ភ្នំពេញ៖ លោក ឈាង ឆដាភ័ក្ត្រ ប្រធានស្តីទីនាយកដ្ឋានសិល្បៈទស្សនីយភាព នៃក្រសួងវប្បធម៌ និង​វិចិត្រសិល្បៈ បានថ្លែងឱ្យដឹង​តាមរយៈកិច្ច​សម្ភាសន៍​ជាមួយ BTV នៅថ្ងៃទី២៩ ខែមីនា ឆ្នាំ២០២៣នេះថា ​ក្រសួងបានត្រៀមទម្រង់សិល្បៈល្ខោន៣ ប្រភេទ និងសិល្បៈចម្រៀងចម្រុះ ដើម្បី​ចាក់ផ្សាយក្នុងទំព័រហ្វេសប៊ុក​របស់ក្រសួង នាឱកាសពិធីបុណ្យចូលឆ្នាំថ្មី ប្រពៃណីជាតិ នាពេលខាងមុខនេះ។

លោក ឈាង ឆដាភ័ក្ត្រ បានឱ្យដឹងថា ល្ខោន៣ប្រភេទនោះរួមមាន​ ល្ខោនអាប៉េ​ ល្ខោននិយាយ និង​ល្ខោនចម្រុះ។ ចំណែកចម្រៀងចម្រុះវិញ រួមមាន៖ ចម្រៀងសម័យ ​និងប្រពៃណីជាដើម។

លោក បានបញ្ជាក់ថា ​បច្ចុប្បន្ននាយកដ្ឋានសិល្បៈទស្សនីយភាព កំពុងដាក់ស្នើទម្រង់​សិល្បៈទាំង​អស់នេះទៅលោកជំទាវ រដ្ឋមន្រ្ដីក្រសួងវប្បធម៌ ​និងវិចិត្រសិល្បៈ ដើម្បីផ្ដល់ការអនុញ្ញាត និងសម្រេចលើការផ្សាយលើហ្វេសប៊ុកនេះ។

គួរបញ្ជាក់ថា​ ពិធីបុណ្យចូលឆ្នាំថ្មី ប្រពៃណីជាតិ ឆ្នាំ២០២៣នេះ​ នឹងចាប់ផ្តើមពីថ្ងៃទី១៤​ ដល់ថ្ងៃទី១៦ ខែមេសាខាងមុខនេះ។ ​តាមទម្លាប់ប្រជាពលរដ្ឋខ្មែរ ​តែងនិយមរៀបចំចូលឆ្នាំថ្មី ​ចំនួន ៣ ថ្ងៃរួមមាន ថ្ងៃទី១ ជាថ្ងៃចូលឆ្នាំ, ថ្ងៃទី ២ ជាថ្ងៃ (វារៈ) វនបត,និងថ្ងៃទី ៣ ជាថ្ងៃឡើងស័ក៕អត្ថបទ៖ទូច សោភ័ណ