អាមេរិក៖ ការដួលរលំនៃធនាគារអាមេរិកចំនួន២ បានធ្វើឲ្យអ្នកដែលពិនិត្យមើលការខុសត្រូវលើប្រព័ន្ធនេះ កំពុងស្ថិតក្រោមការចាប់អារម្មណ៍។ ពួកគេកំពុងប្រឈមការរិះគន់ចំពោះការមិនធ្វើការងាររបស់ខ្លួន។ ទោះជាយ៉ាងណា ពួកគេនិយាយថា បញ្ហាគឺជារឿងពិតនៃការគ្រប់គ្រងពុំបានត្រឹមត្រូវ។
អនុប្រធានធនាគារកណ្តាលសហព័ន្ធទទួលបន្ទុកការត្រួតពិនិត្យលោក Michael Barr បានផ្តល់ភស្តុតាងកាលពីថ្ងៃអង្គារនៅក្នុងទីក្រុងវ៉ាស៊ីនតោន នៅចំពោះមុខសមាជិកនៃគណៈកម្មាធិការធនាគារព្រឹទ្ធសភា ដែលលោកបានដោះស្រាយបញ្ហានៅធនាគារ Signature Bank ប៉ុន្តែបានផ្តោតជាចម្បងលើការគំរាមកំហែងពីធនាគារ Silicon Valley។ លោក Barr និយាយថា យើងកំពុងវាយតម្លៃ ថាតើការអនុវត្តស្តង់ដារតឹងរ៉ឹងជាងមុននឹងជំរុញឱ្យធនាគារកាន់តែប្រសើរ ក្នុងការគ្រប់គ្រងហានិភ័យដែលនាំទៅរកការដួលរលំដែរ ឬទេ។ លោកបាននិយាយថា ធនាគារមានគំរូពាណិជ្ជកម្មដែលមានការយកចិត្តទុកដាក់ កំពុងផ្តល់សេវា ជាផ្នែកដ៏ធំក្នុងវិស័យបច្ចេកវិទ្យា។ ទ្រព្យសកម្មរបស់ក្រុមហ៊ុនបានកើនឡើងបីដង ខណៈប្រជាជនអាមេរិកមានតម្រូវការទិញផលិតផលបច្ចេកវិទ្យាច្រើន ក្នុងអំឡុងពេលដំបូងនៃជំងឺរាតត្បាត។
នៅពេលនោះ នាយកប្រតិបត្តិធនាគារបានវិនិយោគយ៉ាងច្រើន នៅក្នុងប័ណ្ណបំណុលរយៈពេលវែង។ ទោះជាយ៉ាងណា ខណៈអត្រាការប្រាក់កើនឡើង ប័ណ្ណបំណុលបានបាត់បង់តម្លៃ ហើយនៅពេលដែលអតិថិជនស្នើសុំប្រាក់របស់ពួកគេ នាយកប្រតិបត្តិត្រូវលក់ការវិនិយោគដោយការខាតបង់។ សាជីវកម្មធានារ៉ាប់រងប្រាក់បញ្ញើសហព័ន្ធ បានផ្តល់បណ្តាញសុវត្ថិភាពសម្រាប់អតិថិជន។ ប៉ុន្តែប្រធានលោក Martin Gruenberg និយាយថា ធនាគារជាច្រើននៅទូទាំងប្រទេសបានខាតបង់ដែលពុំបានដឹងច្រើនជាង ៦០០ពាន់លានដុល្លារ។ លោកនិយាយថា និយតករបានធ្វើអ្វីដែលពួកគេអាចធ្វើបាន ដើម្បីទប់ភាពរំជើបរំជួលមិនឲ្យរីកធំ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
