​កោះ​តៃវ៉ាន់៖ មេ​ដឹក​នាំ​កោះ​តៃវ៉ាន់​លោកស្រី Tsai Ing-wen បាន​ទៅដល់​ទីក្រុង​ញូវយ៉ក ជាទី​ឈប់​ចត​ដ៏​ចម្រូងចម្រាស​នៅ​សហរដ្ឋអាមេរិក​កាលពី​ថ្ងៃ​ពុធ ដោយបាន​ប្តេជ្ញា​ថា​នឹងមិន​អនុញ្ញាត​ឱ្យមាន​សម្ពាធ​ពី​ខាងក្រៅ ​រារាំង​កោះ​នេះ​ពី​ការទំនាក់ទំនង​ជាមួយ​ពិភពលោក​ឡើយ បន្ទាប់ពី​ប្រទេស​ចិន​បាន​គំរាម​សងសឹក ​ប្រសិនបើ​លោកស្រីជួប​ជាមួយ​ប្រធាន​សភា​អាមេរិកលោក Kevin McCarthy។

ប្រទេស​ចិនដែល​អះអាងថា​ កោះ​តៃវ៉ាន់​ដែល​គ្រប់គ្រង​តាមបែប​លទ្ធិប្រជាធិបតេយ្យ​ជា​ទឹកដី​របស់ខ្លួន​នោះ បាន​ព្រមាន​ម្តង​ហើយ​ម្តងទៀត​ចំពោះ​មន្ត្រី​សហរដ្ឋអាមេរិកកុំឱ្យ​ជួប​លោកស្រី Tsai ដែល​កំពុង​ឈប់​ចត​នៅ​សហរដ្ឋ​អាមេរិកជា​លើកដំបូង​ចាប់តាំងពី​ឆ្នាំ២០១៩ ដោយ​ចាត់ទុកថា វា​បង្ហាញ​ពី​ការគាំទ្រ​ចំពោះ​បំណងប្រាថ្នា​របស់​កោះ​តៃវ៉ាន់​ ដែល​ត្រូវបាន​គេ​មើលឃើញថា​ជា​ដែនដី​ឯកា​។ ប្រទេស​ចិនបានរៀបចំ​ហ្គេម​សង្គ្រាម​ធំៗ​នៅ​ជុំវិញ​កោះ​តៃវ៉ាន់​កាលពី​ខែសីហា ដែល​នៅពេលនោះ​ប្រធានសភា​អាមេរិក​លោកស្រី Nancy Pelosi បានធ្វើ​ទស្ស​កិច្ច​នៅ​ទីក្រុង​តៃប៉ិ​។ លោកស្រី Tsai កំពុងធ្វើដំណើរ​ទៅកាន់​ប្រទេស​ហ្គា​តេ​ម៉ា​ឡា និង​ប្រទេស​បេ​លី​ហ្ស ជា​ប្រទេស​ពីរ​ក្នុងចំណោម​ប្រទេស​មួយចំនួន​ដែល​ទទួលស្គាល់​កោះ​តៃវ៉ាន់​ជា​លក្ខណៈ​ការទូត​។ លោកស្រី​នឹង​ស្នាក់នៅ​ទីក្រុង​ញូវយ៉ក​រហូតដល់​ថ្ងៃ​សៅរ៍ ទី​១ ខែមេសា ហើយនឹង​ទៅកាន់​ទីក្រុង Los Angeles នៅពេល​លោកស្រី​ត្រលប់​មកពី​អាមេរិក​កណ្តាល​វិញ​។

ស្ថានទូត​តាម​ជាក់ស្តែង​របស់​កោះ​តៃវ៉ាន់​ប្រចាំ​នៅ​សហរដ្ឋអាមេរិក បានបញ្ជាក់​ពី​ការមកដល់​របស់លោក​ស្រី Tsai នៅ​ទីក្រុង​ញូវយ៉ក​កាលពី​រសៀល​ថ្ងៃ​ពុធ និង​បាន​និយាយថា​ គ្មាន​ព្រឹត្តិការណ៍​ណាមួយ​របស់​លោកស្រី​ត្រូវបាន​បើកចំហ ​ចំពោះ​សារព័ត៌មាន​ ឬ​សាធារណជន​ក្នុងអំឡុងពេល​ស្ថិតនៅ​ទី​ឈប់​សំចត​នៅ​អាមេរិក​ឡើយ​។ កោះ​តៃវ៉ាន់បាន​បាត់​បង់​ការទទួលស្គាល់​ជា​ផ្លូវការ​ពី​ប្រទេស​ជាច្រើន​ជា​បន្តបន្ទាប់ ខណៈ​ប្រទេស​ទាំងនោះ​ផ្លាស់ប្តូរ​ជំហរ​ទៅកាន់​ទីក្រុង​ប៉េកាំង​។ ប្រទេស​ហុង​ឌុយ​រ៉ា​សបាន​កាត់​ផ្តាច់ទំនាក់ទំនង​កាលពី​ថ្ងៃអាទិត្យ ទី​២៦ ខែមីនា ដោយ​នៅសល់​ត្រឹមតែ ១៣ប្រទេស​ប៉ុណ្ណោះ ដែលមាន​ទំនាក់ទំនង​ផ្លូវការ​ជាមួយ​កោះ​តៃវ៉ាន់​។ ទីក្រុង​ប៉េកាំងនិយាយថា តៃវ៉ាន់​ជា​របស់​ចិន​តែមួយ ហើយ​ជា​ខេត្ត​មួយ​របស់​ចិន គ្មាន​សិទ្ធិ​មាន​ទំនាក់ទំនង​រដ្ឋ​ និង​រដ្ឋ​នោះទេ ប៉ុន្តែ​កោះ​តៃវ៉ាន់បាន​បដិសេធ​ចំពោះ​រឿងនេះ​។​

អត្ថបទ៖ ប៊ុនថន