វ៉ូវីណាម៖ ការប្រកួតកីឡាវ៉ូវីណាមជើងឯកអាស៊ីអាគ្នេយ៍លើកទី៦ ឆ្នាំ២០២៣ បានបញ្ចប់ដោយជោគជ័យនៅលើទឹកដីកម្ពុជា បន្ទាប់ពីដំណើរការតាំងពីថ្ងៃទី២៥ ខែមីនា ឆ្នាំ២០២៣ នៅសាកលវិទ្យាល័យភូមិន្ទភ្នំពេញ។
ឆ្លងកាត់ការប្រកួតមកនេះក្រុមកីឡាករ កីឡាការិនីកម្ពុជាធ្វើបានល្អមុនការប្រកួតស៊ីហ្គេម ២០២៣ ចូលមកដល់ ដោយដណ្តើមបានមេដាយសរុប ២៩គ្រឿង ក្នុងនោះមេដាយមាស ១០គ្រឿង ប្រាក់ ០៩គ្រឿង និងសំរឹទ្ធ ១០គ្រឿង។ ចំនែកវៀតណាមបញ្ចប់នៅចំណាត់ថ្នាក់លេខ២ ជាមួយមេដាយសរុប ២០គ្រឿង ដែលក្នុងនោះមេដាយមាស ០៩គ្រឿង ប្រាក់ ១១គ្រឿង និងមិនមានមេដាយសំរឹទ្ធនោះទេ។ សហភាពមីយ៉ាន់ម៉ាហក់មកបញ្ចប់នៅចំណាត់ថ្នាក់លេខ៣ ក្រោយឈ្នះមេដាយមាស ០៥គ្រឿង ប្រាក់ ០៤គ្រឿង និងសំរឹទ្ធ ១៩គ្រឿង សរុប ២៨គ្រឿង។ ថៃបញ្ចប់នៅលេខ៤ មេដាយមាស ០៣គ្រឿង ប្រាក់ ០៥គ្រឿង និងសំរឹទ្ធ ០៤គ្រឿង សរុប ១២គ្រឿង។ ឥណ្ឌូនេស៊ីលេខ៥ មេដាយមាស០៣គ្រឿង និងសំរឹទ្ធ ១៦គ្រឿង សរុប ១៩គ្រឿង។ ហ្វីលីពីនឈ្នះមេដាយប្រាក់ ០១គ្រឿង និងមេដាយសំរឹទ្ធ ៦គ្រឿង សរុប ៧គ្រឿង ខណៈឡាវបញ្ចប់នៅក្រោមគេជាមួយមេដាយសំរឹទ្ធ ៤គ្រឿង។
វ៉ូវីណាមជើងឯកអាស៊ីអាគ្នេយ៍លើកនេះដំណើរការប្រកួតពីថ្ងៃទី២៥ ដល់ថ្ងៃទី៣០ ខែមីនា ឆ្នាំ២០២៣ ដោយកម្ពុជាមានកីឡាករ កីឡាការិនីចូលរួមប្រកួត ២៧នាក់ ថៃ ១២នាក់ សហភាពមីយ៉ាន់ម៉ា ២០នាក់ ឥណ្ឌូនេស៊ី ២០នាក់ ហ្វីលីពីន ៨នាក់ ឡាវ ១៣នាក់ និងប្រទេសវៀតណាម ៣៧នាក់ សរុបទាំងប្រតិភូដែលចូលរួមការប្រកួតនេះមានជាង ២០០នាក់។ ក្នុងស៊ីហ្គេម ២០២៣ កីឡាវ៉ូវូណាមដំណើរការប្រកួតពីថ្ងៃទី៦ ដល់ថ្ងៃទី៩ ខែឧសភា ដោយមាន ៣០វិញ្ញាសានៅមជ្ឈមណ្ឌលសន្និបាត និងពិព័រណ៍អន្តរជ្រោយចង្វា (CCIC)៕ អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
