ភ្នំពេញ៖ ក្រសួងទេសចរណ៍ និងអាជីវករម្ចាស់ភោជនីយដ្ឋាននៅតំបន់គោលដៅទេសចរណ៍​សំខាន់ៗ បានរួមគ្នាធ្វើការផ្សព្វផ្សាយពីម្ហូបអាហារខ្មែរ ​ដើម្បីជំរុញឱ្យកម្ពុជាក្លាយជាគោលដៅ​ទេសចរណ៍​ម្ហូបអាហារ​ប្រកបដោយ​ភាពទាក់ទាញ។

លោក សុង តេង ប្រធានសមាគម​សហគមន៍​ចុងភៅកម្ពុជា ​និងតំណាងភោជនីយដ្ឋាននៅក្នុង​រាជធានី​ភ្នំពេញ បានថ្លែងប្រាប់ BTV​ នៅថ្ងៃទី២៩ ខែមីនា ​ឆ្នាំ២០២៣​ នេះថា​ បច្ចុប្បន្ននៅតាមហាង​ភោជនីយដ្ឋាននានា ​បានរៀបចំបង្ហាញម្ហូបអាហារបែបប្រពៃណីវប្បធម៌ ​ និងម្ហូបអាហារខ្មែរ តាម​តំបន់នានា ដោយបានតាំងបង្ហាញនៅលើបញ្ជីរាយឈ្មោះម្ហូបអាហាររបស់ខ្លួន ហើយដាក់តាំង​នៅ​តាមតុភ្ញៀវ និងផ្សព្វផ្សាយ​ នៅលើប្រព័ន្ធផ្សព្វផ្សាយសង្គមនានាផងដែរ​។

លោកថ្លែងថា ភោជនីយដ្ឋាន​នីមួយៗ ​បាន​រៀបចំ​បញ្ជីឈ្មោះម្ហូបខ្មែរប្រកប​ដោយភាពច្នៃប្រឌិត ព្រមទាំង ​ដាក់​តារាង​តម្លៃច្បាស់លាស់​សម្រាប់​ភ្ញៀវ​ពិនិត្យ​ ដែល​កត្តានេះជាការចូលរួម​ផ្សព្វផ្សាយ​ពីម្ហូបអាហារខ្មែរ ​និង​បង្កើនភាព​ទាក់ទាញ​ទេសចរ​មកកម្សាន្តនៅកម្ពុជា។

លោក អាំង សុវណ្ណរ័ត្ន អគ្គនាយករងអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ​នៃក្រសួង​ទេសចរណ៍ ថ្លែងថា អនុវត្តយុទ្ធនាការឆ្នាំទស្សនាកម្ពុជា ២០២៣ ​ក្រសួងទេសចរណ៍ បាន​បោះពុម្ភសៀវភៅម្ហូបអាហារខ្មែរ ​រៀបចំសៀវភៅម្ហូបអាហារតាមតំបន់ ដាក់នៅតាមមណ្ឌល​ព័ត៌មាន​ទេសចរណ៍ទាំងអស់ ដើម្បីជំរុញការផ្សព្វផ្សាយកម្ពុជា​ ជាគោលដៅទេសចរណ៍ម្ហូបអាហារ។

លោកបន្តថា កត្តានេះជាផ្នែកដ៏សំខាន់​ក្នុងការចូលរួមជំរុញធ្វើពិពិធកម្ម ​នៃវិស័យទេសចរណ៍ និង​ផ្តល់សារសំខាន់គ្រប់រសជាតិ ​គឺស្របតាម ​ខ្លឹមសារនៃយុទ្ធនាការ «ឆ្នាំទស្សនាកម្ពុជា ២០២៣» (Visit Cambodia Year 2023 Campaign) ក្រោមពាក្យស្លោក «គ្រប់ថ្ងៃគឺជាអច្ឆរិយភាព» (Every day is a wonder)។

ក្រសួងទេសចរណ៍ក៏បានអំពាវនាវដល់គ្រប់ភោជនីយដ្ឋាន ​ហាងអាហារដ្ឋាន និងបណ្តាចុងភៅនានា ចូលរួមរៀបចំ​ ចម្អិនម្ហូបអាហារខ្មែរប្រចាំហាង ​ប្រចាំតំបន់ ​ ប្រចាំខេត្ត ​ឲ្យមានរសជាតិឆ្ងាញ់ ទាក់​ទាញ ​និងត្រូវធ្វើការផ្សព្វផ្សាយ​នៅគ្រប់មធ្យោបាយទាំងអស់ ​ដើម្បីអោយភ្ញៀវទេសចរជាតិ​អន្តរជាតិនានា​បានដឹងបានឃើញ និងចង់ទៅទស្សនាកម្សាន្តនៅតំបន់ទេសចរណ៍នោះ ហើយចង់ភ្លក់​រសជាតិម្ហូបអាហារប្រចាំតំបន់ទេសចរណ៍ទាំងនោះ៕អត្ថបទ ស៊ុម សុខជា