​អាមេរិក៖ ស្នងការ​នគរបាលក្រុង​ណា​ស្វី​ល​បាន​និយាយ​កាលពី​ថ្ងៃ​អង្គារ​ថា អតីត​សិស្ស​វ័យ ២៨​ឆ្នាំ​ដែល​បាន​សម្លាប់​កុមារ​ ៣​នាក់ និង​បុគ្គលិក​សាលារៀន ៣​នាក់​នៅ​សាលា​គ្រិស្ត​សាសនា​ក្នុង​ទីក្រុង​នេះ​កាលពី​ថ្ងៃ​ចន្ទ ស្ថិត​ក្រោម​ការ​មើល​ថែ​របស់​វេជ្ជបណ្ឌិត​ក្នុង​ករណី​មាន​វិបល្លាស​ផ្នែក​សតិអារម្មណ៍ និង​បាន​ទិញ​កាំភ្លើង​ចំនួន​ ៧​ដើម​មុន​ការ​បាញ់​ប្រហារ​នោះ​។​

​ស្ត្រី​ជា​ខ្មាន់កាំភ្លើង​ឈ្មោះ Audrey Elizabeth Hale បាន​ប្រើ​កាំភ្លើង​វែង​ ២​ដើម និង​កាំភ្លើងខ្លី​មួយ​ដើមអំឡុង​ការ​បាញ់​បោះ​ដោយ​សេរី​លើ​សាលាបឋមសិក្សា​មួយ​នេះ ជាហេតុ​ការណ៍​ចុងក្រោយ​បំផុត​ក្នុង​ព្រឹត្តិការណ៍​បាញ់សម្លាប់​មនុស្ស​ដ៏​ធំ​ជា​បន្តបន្ទាប់ ដែល​បាន​ធ្វើ​ឲ្យ​អាវុធ​ក្លាយ​ជា​បញ្ហា​ដ៏​ក្ដៅគគុក​នៅ​ក្នុង​នយោបាយ​សហរដ្ឋអាមេរិក​។ ស្នងការ​នគរបាល​ក្រុង​ណា​ស្វី​ល​លោក John Drake បាន​ប្រាប់​ក្រុម​អ្នកសារព័ត៌មាន​កាលពី​ថ្ងៃ​អង្គា​រថា កាំភ្លើង ​៣​ដើម​ក្នុងចំណោម​ ៧​ដើម​ដែល​ជនល្មើស​បាន​ទិញ​ដោយ​ខុសច្បាប់​ពី​ហាង​ចំនួន​៥​។

​ស្នងការ​នគរបាល​ខាងលើ​និយាយ​ថា​ ឪពុក​ម្ដាយ​របស់​ជន​ដៃ​ដល់ Hale ពុំបាន​ដឹង​ថា ​នាង​មាន​អាវុធ​ក្នុង​ដៃដល់​ទៅ ​៧​ដើម​នោះ​ទេ ដោយ​បន្ថែម​ថា អាវុធ​ទាំងនោះ​ស្ថិត​ក្រោម​ការ​តាមដាន​ថា ​ជន​សង្ស័យ​បាន​គ្រប់គ្រង​អាវុធ​តែមួយ​ដើម​ប៉ុណ្ណោះ​ ប៉ុន្តែ​បាន​លក់​ចេញ​វិញ ហើយ​ក្រុម​អ្នកស៊ើប​អង្កេត​នៅតែ​ពុំ​ទាន់​អាច​កំណត់​បាន​ពី​មូលហេតុ​ ឈាន​ដល់​ការ​បាញ់​សម្លាប់​នេះ​នៅឡើយ​។ ​វីដេអូ​ដែល​បាន​បញ្ចេញ​កាលពី​ថ្ងៃ​អង្គារ បាន​បង្ហាញ​ពី​ក្រុម​មន្ត្រី​នគរបាល​ក្រុង​ណា​ស្វី​ល​បាញ់​ជា​ច្រើន​គ្រាប់​លើ​ខ្មាន់កាំភ្លើង​ នៅ​ក្នុង​ការ​បាញ់​បោះ​ប៉ុន្មាន​នាទី​នៅ​សាលារៀន​នោះ ក្រោយ​សម្រុកចូល​ទៅ​ក្នុង​សាលា​មួយ​នេះប្រដាប់​ដោយ​កាំភ្លើង​វែង ​និង​ឆែកឆេរ​ពី​ថ្នាក់រៀន​មួយ​ទៅ​ថ្នាក់រៀន​មួយ​៕

អត្ថបទ៖ សុខមាន