្រ្ដីក្រិក លោក គីរីកូស មីតសូតាគីស បាននិយាយកាលពីថ្ងៃអង្គារនេះថា ប្រទេសក្រិក នឹងរៀបចំការបោះឆ្នោតសភានៅថ្ងៃទី២១ ឧសភាខាងមុខ តាមការគ្រោងទុក។

នៅក្នុងអំឡុងពេលប្រជុំគណៈរដ្ឋមន្រ្ដី លោក មីតសូតាគីស បាននិយាយថា ប្រទេសនេះនិងប្រជាជនរបស់ខ្លួន ត្រូវការជើងមេឃស្រឡះ។

លោកបន្ដថា ការបោះឆ្នោតជាតិនឹងចាប់ផ្ដើមធ្វើឡើង នៅចុងអណត្ដិ៤ឆ្នាំ ដូចដែលរូបលោក​បាន​ប្តេជ្ញាចិត្តតាំងពីការចាប់ផ្ដើមមកម៉្លេះ។ ពោលគឺការបោះឆ្នោតនឹង​ចាប់ផ្ដើមធ្វើនៅថ្ងៃអាទិត្យទី២១ ឧសភាតែម្ដង។អាណត្ដិរយៈពេល៤ឆ្នាំរបស់​រដ្ឋាភិបាលប្រជាធិបតេយ្យថ្មីអភិរក្សនិយមនឹងត្រូវផុតកំណត់នៅខែកក្កដា។

ការបោះឆ្នោតនៅថ្ងៃទី២១ឧសភានឹងចាប់ផ្ដើមធ្វើដោយស្ថិតនៅក្រោមប្រព័ន្ធសមាមាត្រថ្មី ដែលធ្វើអោយមានការពិបាកសម្រាប់គណបក្សណាមួយនៅក្នុងការប្រមូលសំឡេងភាគច្រើន។

ការបោះឆ្នោតជុំទីពីរទំនងជានឹងធ្វើឡើងដែរ ខណៈលោក មីតសូតាគីស បាននិយាយដដែលថា នឹងព្យាយាមធានាឲ្យមានសំឡេងភាគច្រើននៅក្នុងសភា ដោយមិនបាច់មានសំឡេង​គាំទ្រ​ពីរដ្ឋាភិបាលចម្រុះឡើយ។

លោកមីតសូតាគីស បាននិយាយថា ប្រសិនបើការបោះឆ្នោតជុំទីពីរតម្រូវឲ្យលុបចោល​ការប្រើប្រាស់ប្រព័ន្ធសមាមាត្រតាមបែបផ្សេងព្រេង។មានន័យថា ការបោះឆ្នោតនោះ នឹងចាប់ផ្ដើមធ្វើនៅដើមខែកក្កដាវិញ៕អត្ថបទ៖ មករា