កំពង់ស្ពឺ៖ ឯកឧត្តម ហ៊ុន ម៉ានី តំណាងរាស្រ្ដមណ្ឌលកំពង់ស្ពឺ បានថ្លែងថា ការអភិវឌ្ឍហេដ្ឋារចនាសម្ព័ន្ធនៅក្នុងព្រះរាជាណាចក្រកម្ពុជា ក៏ដូចជាខេត្តកំពង់ស្ពឺ ដែលបានកើតមានជាហូហែ គឺជាមាគ៌ាអភិវឌ្ឍន៍របស់គណបក្សប្រជាជនកម្ពុជា ដែលបានចាប់ផ្តើមធ្វើ ​ហើយបន្តធ្វើឥតឈប់ឈរ។

ឯកឧត្តមមានប្រសាសន៍ថា ថ្ងៃនេះ ឯកឧត្ដម ពិតជាមានក្ដីសប្បាយរីករាយដែលបានចូលរួមជា​មួយលោកយាយលោកតា អ៊ុ ពុកម៉ែ មាមីង បងប្អូន ដើម្បីសម្ពោធជាផ្លូវការ​ កំណាត់ផ្លូវប្រវែង ១៦៦,៦៣ គីឡូម៉ែត្រ ​ស្ថិតក្នុងភូមិសាស្រ្តខេត្តកំពង់ស្ពឺ។

ឯកឧត្ដមបញ្ជាក់ថា ក្នុងឱកាសបុណ្យចូលឆ្នាំថ្មីប្រពៃណីជាតិខាងមុខនេះ ផ្លូវមួយខ្សែនេះ​នឹងក្លាយជាចំណងដៃជូនចំពោះអ្នកខេត្តកំពង់ស្ពឺយើង ​ជាពិសេសអ្នកស្រុកភ្នំស្រួច។

ឯកឧត្តមបន្តថា «មានផ្លូវ គឺមានសង្ឃឹម» ផ្លូវគមនាគមន៍ ​គឺជាសសៃឈាមនៃសេដ្ឋកិច្ច ដែលនឹងជួយ​សម្រួលការដឹកជញ្ផូនកសិផល​ ក៏ដូចជាការធ្វើដំណើរទៅរៀនសូត្រ ​និងទៅធ្វើការសម្រាប់បងប្អូន ក្មួយៗ សិស្សានុសិស្ស កម្មករ កម្មការិនីផងដែរ។

ឯកឧត្ដមបន្តថា ជាក់ស្តែងការអភិវឌ្ឍហេដ្ឋារចនាសម្ព័ន្ធនៅក្នុងព្រះរាជាណាចក្រកម្ពុជា ក៏ដូចជា​ខេត្តកំពង់ស្ពឺ និយាយដោយឡែក ដែលបានកើតមានជាហូហែ គឺជាមាគ៌ាអភិវឌ្ឍរបស់គណបក្ស​ប្រជាជនកម្ពុជា ​ដែលបានចាប់ផ្តើមធ្វើ ​ហើយបន្តធ្វើឥតឈប់ឈរ។ នេះជាកាតព្វកិច្ចចម្បងរបស់​គណបក្ស​ជាការឆ្លើយតបទៅនឹងទំនុកចិត្តរបស់ប្រជាពលរដ្ឋជារៀងរហូតមក។

ឯកឧត្ដមបញ្ជាក់ថា ប្រមុខដឹកនាំ ក៏ដូចជាមន្រ្តីគណបក្សគ្រប់ជាន់ថ្នាក់តែងមានវត្តមានជាមួយ​ប្រជា​ពលរដ្ឋគ្រប់ពេលវេលា ​មិនថាពេលមានសុខ ឬទុក្ខទេ។ ជាពិសេសនៅពេលណាដែលមាន​គ្រោះអាសន្ន ​គណបក្សរឹងរិតតែនៅជាប់ជាមួយបងប្អូនថែមទៀត៕