មីយ៉ាន់ម៉ា៖ សារព័ត៌មានរដ្ឋបាននិយាយថា គណៈកម្មការរៀបចំការបោះឆ្នោតរបស់របបយោធាសហភាពមីយ៉ាន់ម៉ា បានប្រកាសកាលពីថ្ងៃអង្គារ ទី២៨មីនាថា គណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រី Aung San Suu Kyi នឹងត្រូវបានរំលាយចោលចំពោះការខកខានការចុះបញ្ជីឡើងវិញ ក្រោមច្បាប់បោះឆ្នោតដ៏តឹងរ៉ឹងថ្មីដែលត្រូវបានពង្រាងដោយយោធា។
យោធាបានធ្វើរដ្ឋប្រហារក្នុងខែកុម្ភៈ ឆ្នាំ២០២១ របស់ខ្លួនក្រោមលេសថា មានភាពមិនច្បាស់លាស់នៃការដែលមានការលួចបន្លំយ៉ាងទូលំទូលាយនៅក្នុងការបោះឆ្នោតឆ្នាំ២០២០ ដែលគណបក្សនេះបានឈ្នះ ដោយបញ្ចប់ការពិសោធន៍លទ្ធិប្រជាធិបតេយ្យរយៈពេល ១០ឆ្នាំ និងធ្វើឱ្យប្រទេសនេះធ្លាក់ក្នុងភាពចលាចល។ កាលពីខែមករា របបនេះបានផ្តល់ឱ្យគណបក្សនយោបាយនូវរយៈពេល ២ខែដើម្បីចុះឈ្មោះឡើងវិញ នៅក្រោមច្បាប់បោះឆ្នោតថ្មីដ៏តឹងរ៉ឹងដែលតាក់តែងដោយយោធា មុនពេលការបោះឆ្នោតថ្មីដែលខ្លួនបានសន្យាថានឹងរៀបចំ ប៉ុន្តែគូប្រជែងរបស់ខ្លួននិយាយថានឹងមិនសេរី ឬយុត្តិធម៌។
ទូរទស្សន៍រដ្ឋ MRTV បាននិយាយថា ក្នុងចំណោមគណបក្សដែលមានស្រាប់ចំនួន ៩០ មានតែ ៥០ប៉ុណ្ណោះដែលបានដាក់ពាក្យសុំចុះឈ្មោះឡើងវិញក្រោមច្បាប់ថ្មីនេះ។ គណបក្សនៅសេសសល់នឹងត្រូវរំលាយចាប់ពីថ្ងៃពុធនេះតទៅ។ លោកស្រី ស៊ូជី បានបង្កើតគណបក្សសម្ព័ន្ធជាតិដើម្បីលទ្ធិប្រជាធិបតេយ្យក្នុងឆ្នាំ១៩៨៨ ហើយបានទទួលជ័យជម្នះដ៏ច្រើនលើសលប់នៅក្នុងការបោះឆ្នោតឆ្នាំ១៩៩០ ដែលត្រូវបានលុបចោលជាបន្តបន្ទាប់ដោយរបបយោធានៅពេលនោះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
