សៀមរាប៖ ឯកឧត្តម ទៀ សីហា អភិបាលខេត្តសៀមរាប បានថ្លែងថា ការអភិវឌ្ឍនូវហេដ្ឋា​រចនាសម្ព័ន្ធផ្សេងៗ ដើម្បីបម្រើដល់ផលប្រយោជន៍របស់ប្រជាពលរដ្ឋ នៅតំបន់អភិឌ្ឍន៍រុនតាឯក និងតំបន់អភិវឌ្ឍន៍ពាក់ស្នែង បានចេញរូបរាំងបណ្ដើរៗហើយ ។

ឯកឧត្ដម ទៀ សីហា បានថ្លែងបែបនេះ ក្នុងសន្និសីទសារព័ត៌មានស្តីពី ភាពជោគជ័យក្នុងរយៈពេល ៥ ឆ្នាំ របស់រដ្ឋបាលខេត្តសៀមរាប នៅថ្ងៃទី២៩ខែមីនា ឆ្នាំ២០២៣ នៅទីស្ដីការគណរដ្ឋមន្រ្ដី។

ឯកឧត្តម ទៀ សីហា មានប្រសាសន៍ថា ក្រោមការដោះស្រាយរបស់រាជរដ្ឋាភិបាលមាន​ប្រជាពលរដ្ឋ​ជាច្រើនគ្រួសារ ​បានស្ម័គ្រចិត្តរុះរើចាក់ចេញពីតំបន់អង្គរ ​ទៅរស់នៅតំបន់រុនតាឯក និងតំបន់ពាក់ស្នែងជាបន្តបន្ទាប់។

ឯកឧត្តម បានបន្តថា ក្រៅពីការផ្ដល់នូវសាច់ប្រាក់​ឧបត្ថម្ភ​ប្រចាំខែ រាជរដ្ឋាភិបាលកំពុងអភិវឌ្ឍន៍នូវ​ហេដ្ឋា​រចនា​សម្ព័ន្ធផ្សេងៗ ​ដើម្បីបម្រើផលប្រយោជន៍ដល់ពួកគាត់ ដោយក្នុងនោះសមិទ្ធផល​ជាច្រើន​បានផុសឡើង​ជាបន្តបន្ទាប់ ​ដែលមានដូចជាផ្សារ ផ្លូវជាដើម ​ខណៈបណ្ដាអគ្គិសនី នឹង​តភ្ជាប់ឲ្យ​បានរួចរាល់ នៅខែកក្កដា ឆ្នាំ២០២៣ខាងមុខ ។

គួរបញ្ជាក់ថា ប្រជាពលរដ្ឋទៅរស់នៅតំបន់អភិវឌ្ឍន៍​រុនតាឯក ​និងតំបន់អភិវឌ្ឍន៍​ពាក់ស្នែង មាន​ចំនួន ៩ ៦៨៣ គ្រួសារ បានទទួលបណ្ណក្រីក្រកម្រិត១ ​ដែលមានរយៈពេល ១០ ឆ្នាំ ​ចំនួន ៨ ៩៩៥ គ្រួសារ​ ហើយពួកគាត់ទទួល​ ដីឡូត៍ រួមនឹងអត្ថប្រយោជន៍​ជាច្រើនទៀត​ពីរាជរដ្ឋាភិបាល ស្របពេល​ដែលហេដ្ឋារចនាសម្ព័ន្ធ ផ្លូវថ្នល់ សាលារៀន ​និងមន្ទីរពេទ្យ បានសាង់សង់រួចរាល់​ជាបន្តបន្ទាប់ផងដែរ៕អត្ថបទ បាន សុខរិទ្ធិ